Hou jou kleuters hierdie vakansie só besig

Vakansies kan ’n wonderlike tyd wees om te werk aan jou verhouding met jou kinders en gelyktydig kan jou innerlike kind saam speel. Dit kan egter ook ’n stresvolle tyd wees wanneer kinders hulleself kan wangedra omdat hulle verveeld is.Beplan eerder ’n bietjie vooruit en berei ’n arsenaal aktiwiteite voor om die kleintjies uit die kwaad te hou.Begin deur elke week vooruit te beplan. As kinders weet dat hulle iets het om na uit te sien, sal hulle gelukkiger en meer ontspanne wees. Maak hulle sommer ook by die beplanning betrokke – hulle sal minder oor die aktiwiteite kla as hulle deel was van die besluitnemingsproses.Gee vir hulle ook ’n rits aktiwiteite om uit te kies: iets by die huis, in die tuin, in die buitelewe, en ook aktiwiteite wat ’n bietjie geld gaan kos.• Skep jou eie speletjies. Koop kleurvolle kaartjies, ’n kinderskêr, gom en enigiets anders wat jy gaan benodig om speletjies mee te maak. Dink maar aan donkiestertsteek of slangetjies en leertjies. Dit kan alles by die huis gemaak word en sal kinders besig hou. Onthou, jy sal waarskynlik ’n hand moet bysit vir kleiner kinders.• Kook en bak. Beplan minstens een keer ’n week ’n kook- of bakdag. Kry die kinders van die begin af betrokke – laat hulle resepte uitsoek waarvan jy die bestanddele het. As die kleintjie kan lees, laat hulle resepte voorlees. Help hulle om stap vir stap deur die metode te werk.• Maak ’n hindernisbaan in jou tuin. Ou stukke hout, karton, emmers, tuinstoele – enigiets waaroor daar gespring of gekruip kan word.• Maak tuin. Sit ’n klein stukkie grond in jou tuin vir die kinders opsy. Plant blomme, kruie – enigiets wat vinnig groei. As jou kinders nog klein is, gee vir hulle ’n graaf, trek ou klere aan en laat hulle woeker!• Gaan kamp. Bou ’n kombers- of lakentent binne of buite jou huis. Wanneer die tent eers opgeslaan is, gee vir hulle ’n piekniek om “onderdak” te geniet.• Hou piekniek. Jy hoef nie ver te gaan nie – die tuin is sommer ideaal. Gee vir hulle enigiets wat in die yskas is en jy sal verbaas wees hoe lekker dit is om op ’n kombers te sit en smul.• Hou skattejag. Maak ’n skatkaart met leidrade om skatte te vind wat jy iewers in die tuin weggesteek het. Dit hoef nie groot of duur te wees nie – selfs ’n lekkertjie kan sorg vir groot opwinding.• Maak ’n somerdagboek. Moedig die kleintjies aan om ’n dagboek of plakboek te skep. Hulle kan foto’s van spesiale dae neem en daaroor skryf. Dit sal ’n wonderlike herinneringsboek word vir die toekoms en hulle ure lank besig hou.• Maak musiek. Kry iets om op te slaan of te skud en begin dans. Laat die kleintjies sommer ook saamsing. Andersins kan jy jou gunsteling musiek aansit en die litte swaai!• Maak ’n fliek. Laat hulle jou selfoon en poppe gebruik en redigeer dit later op jou rekenaar. • Verf. Een van die lekkerste maniere om kreatief te wees, is met verf. Al wat jy nodig het, is papier en verf, en gebruik sommer jou hande en voete. Om ’n groot gemors te vermy, maak seker die verfarea is goed bedek met plastiek of koerantpapier. Hou ook water byderhand om ná die tyd skoon te maak.• Maak juwele. Skaf klomp krale, draad en hakies aan en maak jou eie juwele. Hierdie aktiwiteit sal selfs die kleinste kinders besig hou, maak net seker om die geskikte kraalgroottes vir verskillende ouderdomsgroepe te gebruik. Die kleintjies sal sommer baie trots wees om die krale te dra wat hulle self gemaak het!• Teken. Kry vir elke kind sy eie sketsblad en potlode en moedig hulle aan om dit wat rondom hulle is, te skets. • Gaan swem. Hierdie is veral ’n goeie idee as jy naby die see of ’n swembad woon, of skaf ’n klein swembad vir jou tuin aan. Water het altyd ’n kalmerende effek op kinders en gebruik baie energie.• Gaan stap in die natuur. As jy naby ’n strand is, tel skulpies en klippe op. As jy nader aan ’n bos is, wees op die uitkyk vir goggas, plante en bome. Alternatiewelik, gee vir hulle 'n kaart om die roete wat julle neem uit te stippel. As hulle beheer het, raak hulle minder vinnig verveeld.• Hou ’n uitverkoping. Laat die kinders hulle kamers ontruim en verkoop alles wat onnodig is. Gebruik die geld wat julle maak vir ’n lekker gesinsaktiwiteit.• Maak ’n draai by die biblioteek. Daar is letterlik duisende boeke om van te kies en die kinderafdeling sorg altyd vir groot vermaak. • Reël dat maatjies kom kuier. Terwyl die kinders baljaar, het jy ’n bietjie tyd vir jouself.• Ontspan. Met al hierdie aktiwiteite, kan kinders gerus ook ’n “afdag” neem. Kyk fliek, lees boeke en vat dit rustig. – Ontleen aan lifehack.org

Hou jou kleuters hierdie vakansie só besig

Kommentaar

Republikein 2025-06-23

Meld asseblief aan om kommentaar te lewer

Hou jou kleuters hierdie vakansie só besig

Kommentaar

Republikein 2025-06-23

Meld asseblief aan om kommentaar te lewer

MELD AAN

Advertensie