Hitman behou titel, maar Naidjala staan gordel af

Andrew Poolman - Paulus (The Hitman) Moses het Saterdag (of eerder, die vroeë oggendure van Sondag) sy Afrika-liggewigtitel van die Wêreldboksorganisasie (WBO) behou toe hy sy plaasvervangende opponent, Chrispine Moliati van Malawi in die sewende ronde uitgeslaan het.Moliati het ingestem om op die laaste oomblik die plek van Benoit Makangali Vela van die Demokratiese Republiek van Kongo in te neem. Laasgenoemde is 'n onoorwonne bokser in twaalf gevegte en houer van die IBF se Afrika-titel. Vela was 'n netjies geklede toeskouer langs die bokskryt by die Ramatex-kompleks, maar weens die taalverskil (hy is net Frans magtig) en die gebruiklike vertroulikheid van sulke inligting kon geen verdere besonderhede verkry word behalwe dat hy deur 'n mediese toets verhinder is om deur die kryttoue te klim nie.Die Malawiër sou aanvanklik teen die superliggewig Jeremia Nakathila boks en was dus effens swaarder as die Namibiese voormalige wêreldkampioen liggewig.Moliati het goeie rekenskap van homself gegee voordat hy in die sewende ronde deur 'n paar goeie houe getref is wat hom vooroor op sy knieë laat neersak het. Die bokser het betyds regop gekom, maar was onvas op sy voete en daar was geen teenspraak oor skeidsregter Deon Dwarte van Suid-Afrika se beslissing om die geveg te beëindig nie.Ná die geveg het Moses, wat veral die vroeë rondes baie versigtig benader het, aan die media gesê Moliati was goeie kompetisie – al was hy 'n laat plaasvervanger.“Ek is gelukkig dat ek skermoefeninge teen Julius Indongo (huidige wêreldkampioen superliggewig) doen, want hy is linkshandig. Ek oefen ook teen Jatoorora Tjingavete wat 'n ortodokse bokser is. Ek dis dus voorbereid op enigiets.”Die Namibiër het gesê hy wou die geveg eintlik teen die vierde ronde beëindig het, maar het sy lof uitgespreek dat Moliati hom tot die sewende ronde besig gehou het.Moses se rekord staan na dese op 39 oorwinnings en drie nederlae. PRINCE ONTTROONIn die hoofvoorgeveg het Immanuel (Prince) Naidjala eenparig met punte teen Suid-Afrika se frisgeboude Siboniso Gonya (bynaam Tiger) ná hul geveg van twaalf rondes verloor.Die Namibiër het dus sy interkontinentale gordel van die WBO met 'n teleurstellende vertoning afgestaan.Naidjala het deurgaans sy hande vol gehad met die linkshandige Gonya en het in die tweede helfte van die geveg ook bloeiende snye naby beide sy oë opgedoen, met minstens een wat klaarblyklik die gevolg van 'n onbedoelde kopstamp was. Die Namibiër is in die laaste paar rondes drie keer platgeslaan – hoewel hy geprotesteer het dat hy gegly het of gestamp is.As tellinghouer het die plaaslike Timo Haikonda (113-112) die Suid-Afrikaner met net een punt laat wen, terwyl Neville Hotz (RSA) en Lazarus Nainda (Namibië) se verskille groter was (115-110 en 116-109).Die 32-jarige Naidjala het die derde nederlaag van sy loopbaan gely. Hoewel hy in 2013 in die Filippyne in 'n wêreldtitelgeveg teen Tomoki Kameda van Japan betrokke was en tot onlangs weer hoog op die WBO-ranglys was, sou sy kanse waarskynlik 'n knou gekry het om binnekort weer 'n kans teen 'n wêreldtitelhouer te kry.Sy rekord staan nou op 23 oorwinnings, drie nederlae en een gelykopuitslag.Die volledige uitslae van die aand: 1 Kapokgewik: Andreas Amupolo (A1) klop Jafet Amukwaya met 'n tegniese uitklophou in die tweede ronde.2 Superkapokgewig: Timoteus Shuulula (Remember) klop Tinashe Mutodza (Zimbabwe) met 'n uitklophou in die vierde ronde.3 Internasionale weltergewig: Ebenestus Kaangundue (Mendu) klop Charles Misanjo (Malawi) met 'n eenparige puntebeslissing oor ses rondes.4 Internasionale weltergewig: Mike Shonena klop Chikonda Makawa (Malawi) via Unanimous Decision over six rounds. 5 Internasionale weltergewig: Immanuel Mungandjela klop Limbani Masamba (Malawi) met 'n eenparige puntebeslissing oor 6 rondes.6 Internasionale superliggewig: Jeremiah Nakathila (No Respect) klop Varde Ndayambekwa (Swapo) met 'n uitklophou in die eerste ronde.7 WBO Afrika middelgewigtitel: Walter Kautondokwa (Executioner) klop Med Sebyala van Uganda met 'n tegniese uitklophou in die tiende ronde.8 WBO Afrika veergewigtitel: Sakaria Lukas (Desert Storm) klop Oscar Chauke (RSA) eenparig met punte oor 12 rondes.9 WBO Interkontinentale kapokgewigtitel: Siboniso Gonya (RSA) klop Immanuel Naidjala (Prince) eenparig met punte oor 12 rondes.10 WBO Afrika liggewigtitel: Paulus Moses (Hitman) klop Chrispine Moliati (Malawi) met 'n uitklophou in die sewende ronde.

Hitman behou titel, maar Naidjala staan gordel af

Kommentaar

Republikein 2025-11-05

Meld asseblief aan om kommentaar te lewer

Hitman behou titel, maar Naidjala staan gordel af

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.