Hoogste Nasa-eer vir Japie

Ronelle Rademeyer - Met 33 jaar van diens by Nasa se Straalaandrywingslaboratorium (JPL) by die Kalifornië Instituut vir Tegnologie (Caltech) en 20 suksesvolle ruimtesendings agter die blad, is Namibië se dr. Japie van Zyl verlede week met dié ruimte-administrasie se hoogste toekenning vereer.Hy het Woensdag die Nasa-medalje vir uitmuntende openbare diens by die Goddard-ruimtesentrum naby Washington D.C. ontvang. Dit plaas hom in dieselfde liga as die ruimtevaarders Neil Armstrong, Buzz Aldrin en Michael Collins wat ook met dié uitgelese medalje vir hul deelname aan die suksesvolle maanlanding 50 jaar gelede vereer is.Dit is volgens Nasa die hoogste vorm van erkenning aan “’n werknemer van die Amerikaanse regering wat deur sy of haar werk ’n diepgaande en onuitwisbare impak op sendingsukses gehad het en die VSA se belange daardeur bevorder het”.Die 62-jarige Van Zyl het in Maart as direkteur van sonnestelselverkenning by die JPL afgetree en is nou die uitvoerende hoof van Hydrosat, ’n privaat maatskappy wat hy saam met ander vennote begin het. “Ons beplan om satelliete te lanseer waarmee ons die waterbehoeftes van plante kan bepaal. Op dié inligting kan die mensdom 20% water bespaar, terwyl hy dit regkry om 40% meer voedsel te produseer,” het hy in ’n WhatsApp-boodskap verduidelik.Wanneer Nasa in Junie volgende jaar die Mars 2020-sending lanseer, sal Van Zyl opnuut in die wêreld se oë wees. Dit is aangesien die Mars-verkenningshelikopter wat saam met hierdie sending na die Rooi Planeet gaan, sy breinkind is. Van Zyl het hom in 1986 by die JPL aangesluit en later ook Amerikaanse burgerskap gekry.Hy het egter altyd nou bande met Namibië behou en maak met sy gereelde besoeke aan die land tyd om skole te besoek en praatjies oor Nasa en die ruimte te gee.Hy is in 1957 op Outjo gebore en het sy kinderjare op Opuwo deurgebring.

Hoogste Nasa-eer vir Japie

Kommentaar

Republikein 2026-03-20

Meld asseblief aan om kommentaar te lewer

Hoogste Nasa-eer vir Japie

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.