Hoe sal dit jou sak raak as Zuma gaan?
Met die uittrede van president Jacob Zuma sal die rand versterk, maar die meeste verstewiging is reeds in die wisselkoers ingeprys.
Francois Williams - Effens goedkoper petrol, jou baas wag dalk langer voordat hy jou aflê, en later selfs minder belasting.
Dis van die moontlike voordele uit pres. Jacob Zuma se uittrede volgens 'n paar ontleders.
Mike Schüssler, onafhanklike ekonoom: Die rand sal versterk, maar die meeste verstewiging van die rand in reaksie op die uittrede van Zuma is reeds in die wisselkoers ingeprys.
Die markte sal positief reageer. Dit is reeds duidelik dat mense meer energie en vertroue het, maar baie is dalk ooroptimisties dat korrupsie vinnig uitgeroei sal word.
Een swaeltjie maak nie 'n somer nie.
Baie harde werk oor 'n lang tyd wag nog op Suid-Afrika voordat die land weer in die internasionale beleggerskollig is. Dit is weens die afgradering van Suid-Afrika se skuld tot rommelstatus.
Veral internasionale beleggers is nog skepties oor Suid-Afrika en meen die regering tree nie konsekwent op nie.
Suid-Afrika het nog goeie sakeverhoudinge met Europa en China, maar in Amerika en Japan is daar nog skeptisisme oor Suid-Afrika as beleggingsbestemming.
Plaaslik is daar wel 'n meer optimistiese ingesteldheid te bespeur by sakelui, en maatskappye sal straks bereid wees om nou meer geld te bestee aan uitbreidings of minder geneig wees om werkers af te lê.
Die geldkraan vir vaste kapitaalinvestering gaan nie sommer dadelik wyd oopdraai nie. Vaste investering is 'n langtermynbesluit; mense wil ook optrede sien.
Nietemin kan die beter sakevertroue help om die ekonomie met selfs 'n ekstra een persentasiepunt te laat groei. Ons sal nie skielik 10%-groei sien nie, en dit sal makliker wees om van 1% tot 2% te groei as tot 3% of 4%.
Prof. Jannie Rossouw, hoof van die skool vir ekonomiese en sakewetenskap aan die Universiteit van die Witwatersrand: Die Zuma-administrasie plaas 'n Zuma-diskonto op die wisselkoers.
Ná die bedanking van Zuma sal die rand verder versterk van sy huidige vlakke soos reeds sedert adj.pres. Cyril Ramaphosa se verkiesing tot ANC-president gesien is.
Vertroue sal herstel en gevolglik sal beleggings en ekonomiese groei toeneem. Dit sal owerheidsinkomste verhoog, wat ruimte skep vir die regering om belastings te verlaag, wat tot 'n voorspoedsiklus kan lei.
Onder Ramaphosa sal dit vir buitelandse beleggers aantrekliker word om weer in Suid-Afrika te belê.
Die een knellende uitdaging is dat indiensneming in die staatsdiens en die regering se salarisrekening onder die Zuma-administrasie totaal handuit geruk het.
Dit het Suid-Afrika tot op die rand van 'n fiskale afgrond gebring en die Ramaphosa-administrasie sal die situasie vinnig moet omdraai deur byvoorbeeld die kabinet te verklein.
Dr. John Purchase, uitvoerende hoof van Agbiz: Die sterker rand sedert November het in groot mate reeds Zuma se uittrede verdiskonteer.
Daar is dalk nog effens ruimte vir verstewiging op kort termyn danksy sentiment, maar die fundamentele ekonomiese faktore sal dit eerder konstant hou of selfs ietwat laat verswak.
Algemene verbruikersentiment en beleggersvertroue sal verbeter en groei stimuleer, maar Suid-Afrika sit steeds met aansienlike strukturele probleme wat mettertyd aangepak moet word voordat die ekonomie weer volhoubaar teen 4% of hoër sal kan groei. Dan eers kan ons werkloosheid van 27% en ongelykheid teenwerk.
Hoe Ramaphosa die daad by die woord voeg, sal grootliks bepaal of plaaslike maatskappye weer in die ekonomie gaan belê. Die bou van veel groter vertroue tussen die regering en die sakesektor is van kritieke belang.
Buitelandse beleggers is reeds bereid om met nuwe oë na Suid-Afrika te kyk, mits daar sekere hervormings plaasvind en korrupsie beter beheer word.
