Hoe voel dit, Kiwi's?
Rugby
Louis de Villiers - Een van die mees dramatiese onlangse toetsreekse het Saterdag in Auckland met gedeelde louere geëindig nadat nóg die All Blacks, nóg die Britse en Ierse Leeus die uitklophou kon plant.
Die derde toets het met 15-15 gelykop geëindig en as dié spanne weer eendag kragte meet, sal feitlik al die betrokkenes reeds hul stewels opgehang het.
Suid-Afrikaners sou wrang geglimlag het nadat die Franse skeidsregter Romain Poite se vermeende droogmakery agterna allerweë onder skoot gekom het.
Poite is berug in Suid-Afrika sedert hy in 2012 'n belowende Bok-poging op die einste Eden Park met 'n verspotte rooi kaart vir Bismarck du Plessis gefnuik het. Saterdag het hy die tuisspan twee minute voor die einde 'n strafskop gegee ná onkantspel deur die Walliese haker Ken Owens, net om dit ná 'n video-kykweer in 'n skrum te verander omdat Owens nie aspris was nie.
Nieu-Seelanders was ook ontevrede met 'n geel kaart aan die All Black-flank Jerome Kaino, maar dit was allermins vergesog – Kaino was wederregtelik geniepsig. Dit het duidelik gewys onder watter druk die tuisspan dié keer was.
Die velle het uit die staanspoor gewaai en dit het aanvanklik gelyk asof die wêreldkampioen baas sou wees.
Die slotte Maro Itoje en die All Black Brodie Retallick het 'n vurige, aanskoulike tweestryd gehad en 'n mens sien uit daarna om dié twee mekaar nog 'n hele paar maal in die hare te sien vlieg.
Dit was die tuisspan wat die vinnigste uit die blokke was en hulle het ná 'n effens geïnhibeerde vertoning 'n week vroeër in Wellington, die bal met mening wyd en syd geskuif om die toerspan te uitoorlê.
Die All Black-breier, Steve Hansen, het 'n berekende risiko gewaag deur twee relatiewe groentjies (heelagter Jordie Barrett en senter Ngani Laumape) in die hoogoond te druk. Dié twee het hul insluiting met puik vertonings gevier deur beide te gaan druk.
Met die draaislag was die All Blacks 12-6 voor, maar die Leeus was nie haastig huis toe nie. Eers het Elliot Daly die vlae uit sy eie halfgebied gelig, waarna Owen Farrell sake gelyk gemaak het terwyl Kaino in die koelkas was.
Die rugby was robuus in die pylvak en, Poite of te nie, was die uitslag sekerlik regverdig – daar was min te kies tussen die spanne en die toerspan het, ná 'n wankelrige begin van hul reis, uiteindelik gewys dat die All Blacks wel onder ongemaklike druk geplaas kan word.
Hansen was agterna filosofies, maar duidelik ontevrede.
“Ons word as kinders geleer om die slegte dinge saam met die goeies te aanvaar. Dieselfde ding het in die Wêreldbeker tussen Australië en Skotland gebeur, maar dié keer het hulle die video gebruik. Dalk moes hy eers voordeel gespeel het en agterna weer gekyk het, maar daar is te veel moontlikhede in dié situasie en dit is die reëlboek se skuld, nie die skeidsregter s'n nie.
“Hul verdediging was vinnig vorentoe en daar was baie druk. Dis 'n jong agterlyn en soms gaan dinge nie uitwerk soos jy hoop nie. Ek is nietemin trots op hoe Kieran Read die plan ontleed en uitgevoer het; ons kon net nie goed genoeg afrond nie,” het Hansen gesê.
Read, wat in sy 100ste toets gespeel het, was gefrustreerd met die uitslag.
“Dis 'n hol gevoel om gelykop te speel. Niemand daag op 'n Saterdag op om dit te beleef nie. Ons wil wen. As jy na die reeks kyk, is dit beter om gelykop te speel as om te verloor.
“Ek is trots daarop dat ek 100 toetse gespeel het, maar ek sou hulle waarskynlik almal ruil om vandag te kon wen,” het die kaptein vertel.
