Himmel-broers jaag res flou
Derduisende toeskouers het die Rallycross baanresies in die Kaap aanskou.
Tielman van Lill - Die drie Himmel-broers van Tsumeb – Roland (28), Thilo (26) en Marko (24) – het geskiedenis gemaak toe hulle laas naweek die eerste Namibiërs geword het wat aan die Federation Internationale de l’Automobile (FIA) se World Rallycross-kampioenskap voor 27 000 toeskouers in Kaapstad deelgeneem het.
Thilo, wat met sy broer Roland se R2 Toyota Etios gejaag het, en Marko wat met ’n geleende VW Polo die baan gepak het, het onderskeidelik algeheel eerste (5 minute 10.723 sekondes) en derde (5 m 15.204 s) in hul klas geëindig.
Roland sou gewis ook hoër geëindig het as hy nie weens ’n tegniese fout ’n tydboete van tien sekondes gekry het wat hom tot die vyfde posisie laat terugsak het nie.
Die Himmels, wat almal deur King Price Namibië vir die deelname op die beroemde Killarney-renbaan in Milnerton geborg was, het Vrydagoggend na die Wes-Kaap vertrek waar hulle op uitnodiging in die R2N-klas aan die 12de en laaste ronde van dié opwindende wêreldreeks deelgeneem het.
Dit was die eerste keer dat die FIA een byeenkoms in Suid-Afrika aangebied het.
Benewens die internasionale hoofkompetisie is die R2N-klas spesiaal vir dié byeenkoms in Milnerton geskep, met tien inskrywings van wie sewe Suid-Afrikaners was. Motors met ’n enjinkapasiteit van 1 600 kubieke sentimeter (geen turbo) wat slegs deur sy voorwiele aangedryf word, word in die klas gebruik. Karre wat in dié afdeling val, word gereeld in die Suid-Afrikaanse tydrenkampioenskap en in Namibië in aksie gesien.
FORMAAT
Vier kwalifiserende renne van vier rondes wat ‘n “joker”-ronde insluit, word op ’n baan van 1 097 meter gejaag wat uit 40 persent grond en 60 persent teer saamgestel is. Die “joker”-ronde wat effens langer as die “normale ronde” is, kan in enige stadium deur ’n individuele jaer geneem word. Die idee hiervan is om kanse vir verbysteek te vergemaklik en die jaers se posisies kan op onverwagse tye lekker deurmekaar gekrap word.
Die ses jaers wat die beste tye tydens die kwalifikasies behaal, vorder na die finaal waar ses baanrondes (insluitend die “joker”) gejaag word.
Hoewel die Himmel-familie ervare tydrenjaers in Namibië is, was die broers aangenaam verras met die intensiteit van die kompetisie waar die deelnemers op ’n knapperige baan mekaar die stryd aansê.
“Die atmosfeer was absoluut ongelooflik met 27 000 toeskouers om die baan. Om direk met mekaar mee te ding, is ongewoon vir ons as Namibiërs wat net aan tydrenne gewoond is. Die baan wat kort en op een plek is, is só ontwerp om opwindende aksie vir die toeskouers op te dis.
“Die Motorsportvereniging van Suid-Afrika (MSA) en Killarney het ’n vyfjaarooreenkoms met die FIA geteken wat goeie dinge vir die toekoms voorspel,” sê die broers ingenome.
“Dit was ’n geweldige eer om Namibië te verteenwoordig met King Price Namibië wat dit vir ons moontlik gemaak het. Dis seker nie nodig om te sê nie, maar vir ons is dit ’n prestasie om teen ons suidelike buurland se jaers te presteer en te wys hoe kompeterend ons Namibiërs kan wees.
“Ons innige dank aan King Price, ons families en die MSA wat as gasheer die wêreldklas byeenkoms gehuisves het. Dit sal ’n uitstekende idee wees om dié sport na Namibië te bring, want bemarkingsgeleenthede vir borge is legio.
Hopelik kan ons in November 2018 weer deel van hierdie opwindende byeenkoms wees wanneer dit die Wes-Kaap besoek,” het die broers ingenome vertel.
Die FIA beplan om oor 371 dae op 24 en 25 November 2018 sy volgende World Rallycross-kampioenskap by Killarney aan te bied. Hopelik kan meer Namibiërs met die nodige borge hul man in die Kaap gaan staan. Internasionale motorsportsterre soos Peter Solberg (tweemalige World Rallycross- en tydren-wêreldkampioen) asook Sebastian Loeb (nege keer wêreldtydrenkampioen) was in die Kaap by die byeenkoms in aksie.
