Hospitale dok miljoene vir Covid-pasiënte op

Henriette Lamprecht – Dit kos hospitale (privaat en staat) landswyd letterlike duisende Namibiese dollar om Covid-19-pasiënte daagliks te behandel. In sommige gevalle kan positiewe pasiënte tot vir ’n ekstra twee maande in die hospitaal in ’n post-Covid-19-saal beland waar hulle steeds intensiewe behandeling ontvang en wat suurstof en ventilators insluit. Sommige post-Covid-pasiënte het al tot 60 dae in so ’n saal deurgebring. Covid-pasiënte se behandeling sluit oorwegend ’n multi-dissiplinêre span in wat van ’n spesialis tot ’n sielkundige tot ’n fisio- en arbeidsterapeut insluit.Volgens die jongste statistiek van die ministerie van gesondheid en maatskaplike dienste het die land Saterdag 565 Covid-pasiënte in hospitale oraloor die land gehad, van wie 114 in die intensiewesorgeenheid was. Alle hospitale in die land word volgens tariewe van die Vereniging van Namibiese Mediese Fondse (Namaf) betaal.Die daaglikse bedfooi per pasiënt vir ’n algemene saal beloop N$3 847,20 per dag. Word die pasiënt in die hoësorgsaal behandel, verdubbel dit tot N$9 758,70. Om ’n pasiënt in die intensiewesorgeenheid (ICU) te behandel, kos ’n hospitaal in Namibië N$16 016,30 per dag.Die bykomende koste vir Covid-19-pasiënte laat skiet egter die daaglikse koste nog verder die hoogte in.Met verwysing na persoonlike beskermende toerusting (PPE) vir die multi-dissiplinêre span wat so ’n pasiënt moet versorg, is die koste N$14 400 per siklus van 24 uur. Dié bedrag sluit PPE’s vir 27 susters wat ten minste drie keer moet aan- en uittrek soos hulle tussen pasiënte beweeg; vier dokters om die pasiënte te besoek, drie fisioterapeute en drie radiografiste.Bykomende ventilators kos ’n hospitaal gemiddeld N$ 618 382,44 vir pasiënte wat in die ICU versorg word. Bykomende CPAP (masjiene vir slaapapnee) vir ernstige siek pasiënte beloop N$32 200, terwyl die bykomende hoëvloei ook vir ernstige siek pasiënte hospitale N$122 980 uit die sak jaag. Nog is den einde niet en is uitgawes soos bykomende ontsmettingsmiddels, asook eetgerei en linne wat in die isolasiesale gebruik en op ’n spesiale manier gewas moet word, nog nie bygereken nie. Dit is ook moeilik om spesifiek dié akkurate waarde te bepaal of toe te wys. Alle drag, linne, handdoeke ensovoorts wat in die isolasiesaal gebruik word, moet teen langer siklusse en met bykomende middels gewas word. Dit beteken meer krag en koste vir beter ontsmetting om die Covid-virus dood te maak. Dieselfde geld vir alle eetgerei wat in dié sale gebruik word. Wanneer personeel positief vir Covid-19 toets en noodgedwonge nie vir twee weke diens kan verrig nie, is daar die bykomende koste van buiten dié personeel se salaris wat betaal word, dié van personeel wat vir die leemte moet instaan. Weens personeel wat positief toets en afgeboek is, moet ander oortyd werk en vervolgens hiervoor vergoed word. Ook benodig hospitale meer personeel weens die meer intensiewe sorg van Covid-19-pasiënte. Dit behels dat ekstra personeel teen ekstra koste vir hospitale ingebring word. Bogenoemde berekening sluit boonop nie die geweldige koste in van groot hoeveelhede suurstof wat vir Covid-19-pasiënte gebruik word nie. – henriette@republikein.com.na

Hospitale dok miljoene vir Covid-pasiënte op

Kommentaar

Republikein 2025-05-01

Meld asseblief aan om kommentaar te lewer

Hospitale dok miljoene vir Covid-pasiënte op

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie