Hoofstad steier onder kragdiefstal

Augetto GraigDie Windhoekse munisipaliteit is bekommerd oor kragdiefstal deur inwoners en beskou dit as ’n ernstige misdaad wat baie gevaarlik is.Die hoofstad se woordvoerders het onlangs ’n beroep op inwoners gedoen om nie met kragkabels te peuter of kragmeters te probeer omseil nie.Die munisipaliteit sê dit is lewensgevaarlik en belemmer die ontwikkeling van infrastruktuur.“Die voortdurende diefstal is ’n groot struikelblok vir dienslewering in Windhoek,” volgens die munisipaliteit.Gelukkig is niemand sedert 2020 tot nou toe aan elektriese skokke weens onwettige elektriese verbindings dood nie, maar die afgelope sewe jaar is ses sterfgevalle in Windhoek daarvoor aangeteken.Volgens mnr. Harold Akwenye, hoofwoordvoerder vir die munisipaliteit, is die verliese as gevolg van die ontwyking van kragmeters nie te groot nie, maar baie onwettige kragverbindings vind in informele nedersettings plaas.Hierdie koppelpunte word ná die kragmeters aangelê en dus word daar steeds vir die krag betaal, sê hy.Die hoofstad se algemene kragverliese is onder 8% en minder as die 10% wat volgens die Elektrisiteitsbeheerraad (ECB) toelaatbaar is, sê hy.“Die inkomsteverlies as gevolg van die omseiling van kragmeters en ander faktuurfoute wat gewoonlik as kommersiële verliese aangedui word, maak 3% van ons totale verliese uit, wat maandeliks ongeveer N$2,5 miljoen beloop,” brei hy uit.Akwenye sê onwettige koppelings kom meer in die informele nedersettings voor, maar die omseiling van die meters gebeur oral in die stad.In terme van strawwe aan oortreders, sê hy die munisipale kragdepartement reik boetes uit en meer as 200 boetes is reeds toegeken, wat eers betaal moet word voor kragtoevoer herstel sal word.“Die stad het in die verlede oortreders howe toe gesleep, maar om oortreders skuldig te bewys, was nie so maklik nie weens die langdurige en omslagtige wetsproses. Die stadsraad oorweeg dit om weer daarmee te begin,” sê hy.“Die grootste impak van kragdiefstal is ’n toename in diensonderbrekings wat lei tot langdurige kragonderbrekings aan ander kliënte, aangesien sommige infrastruktuur tyd neem om weer aan te skakel nadat dit oorlaai is,” sê hy.Volgens hom is die voorsiening van krag na nedersettings die beste oplossing om onwettige kragkoppelinge te verminder en doen die hoofstad sy uiterste bes om met beperkte finansiële hulpbronne krag aan meer huise te voorsien.- augetto@republikein.com.na

Hoofstad steier onder kragdiefstal

Kommentaar

Republikein 2025-11-03

Meld asseblief aan om kommentaar te lewer

Hoofstad steier onder kragdiefstal

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.