Hugo Pienaar, senior ekonoom van die Universiteit Stellenbosch se Buro vir Ekonomiese Ondersoek: Die rand behoort te versterk, want dit sal die weg baan vir Ramaphosa om 'n nuwe kabinet saam te stel wat waarskynlik bekwamer mense sal hê, met 'n fokus om die ekonomie te laat groei.
Mynbou is 'n voorbeeld van 'n sektor met potensiaal as regulatoriese onsekerhede uit die weg geruim kan word. As meer bekwame ministers beleidsonsekerheid verminder, kan ons verbaas wees met die mate waartoe die private sektor meer geld in die ekonomie deur groter vaste investering kan begin terugploeg.
Prof. Johann Kirsten, direkteur van die Buro vir Ekonomiese Ondersoek: 'n Sterker rand is nie goeie nuus vir landbou-uitvoer nie, maar dit kan die styging in boere se insetkoste aan bande lê.
Ramaphosa se standpunt oor onteiening sonder vergoeding sal bly hang as politieke speelbal. Daar moet egter nog baie water in die see loop. Die ANC is bang vir die negatiewe gevolge van so 'n besluit.
'n Strategie om aandag te gee aan stedelike grond en dit wat deur tradisionele leiers bestuur word, maar waarvoor mense in landelike gebiede geen titelaktes het nie, kan 'n vinnige manier wees om die dilemma van toegang tot grond vinnig af te handel.
Maarten Ackerman, hoofekonoom en adviserende vennoot van Citadel:
Die rand kan met tot 50c teenoor die dollar versterk. Die begrotingsrede sal almal egter weer tot die realiteit wakker skud, want daar is steeds die kwessie van gratis universiteitstudie, Eskom se geldtekort en belastingverhogings wat wag. Dinge lyk nou egter beter as in Oktober met die mediumtermyn-begrotingsraamwerk.
As hoër groeiverwagtinge in die somme ingewerk word, kan die begrotingstekort en skuldvlakke beter lyk en hoop skep.
Ek verwag dus nie dat Moody's Suid-Afrika in Maart weer sal afgradeer nie.
Die groter sake- en beleggersvertroue kan daarop uitloop dat 2018 nog 'n baie goeie jaar vir Suid-Afrika kan wees. - Netwerk24
Dis van die moontlike voordele uit pres. Jacob Zuma se uittrede volgens 'n paar ontleders.
Mike Schüssler, onafhanklike ekonoom: Die rand sal versterk, maar die meeste verstewiging van die rand in reaksie op die uittrede van Zuma is reeds in die wisselkoers ingeprys.
Die markte sal positief reageer. Dit is reeds duidelik dat mense meer energie en vertroue het, maar baie is dalk ooroptimisties dat korrupsie vinnig uitgeroei sal word.
Een swaeltjie maak nie 'n somer nie.
Baie harde werk oor 'n lang tyd wag nog op Suid-Afrika voordat die land weer in die internasionale beleggerskollig is. Dit is weens die afgradering van Suid-Afrika se skuld tot rommelstatus.
Veral internasionale beleggers is nog skepties oor Suid-Afrika en meen die regering tree nie konsekwent op nie.
Suid-Afrika het nog goeie sakeverhoudinge met Europa en China, maar in Amerika en Japan is daar nog skeptisisme oor Suid-Afrika as beleggingsbestemming.
Plaaslik is daar wel 'n meer optimistiese ingesteldheid te bespeur by sakelui, en maatskappye sal straks bereid wees om nou meer geld te bestee aan uitbreidings of minder geneig wees om werkers af te lê.
Die geldkraan vir vaste kapitaalinvestering gaan nie sommer dadelik wyd oopdraai nie. Vaste investering is 'n langtermynbesluit; mense wil ook optrede sien.
Nietemin kan die beter sakevertroue help om die ekonomie met selfs 'n ekstra een persentasiepunt te laat groei. Ons sal nie skielik 10%-groei sien nie, en dit sal makliker wees om van 1% tot 2% te groei as tot 3% of 4%.
Prof. Jannie Rossouw, hoof van die skool vir ekonomiese en sakewetenskap aan die Universiteit van die Witwatersrand: Die Zuma-administrasie plaas 'n Zuma-diskonto op die wisselkoers.
