Hirosjima: Die dag toe dood uit die lug geval het

Pres. Barack Obama het nie regstreeks om verskoning gevra vir die Hirosjima-kernbomaanval nie, maar die drukkie wat hy aan ’n oorlewende gegee het, het boekdele gespreek. Obama het met twee oorlewendes by die Hirosjima-vredesherdenkingpark in Hirosjima gepraat: Soenao Tsoeboi, die 91-jarige leier van ’n oorlewendesgroep, en Sjigeaki Mori (79), ’n historikus wat net agt jaar oud was toe die bom op 6 Augustus 1945 geval het. Obama het eerste met Tsoeboi gepraat. Hy het meer geluister as gepraat terwyl hy die bejaarde man se hand in syne gehou het. ’n Tolk het naby gestaan met Tsoeboi wat sy kierie gebruik het om sy woorde te beklemtoon.Obama het daarna met Mori gepraat en sy hand geskud. Hy het sy kop ’n oomblik lank laat sak en geknik terwyl die ouer man gepraat het. Hy het Mori ’n drukkie gegee terwyl die oorlewende gehuil het. Mori het later in ’n onderhoud gesê: “Sy hand was baie warm. Dit was ’n droom wat bewaarheid is. Ek het so gely, dus was vandag die beste dag wat deur die VSA gegee is.” Tsoeboi het aan Obama gesê die kernbomme op Hirosjima en Nagasaki was ’n tragedie vir die mensdom.“Ek het aan hom gesê dit was ons, menslike wesens, wat dit gedoen het. Ons doen nie net goeie dinge nie - ons maak kernwapens – en dus het ek gesê ek blameer nie die VSA nie.”Voor die gesprekke het Obama ’n krans gelê en in ’n toespraak besin oor die dag “toe dood uit die lug geval het”.“Ons staan hier in die middel van hierdie stad en dwing onsself om ons die oomblik voor te stel toe die bom geval het,” het hy gesê, met premier Sjinzo Abe langs hom. “Ons het ’n gedeelde verantwoordelikheid om geskiedenis in die oë te kyk en te vra wat ons anders moet doen om sulke lyding te keer,” - Netwerk24/Reuters/The Wall Street Journal

Hirosjima: Die dag toe dood uit die lug geval het

Kommentaar

Republikein 2025-06-19

Meld asseblief aan om kommentaar te lewer

Hirosjima: Die dag toe dood uit die lug geval het

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie