Hope Village het 'n nuwe pa

Hope Village in Windhoek, wat deur Standard Bank ondersteun word, spog met 'n nuwe “pa”.

Mnr. Kingston Makoni is drie maande gelede as nuwe bestuurder van dié onderneming aangestel en het reeds positiewe veranderinge aangebring.

Makoni sê hy het die geleentheid aangegryp om by Hope Village te werk, omdat hy 'n positiewe bydrae tot die sentrum se kinders wil maak.

Makoni het meer as 17 jaar se ervaring met nie-winsgewende organisasies, en is deur Standard Bank aangestel om vir Marietjie de Klerk, stigter van die sentrum, by te staan.

Afgesien van Hope Village se vyfjaarplan het Makoni ook sy eie planne wat hy reeds begin implementeer het. Hy het beleid en prosedures, wat tevore nie bestaan het nie, vir personeel opgestel en aan hulle oorgedra.

Makoni wil Hope Village sigbaar maak as 'n nie-winsgewende organisasie sodat hulle meer borge kan kry.

Hy het ook 'n naskoolse studieprogram vir die kinders in werking gestel omdat van hulle sukkel met hul skoolwerk.

Makoni sê die negatiewe invloed van die area waarin die weeshuis geleë is, is 'n uitdaging, maar nie onoorkombaar nie.

Hy het sy waardering vir sy span uitgespreek.