Horings na Hongkong gekoerier

Francoise SteynbergDie minister van die omgewing en toerisme het gister bevestig dat koeriermaatskappye ondersoek word nadat 12 stukkies renosterhoring per koerier in twee pakkies van Namibië af na die Internasionale Lughawe Hongkong gestuur is.Doeanebeamptes het op 22 Maart 12 stukkies renosterhoring van 6,6 kg met 'n waarde van US$1,3 miljoen (sowat N$16,8 miljoen) in twee lugkoerierpakkies op die lughawe gevind. Volgens die webtuiste van die regering van Hongkong het doeanebeamptes tydens 'n vragondersoek twee pakkies geskandeer wat as koffie verklaar is.“Verdagte beelde is tydens die X-straal-inspeksie van die skandeerders gevind. Nadat die besending oopgemaak is, het doeanebeamptes renosterhorings ontdek,” het Shifeta gesê. Ná 'n opvolgondersoek is 'n 42-jarige man op 23 Maart in hegtenis geneem. Hy is op borgtog vrygelaat en die ondersoek duur voort. Die hoof van die Namibiese polisie (NamPol) se eenheid vir beskermde hulpbronne, adj.komm. Barry de Klerk, het ook gister aan Republikein bevestig dat NamPol saam met Interpol werk om die saak te ondersoek. Die minister van die omgewing en toerisme, mnr. Pohamba Shifeta, het gister gesê die persoon wat in hegtenis geneem is, moet die ontvanger van die pakkies wees.“Die vraag is wie die pakkie uit Namibië gestuur het. Ons probeer om meer inligting by Interpol te kry,” het Shifeta gesê.Hy het bevestig dat koeriermaatskappye deeglik ondersoek sal word om uit te vind wie die verdagte items in die pakkies uit Namibië gestuur het.Shifeta het verwys na 'n voorval verlede jaar toe koffie ook as rookskerm gebruik is om stukkies ivoor uit die land te smokkel. Twee Chinese mans, mnre. Xue Xinxi (47) en Ruhe Zhang (60) het na bewering probeer om die ivoor in koffieblikke uit te smokkel. Hulle is op 7 Desember by die Kapps Farm-padblokkade op pad na die Internasionale Lughawe Hosea Kutako in hegtenis geneem.Shifeta sê hy het onlangs saam met die Namibiese polisie die lughawe besoek om sekuriteit te ondersoek nadat nóg 'n Chinees, Ye Zhiwei (29), verlede jaar met 18 renosterhorings deur die skandeerder geglip en op die Internasionale Lughawe O.R. Tambo in Johannesburg vasgetrek is. Ye het reeds skuldig gepleit en word op 5 April in Kempton Park se hof gevonnis. Hy het in sy pleitverduideliking erken dat hy drie horings van witrenosters en 15 van swartrenosters by 'n hotel in Windhoek van ene mnr. Zhang Fei ontvang het.“Hosea Kutako is nou baie besig en die personeel - doeane, polisie en sekuriteit - moet verdubbel word met al die nuwe lugrederye wat die lughawe bedien,” het Shifeta gesê.“Ons spasie op die lughawe is te min. Daar is meer lugrederye wat wil kom en ons het 'n ander lughawe nodig.”Shifeta sê dit is baie goed vir toerisme en die ekonomie, “maar die huidige lughawe se kapasiteit is nie voldoende nie”.

Horings na Hongkong gekoerier

Kommentaar

Republikein 2026-02-03

Meld asseblief aan om kommentaar te lewer

Horings na Hongkong gekoerier

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.