Hondsit teenoor babasit

Estelle de BruynDis seker makliker as 'n mens jou kleinkinders moet oppas as Mamma en Pappa 'n breek nodig het as om 'n klein hond op te pas wat baie huis- en boetievas is.Vra my. Kleinkinders moes ek nog nooit oppas nie, maar babahond oppas was verlede week my lot. Haar naam is Isis, soos die terroristegroep wat deesdae as die Islamitiese Staat-groep (IS) bekend staan. Boetie se verduideliking van die naam was, "sy maak net soveel moeilikheid soos Isis". Boetie moes uit die dorp gaan vir werk en dit was Ma se "voorreg" om in te staan en die diertjie op te pas. Wat 'n uitdaging!Toe Boeta by die hekkie uitstap, toe begin Isis huil, weemoediglik, stert tussen die bene en sit net voor die hekkie.Ek het haar met kos en 'n beentjie binnetoe gelok en die deur toegemaak. Haar later op my skoot getel, gevryf en mooi gepraat, maar die stert bly tussen die bene. Sy was duidelik erg getraumatiseer.Dit was Vrydag. Die naweek was ek gelukkig tuis en het ek die diertjie gekalmeer en uiteindelik sodanig onder beheer gehad dat sy begin blaf het vir die bobbejane in die veld hier neffens my en vanself begin het om op my skoot te spring.Maandag vir Nestor, my tuinier, gevra om die hekkie 'n barrikade te maak sodat Isis nie kan ontsnap nie. Dinsdag was die huishoudelike bestuurder en Nestor hier en die diere het die meeste van die dag geselskap gehad.Maar wee, o wee, Woensdagmiddag toe ek by die kompleks ingery kom, draf Isis my tegemoet. Sy het daarin geslaag om deur die barrikade te ontsnap.Toe ek by my huis aankom, was die gaas voor die hek heeltemal verwoes en ek kon sien dat Isis agter die barrikade van planke deurgewriemel het, die gaas aan flarde geskeur het en deur die tralies van die hek ontsnap het.My erf het soos 'n slagveld gelyk met stukke groen gaas en planke wat die plek vol gesaai gelê het.Wat die ergste is, is dat Isis nie 'n groot hond met krag is nie, maar 'n klein langbeen-, krulsterthondjie. Wat ek van haar herkoms kan sê, is dat sy 'n opregte hond is: haar ma en pa was ook albei honde.Nadat ek die erf opgeruim het, die barrikade weer in plek geplaas het, die gaas van die gras opgetel het en vir my 'n glas wyn ingegooi het, klink 'n reusekakofonie op. Isis is van haar kop af en storm die barrikade soos 'n stormtroep.Toe ek uitasem uitstorm, staan Boeta tot my groot verligting binne die erf. Hy het oor die muur gespring toe hy die stormtroep-aanslag op die barrikade moes aanhoor.Isis was oorstelp van vreugde en ek dink, as ek eerlik is, was ek veel blyer.Dis was lekker om die ou diertjie hier te hê, maar ai, dit was net so lekker toe sy weer veilig onder Boeta se toesig en beheer was.Sus in Hongkong het ook nou 'n hond, Trusty, van onseker afkoms, wat hulle by die dierebeskermingsvereniging aangeneem het.Ek hou regtig sommer baie van Trusty . . . want ek sien hom net op foto's en video's.Dit laat my wonder hoe ek oor kleinkinders sal voel.

Hondsit teenoor babasit

Kommentaar

Republikein 2025-06-23

Meld asseblief aan om kommentaar te lewer

Hondsit teenoor babasit

Kommentaar

Republikein 2025-06-23

Meld asseblief aan om kommentaar te lewer

MELD AAN

Advertensie