Hoe lank neem dit om 'n boedel te beredder?

Wanneer ‘n kliënt my vra hoe lank dit neem om ‘n boedel te beredder, is my antwoord dat dit lank neem - on sommige gevalle twee jaar of selfs langer.

Ek besef dit is 'n ongewilde antwoord omdat almal wil hê dat dit ‘n vinnige proses moet wees, maar wees voorbereid op ‘n proses wat tyd neem.

Daar is sekere statutêre termyne wat ek eerste wil bespreek.

Binne sowat twee maande ná die datum van dood meld die beredderaar die boedel by die meester van die hoërhof aan. Ongeveer twee maande later ontvang die eksekuteur die aanstelling as eksekuteur van die meester. Die beredderaar het dan ses maande tyd vanaf daardie datum vir die uitreiking van die eksekuteursbrief om die likwidasie- en distribusierekening van die oorledene by die meester in te dien.

Nadat dit ingedien is by die meester, ondersoek die meester die rekening en daarna word toestemming aan die beredderaar gegee om die rekening te adverteer.

Die advertensie word in die Staatskoerant en ‘n nasionale koerant geplaas. Deur middel van die advertensie word die publiek in kennis gestel dat die likwidasie- en distribusierekening ter insae lê vir ‘n periode van drie weke by die meester se kantoor en by die plaaslike landdroskantoor, indien die oorledene buite Windhoek gewoon het. Binne hierdie drie weke het belanghebbendes die geleentheid om beswaar aan te teken by die meester, indien hulle besware het teen die inhoud en/of bepalings in die likwidasie- en distribusierekening.

Indien die beredderaar binne die ses maande tydperk nog nie gereed is om die likwidasie- en distribusierekening op te stel en by die meester in te dien nie, doen hy of sy aansoek by die meester vir uitsel van indiening van die rekening.

Die aansoek is ‘n formele dokument waarin die beredderaar verslag oor die status van die likwidasieproses, watter bates reeds gevorder is, hoeveel kontant reeds in die boedel is, en die redes hoekom die likwidasie- en distribusierekening nog nie ingedien kan word nie.

Behalwe vir die statutêre vereistes behels die beredderingsproses ook om die bates van die oorledene te likwideer; die belastingaspekte van die oorledene se boedel af te handel en die eise teen die boedel te hanteer.

Dit neem verbasend lank om met die banke, versekeringsmaatskappye, die aandelebeurs en beleggingsinstansies te korrespondeer ten einde kontantbates te gelde te maak.

Indien die vaste bates in die boedel in ‘n munisipale area lê waar ‘n sertifikaat deur hulle uitgereik moet word dat die geboue ooreenstem met die bouplanne, kan dit tyd neem om die sertifikaat te ontvang, veral indien die bouplanne nie ooreenstem met die geboue op die erf nie.

Ook die distribusie aspek van die boedel is tydrowend. Heel dikwels moet die erfgename ‘n ooreenkoms met mekaar bereik oor die herverdeling van bates. Ek sal die proses van herverdeling breedvoerig bespreek in een van my volgende artikels.

Indien geen besware teen die rekening ingedien is by die meester nie, gee die meester toesteming aan die beredderaar om die bates te distribeer aan die erfgename, soos per die likwidasie- en distribusierekening.

Dit kan twee tot drie maande neem om die meester se goedkeuring te ontvang vir die distribusie van die boedel se bates.

Ek persoonlik beskou die lang bereddingsproses in ‘n positiewe lig. Dit gee die erfgename voldoende tyd om te verstaan wat die stand van sake ten opsigte van die oorledene se bates en laste was en ook om die implikasies van die beredderingsproses te verstaan en deurdagte besluite te neem oor hulle erfenis.