Thilo, wat met sy broer Roland se R2 Toyota Etios gejaag het, en Marko wat met ’n geleende VW Polo die baan gepak het, het onderskeidelik algeheel eerste (5 minute 10.723 sekondes) en derde (5 m 15.204 s) in hul klas geëindig.
Roland sou gewis ook hoër geëindig het as hy nie weens ’n tegniese fout ’n tydboete van tien sekondes gekry het wat hom tot die vyfde posisie laat terugsak het nie.
Die Himmels, wat almal deur King Price Namibië vir die deelname op die beroemde Killarney-renbaan in Milnerton geborg was, het Vrydagoggend na die Wes-Kaap vertrek waar hulle op uitnodiging in die R2N-klas aan die 12de en laaste ronde van dié opwindende wêreldreeks deelgeneem het.
Dit was die eerste keer dat die FIA een byeenkoms in Suid-Afrika aangebied het.
Benewens die internasionale hoofkompetisie is die R2N-klas spesiaal vir dié byeenkoms in Milnerton geskep, met tien inskrywings van wie sewe Suid-Afrikaners was. Motors met ’n enjinkapasiteit van 1 600 kubieke sentimeter (geen turbo) wat slegs deur sy voorwiele aangedryf word, word in die klas gebruik. Karre wat in dié afdeling val, word gereeld in die Suid-Afrikaanse tydrenkampioenskap en in Namibië in aksie gesien.
FORMAAT
Vier kwalifiserende renne van vier rondes wat ‘n “joker”-ronde insluit, word op ’n baan van 1 097 meter gejaag wat uit 40 persent grond en 60 persent teer saamgestel is. Die “joker”-ronde wat effens langer as die “normale ronde” is, kan in enige stadium deur ’n individuele jaer geneem word. Die idee hiervan is om kanse vir verbysteek te vergemaklik en die jaers se posisies kan op onverwagse tye lekker deurmekaar gekrap word.
Die ses jaers wat die beste tye tydens die kwalifikasies behaal, vorder na die finaal waar ses baanrondes (insluitend die “joker”) gejaag word.
Hoewel die Himmel-familie ervare tydrenjaers in Namibië is, was die broers aangenaam verras met die intensiteit van die kompetisie waar die deelnemers op ’n knapperige baan mekaar die stryd aansê.
“Die atmosfeer was absoluut ongelooflik met 27 000 toeskouers om die baan. Om direk met mekaar mee te ding, is ongewoon vir ons as Namibiërs wat net aan tydrenne gewoond is. Die baan wat kort en op een plek is, is só ontwerp om opwindende aksie vir die toeskouers op te dis.
“Die Motorsportvereniging van Suid-Afrika (MSA) en Killarney het ’n vyfjaarooreenkoms met die FIA geteken wat goeie dinge vir die toekoms voorspel,” sê die broers ingenome.
“Dit was ’n geweldige eer om Namibië te verteenwoordig met King Price Namibië wat dit vir ons moontlik gemaak het. Dis seker nie nodig om te sê nie, maar vir ons is dit ’n prestasie om teen ons suidelike buurland se jaers te presteer en te wys hoe kompeterend ons Namibiërs kan wees.
“Ons innige dank aan King Price, ons families en die MSA wat as gasheer die wêreldklas byeenkoms gehuisves het. Dit sal ’n uitstekende idee wees om dié sport na Namibië te bring, want bemarkingsgeleenthede vir borge is legio.
Hopelik kan ons in November 2018 weer deel van hierdie opwindende byeenkoms wees wanneer dit die Wes-Kaap besoek,” het die broers ingenome vertel.
Die FIA beplan om oor 371 dae op 24 en 25 November 2018 sy volgende World Rallycross-kampioenskap by Killarney aan te bied. Hopelik kan meer Namibiërs met die nodige borge hul man in die Kaap gaan staan. Internasionale motorsportsterre soos Peter Solberg (tweemalige World Rallycross- en tydren-wêreldkampioen) asook Sebastian Loeb (nege keer wêreldtydrenkampioen) was in die Kaap by die byeenkoms in aksie.
Kommentaar
Republikein
Geen kommentaar is op hierdie artikel gelaat nie