Warren Gatland, die gebore Nieu-Seelandse afrigter van die Leeus, het gesê dat hy tog voel sy toerspan het ongeag die gelykopuitslag in die reeks iets bereik omdat hulle vooraf afgeskryf en as verloorders afgemaak was. - Netwerk24
Die derde toets het met 15-15 gelykop geëindig en as dié spanne weer eendag kragte meet, sal feitlik al die betrokkenes reeds hul stewels opgehang het.
Suid-Afrikaners sou wrang geglimlag het nadat die Franse skeidsregter Romain Poite se vermeende droogmakery agterna allerweë onder skoot gekom het.
Poite is berug in Suid-Afrika sedert hy in 2012 'n belowende Bok-poging op die einste Eden Park met 'n verspotte rooi kaart vir Bismarck du Plessis gefnuik het. Saterdag het hy die tuisspan twee minute voor die einde 'n strafskop gegee ná onkantspel deur die Walliese haker Ken Owens, net om dit ná 'n video-kykweer in 'n skrum te verander omdat Owens nie aspris was nie.
Nieu-Seelanders was ook ontevrede met 'n geel kaart aan die All Black-flank Jerome Kaino, maar dit was allermins vergesog – Kaino was wederregtelik geniepsig. Dit het duidelik gewys onder watter druk die tuisspan dié keer was.
Die velle het uit die staanspoor gewaai en dit het aanvanklik gelyk asof die wêreldkampioen baas sou wees.
Die slotte Maro Itoje en die All Black Brodie Retallick het 'n vurige, aanskoulike tweestryd gehad en 'n mens sien uit daarna om dié twee mekaar nog 'n hele paar maal in die hare te sien vlieg.
Dit was die tuisspan wat die vinnigste uit die blokke was en hulle het ná 'n effens geïnhibeerde vertoning 'n week vroeër in Wellington, die bal met mening wyd en syd geskuif om die toerspan te uitoorlê.
Die All Black-breier, Steve Hansen, het 'n berekende risiko gewaag deur twee relatiewe groentjies (heelagter Jordie Barrett en senter Ngani Laumape) in die hoogoond te druk. Dié twee het hul insluiting met puik vertonings gevier deur beide te gaan druk.
Met die draaislag was die All Blacks 12-6 voor, maar die Leeus was nie haastig huis toe nie. Eers het Elliot Daly die vlae uit sy eie halfgebied gelig, waarna Owen Farrell sake gelyk gemaak het terwyl Kaino in die koelkas was.
Die rugby was robuus in die pylvak en, Poite of te nie, was die uitslag sekerlik regverdig – daar was min te kies tussen die spanne en die toerspan het, ná 'n wankelrige begin van hul reis, uiteindelik gewys dat die All Blacks wel onder ongemaklike druk geplaas kan word.
Hansen was agterna filosofies, maar duidelik ontevrede.
“Ons word as kinders geleer om die slegte dinge saam met die goeies te aanvaar. Dieselfde ding het in die Wêreldbeker tussen Australië en Skotland gebeur, maar dié keer het hulle die video gebruik. Dalk moes hy eers voordeel gespeel het en agterna weer gekyk het, maar daar is te veel moontlikhede in dié situasie en dit is die reëlboek se skuld, nie die skeidsregter s'n nie.
“Hul verdediging was vinnig vorentoe en daar was baie druk. Dis 'n jong agterlyn en soms gaan dinge nie uitwerk soos jy hoop nie. Ek is nietemin trots op hoe Kieran Read die plan ontleed en uitgevoer het; ons kon net nie goed genoeg afrond nie,” het Hansen gesê.
Read, wat in sy 100ste toets gespeel het, was gefrustreerd met die uitslag.
“Dis 'n hol gevoel om gelykop te speel. Niemand daag op 'n Saterdag op om dit te beleef nie. Ons wil wen. As jy na die reeks kyk, is dit beter om gelykop te speel as om te verloor.
“Ek is trots daarop dat ek 100 toetse gespeel het, maar ek sou hulle waarskynlik almal ruil om vandag te kon wen,” het die kaptein vertel.
Warren Gatland, die gebore Nieu-Seelandse afrigter van die Leeus, het gesê dat hy tog voel sy toerspan het ongeag die gelykopuitslag in die reeks iets bereik omdat hulle vooraf afgeskryf en as verloorders afgemaak was. - Netwerk24
Kommentaar
Republikein
Geen kommentaar is op hierdie artikel gelaat nie