Hongkong-vlugte wéér gestaak oor betogers

Inkomende en uitgaande vlugte in Hongkong is Dinsdag vir die tweede dag agtereenvolgens gestaak weens antiregeringsbetogers wat die lughawegebou beset het.Chaotiese tonele het op die lughawe afgespeel soos reisigers probeer het om by die selfhelptoonbanke vir vlugte aan te meld.Volgens Sky News glo van die betogers die lughawegebou bied beskerming teen die onlustepolisie.Intussen het China se verwysing na die betogers die afgelope paar dae al hoe heftiger geword. Die woord “terrorisme” is die eerste keer deur die Chinese regeringswoordvoerder vir Hongkong gebruik vir die oproer en betogings in dié voormalige Britse kolonie. Die opstand is uit vrees dat hul selfbestuur deur die rooi reus China verkrummel word. Yang Guang se beskrywing van terrorisme klink baie soos 'n dreigement teenoor betogers dat hulle nou 'n vlak van omverwerping bereik wat (die Kommunistiese Party) nie langer aanvaarbaar vind nie, sê Lev Nachman, 'n kenner oor maatskaplike groepe in Hongkong en Taiwan wat aan die Universiteit van Kalifornië verbonde is.“Om die woord 'terrorisme' te gebruik is retoriek om voor te berei vir eskalering. Dit gee die party ruimte om verder te gaan en die sogenaamde terrorisme as rede te gebruik om geweld van sy kant af te regverdig om hierdie 'terroristiese gevaar' te stuit.” MAG PLA INROEPHongkong se polisie het reeds begin om hard op te tree. Op tonele op CNN kon Maandagaand gesien word hoe hulle sonder genade met knuppels onder die betogers inklim en aanhou slaan al kan die betogers nie vorentoe of agtertoe nie. Mans, vroue, oud of jonk, niemand is ontsien nie en talle is hardhandig in hegtenis geneem.Carrie Lam, Hongkong se leier (deur Beijing goedgekeur), het Dinsdag gesê die betogers se wetteloosheid in die naam van vryheid tas die oppergesag van die reg aan en dat die stad as finansiële spilpunt in die wêreld lank kan neem om te herstel.Kragtens die Hongkongse grondwet mag Lam die hulp van die Chinese People's Liberation Army (PLA) inroep om openbare orde te handhaaf. Daar is 'n garnisoen van die weermag in Hongkong.Die betogings in Hongkong het begin om 'n wysigingswet te keer wat die uitlewering van Hongkongers aan China sou goedkeur sodat hulle daar verhoor kon word. Die wet is teruggetrek, maar die betogings het uitgebrei en daar is nou al eise vir 'n volledige demokrasie en dat Carrie Lam, leier van Hongkong, moet bedank.Al wat die meeste betogers egter vra, is dat die ooreenkoms met die Britte in 1997 van “een staat, twee stelsels” nagekom word. Daar word reeds gepraat van “een staat en een en 'n halwe stelsel” weens die kruipende, stille oorname van China.Lam word deur die Beijingse regering ondersteun.- Netwerk24/Reuters, Sky News, verwerk

Hongkong-vlugte wéér gestaak oor betogers

Kommentaar

Republikein 2025-11-05

Meld asseblief aan om kommentaar te lewer

Hongkong-vlugte wéér gestaak oor betogers

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.