Hittegolf wyk nóg nie

Elvira Hattingh – Die huidige hittegolf sal na verwagting vir die res van die week sy greep op Namibië en veral die Noorde volhou, terwyl enkele donderbuie tydelike verligting op plekke in die noordelike helfte van die binneland kan bring.Die Namibiese weerkantoor se hoofweervoorspeller, mnr. Richard Nashikaku, het gister aan Republikein gesê die bloedige warm weer in die Noorde sal na verwagting vandeesweek nog voortduur, met die hoogste maksimum temperature wat vir Ondangwa (41°C), Omuthiya (40°C) en Oshakati (40°C) vir vandag voorspel word.“Tans word effe koeler weer in die Suide in die ||Kharas- en Hardapstreek ervaar vanweë ‘n kouefront wat inbeweeg het, maar dié verligting is van korte duur. “Die front sal meebring dat die Suide se temperature vandag in die warm-kategorie val, waarná dit van môre af weer baie warm tot bloedig warm sal wees,” het Nashikaku gesê. Die vooruitsigte vir reën lyk steeds skraal. REëNVERSLAGIntussen het die ministerie van werke en vervoer se afdeling vir meteorologiese dienste ‘n reënverslag vir Oktober uitgereik, waarin gesê word die noordwestelike dele van die land, al langs die westelike platorand tot in die oostelike dele van die Hardapstreek het welkome, dog ook verwoestende en uitsonderlike hoë reëns in dié maand ontvang. “Ongelukkig het die groot hoeveelheid reën binne ‘n tydperk van 24 uur geval, met Outapi wat die hoogste syfer, naamlik 61 mm reën ontvang het, gevolg deur Khorixas, wat 57,7 mm ontvang het. Die plaas Ombona het 49 mm ontvang, Ncamagoro 45,3 mm, Engombe 38 mm and Onesi 37,5 mm,” het mnr. Simon Dirkse, hoof van klimaat en die databank by die Namibië Meteorologiese Diens (NMS), in die verslag geskryf.Volgens die verslag het Outapi 877% meer reën as dié dorp se normale syfer vir Oktober ontvang, met Khorixas wat ook 2 151% meer reën as normaalweg vir Oktober ontvang het.In die algemeen het die meeste weerstasies reënval tussen 21 en 26 Oktober gemeet, maar die aantal reëndae was meestal net een of twee dae. ‘n “Reëndag” is wanneer 1 mm of meer binne ‘n tydperk van 24 uur ontvang word, lui die verslag. “Hoewel die verspreiding van die reën swak was, het die Noorde meestal normaal tot bo-normale reëns vir Oktober ontvang, met enkele plekke wat min of geen reën ontvang het nie. “Gebiede oor die westelike Zambezistreek, asook die suidwestelike deel van die land, het ondernormale reëns in Oktober gehad,” het Dirkse geskryf.HITTE MAAK STAD DÓRSDie Windhoekse munisipaliteit het verlede week ‘n kennisgewing uitgereik om Windhoekers te waarsku hul waterverbruik tussen 5 en 12 November was die hoogste sedert die aanvang van die seisoen, en boonop 9,3% bó toelaatbare vlakke. “Ons verstaan die uitdagings wat met stygende temperature gepaardgaan, maar die huidige vlakke van waterverbruik is nie volhoubaar nie. Dit kan daartoe lei dat beskikbare waterbronne uitgeput word, wat tot ‘n waterkrisis en ernstige waterbeperkings vir alle verbruikers kan lei,” lui die kennisgewing. Hulle doen ‘n beroep op verbruikers om by die munisipale waterbestuurplan te hou en versoek Windhoekers om hul swembaddens te bedek, hul watermeters dop te hou om lekkasies betyds op te spoor en te herstel, en nie water te gebruik om plaveisel te was of motors met tuinslange te was nie.

Hittegolf wyk nóg nie

Kommentaar

Republikein 2026-02-04

Meld asseblief aan om kommentaar te lewer

Hittegolf wyk nóg nie

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.