Ná die bedanking van Zuma sal die rand verder versterk van sy huidige vlakke soos reeds sedert adj.pres. Cyril Ramaphosa se verkiesing tot ANC-president gesien is.
Vertroue sal herstel en gevolglik sal beleggings en ekonomiese groei toeneem. Dit sal owerheidsinkomste verhoog, wat ruimte skep vir die regering om belastings te verlaag, wat tot 'n voorspoedsiklus kan lei.
Onder Ramaphosa sal dit vir buitelandse beleggers aantrekliker word om weer in Suid-Afrika te belê.
Die een knellende uitdaging is dat indiensneming in die staatsdiens en die regering se salarisrekening onder die Zuma-administrasie totaal handuit geruk het.
Dit het Suid-Afrika tot op die rand van 'n fiskale afgrond gebring en die Ramaphosa-administrasie sal die situasie vinnig moet omdraai deur byvoorbeeld die kabinet te verklein.
Dr. John Purchase, uitvoerende hoof van Agbiz: Die sterker rand sedert November het in groot mate reeds Zuma se uittrede verdiskonteer.
Daar is dalk nog effens ruimte vir verstewiging op kort termyn danksy sentiment, maar die fundamentele ekonomiese faktore sal dit eerder konstant hou of selfs ietwat laat verswak.
Algemene verbruikersentiment en beleggersvertroue sal verbeter en groei stimuleer, maar Suid-Afrika sit steeds met aansienlike strukturele probleme wat mettertyd aangepak moet word voordat die ekonomie weer volhoubaar teen 4% of hoër sal kan groei. Dan eers kan ons werkloosheid van 27% en ongelykheid teenwerk.
Hoe Ramaphosa die daad by die woord voeg, sal grootliks bepaal of plaaslike maatskappye weer in die ekonomie gaan belê. Die bou van veel groter vertroue tussen die regering en die sakesektor is van kritieke belang.
Buitelandse beleggers is reeds bereid om met nuwe oë na Suid-Afrika te kyk, mits daar sekere hervormings plaasvind en korrupsie beter beheer word.
Hugo Pienaar, senior ekonoom van die Universiteit Stellenbosch se Buro vir Ekonomiese Ondersoek: Die rand behoort te versterk, want dit sal die weg baan vir Ramaphosa om 'n nuwe kabinet saam te stel wat waarskynlik bekwamer mense sal hê, met 'n fokus om die ekonomie te laat groei.
Mynbou is 'n voorbeeld van 'n sektor met potensiaal as regulatoriese onsekerhede uit die weg geruim kan word. As meer bekwame ministers beleidsonsekerheid verminder, kan ons verbaas wees met die mate waartoe die private sektor meer geld in die ekonomie deur groter vaste investering kan begin terugploeg.
Prof. Johann Kirsten, direkteur van die Buro vir Ekonomiese Ondersoek: 'n Sterker rand is nie goeie nuus vir landbou-uitvoer nie, maar dit kan die styging in boere se insetkoste aan bande lê.
Ramaphosa se standpunt oor onteiening sonder vergoeding sal bly hang as politieke speelbal. Daar moet egter nog baie water in die see loop. Die ANC is bang vir die negatiewe gevolge van so 'n besluit.
'n Strategie om aandag te gee aan stedelike grond en dit wat deur tradisionele leiers bestuur word, maar waarvoor mense in landelike gebiede geen titelaktes het nie, kan 'n vinnige manier wees om die dilemma van toegang tot grond vinnig af te handel.
Maarten Ackerman, hoofekonoom en adviserende vennoot van Citadel:
Die rand kan met tot 50c teenoor die dollar versterk. Die begrotingsrede sal almal egter weer tot die realiteit wakker skud, want daar is steeds die kwessie van gratis universiteitstudie, Eskom se geldtekort en belastingverhogings wat wag. Dinge lyk nou egter beter as in Oktober met die mediumtermyn-begrotingsraamwerk.
As hoër groeiverwagtinge in die somme ingewerk word, kan die begrotingstekort en skuldvlakke beter lyk en hoop skep.
Ek verwag dus nie dat Moody's Suid-Afrika in Maart weer sal afgradeer nie.
Die groter sake- en beleggersvertroue kan daarop uitloop dat 2018 nog 'n baie goeie jaar vir Suid-Afrika kan wees. - Netwerk24
Kommentaar
Republikein
Geen kommentaar is op hierdie artikel gelaat nie