Honde mag ook tittewyt

Tanja Bause – “Ek het met my laaste geld bestanddele gekoop en met Stella’s Dog Beauty Products begin, en ek was nog nie een dag spyt nie,” sê Carlien Ludeke. Carlien het verlede jaar November haar werk verloor. “Dit was ’n groot skok toe my baas my afdank. Ek het my CV onmiddellik na verskillende besighede begin stuur. Ek het laas week Vrydag my eerste en enigste onderhoud gehad. Daar ís nie werk daar buite nie,” sê sy.Carlien het probeer om met unieke besigheidsidees vorendag te kom, soos onder meer Bubbels. “Bubbels was hoofsaaklik op studente en mans gemik. Ek sou hul klere was en stryk en hulle sou vir die diens betaal. Bubbels het egter nooit regtig vlam gevat nie.”Ook ’n paar ander idees kon nie die pot aan die kook hou nie.“Ek het al wanhopiger geraak. Ek het ook al hoe meer bekommerd geraak oor wat van Stella, my Jack Russell, gaan word as my omstandighede nie verander nie. Stella is my lewe en ek moes ’n plan maak.”Die moontlikheid dat sy en Stella kort voor lank op straat sou sit, het al groter begin raak.“Stella is dikwels hardlywig, en ek het een dag begin google oor natuurlike produkte wat ek kan gebruik om haar probleem te verlig. Wanneer ons op straat sit, sal ek nie ’n veearts kan bekostig nie. Dus het ek solank alternatiewe gesoek.” Carlien het ’n webtuiste ontdek wat onder meer tuisgemaakte hondesjampoe-resepte gedeel het. “Die sjampoe bestaan 100% uit natuurlike produkte en skuim dus nie. Ek weet mense dink dis nie sjampoe as dit nie skuim nie, want ek is ook so, dus noem ek die produk ’n raat en nie ’n sjampoe nie.”Sy het die bestanddele vir die maak van die raat met haar laaste geld aangeskaf.“Ek is tot vandag toe nog nie spyt oor die besluit nie, en ek en Stella is nog nie op straat nie,” sê Carlien.Vandag vervaardig sy vier verskillende produkte. Daar is ’n vlooiraat, een vir droë en sensitiewe vel en ’n droë sjampoe. “Ek was Stella met gewone hondesjampoe en gebruik dan die raat as ’n opknapper om haar vel sag te maak.”Die tweede produk wat Carlien begin gemaak het, is reukwater vir honde.“Ek het gedink net omdat ons binnekort dalk haweloos is, beteken dit nie Stella moet soos ’n hawelose ruik nie. Ek het ’n resep vir natuurlike hondereukwater gesoek en dit begin maak.”Die reukwater ruik nie na rose en laventel nie, maar bestaan uit onder meer gesuiwerde water, roosmaryn en kruisement. “Jy spuit dit oor die hond se hele lyf en dit vat daai nat hond-reuk weg,” sê sy. Van Carlien se kliënte het voorgestel sy maak ’n smeer vir honde se pote. “Wanneer honde baie stap, word hul pootkussings baie droog en skurf. Ek vat elke aand so ’n bietjie van die smeer en vryf Stella se pote saans daarmee in. Dit is soos ’n voetmassering vir honde.”Die smeer is beskikbaar in gegeurde en geurlose vorm.“Dit word met laventel of sitroengras gegeur. Die sitroengrasgeur is baie goed vir honde wat baie in die veld rondloop, want bosluise hou nie van die reuk nie,” sê sy.Volgende op Carlien se agenda was hondetandepasta. Ook dit bestaan uit natuurlike bestanddele. Die hoofbestanddele is kokosneutolie, pietersielie en kruisement. Die hele mengsel word met of bees-, hoender- of groenteaftreksel gegeur. “Ek gebruik sommer my vingers om die tandepasta op Stella se tande te sit. Maar ek is besig om na te vors hoe om tandeborsels te maak.”Lekkernye Carlien bak ook hondelekkernye in haar kombuis.Tans maak sy twee soorte koekies: een met grondboontjiebotter en een met lynsaad. “Ek voeg niks by wat skadelik kan wees nie, en geen suiker nie. Stella is nie goedkoop nie, dus word geen goedkoop of nagemaakte produkte gebruik nie.”Die snoepgoed bevat ook appelsous en pampoenpuree.“Die maak en bak van die koekies is soos gewone koekies bak. Ek meng die beslag, rol die deeg uit, druk vorms uit en bak dit in die oond.” Carlien oorweeg ook om speelgoed en selfs klere vir honde te maak. Sy is op soek na ou klere, plastiekbottels en plastiekproppies hiervoor. “Al my produkte word van natuurlike bestanddele gemaak. Die speelgoed en klere sal van herwinbare materiaal gemaak word.”Carlien toets al haar produkte self, waarna dit op Stella en dán op Bella, haar suster se hond, getoets word voor enigiets verkoop word. Vir meer inligting, besoek Stella’s Dog Beauty Products op Facebook. – tanja@republikein.com.na

Honde mag ook tittewyt

Kommentaar

Republikein 2025-05-14

Meld asseblief aan om kommentaar te lewer

Honde mag ook tittewyt

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie