Hier is die wêreld se 10 besigste lughawens

Hanlie Stadler – Elke dag van die jaar vlieg gemiddeld 22,7 miljoen mense êrens in die wêreld van die een lughawe na ’n ander.Die wêreld se lughawens het in 2017 nagenoeg 8,3 miljard passasiers, vrag van 119 miljoen ton en 96 miljoen vlugte behartig.Atlanta-Hartsfield-Jackson was die sewende jaar agtereenvolgens die besigste lughawe vir passasiers ter wêreld. ’n Verstommende 104 miljoen mense het in die jaar deur dié lughawe beweeg, ’n gemiddelde van byna 285 000 mense elke liewe dag.Die inligting is uitgereik deur die bedryfsliggaam die Airports Council International (ACI) World in sy 2018-verslag oor wêreldwye lugverkeer.Die tweede besigste lughawe ter wêreld was Beijing Capital (96 miljoen passasiers) en dan Dubai (88 miljoen).Geen Suid-Afrikaanse lughawe is op die lys van 20 grootste lughawens volgens passasiersverkeer nie, en ook nie ’n lughawe elders in Afrika nie.Dubai, waar baie mense uit Suid-Afrika stop op pad na Europa of Asië, is die besigste lughawe wat internasionale reise betref.Atlanta-Hartsfield-Jackson is ’n intreepunt vir baie mense wat die VSA besoek, maar is ook ’n deurgangspunt vir die meeste Amerikaners wat in hul eie land reis. Volgens CNN is 80% van die Amerikaanse bevolking van 300 miljoen mense binne ’n vlug van twee uur van Atlanta af.Dis dalk die laaste jaar dat Atlanta die grootste lughawe ter wêreld is. Die lughawe se getal passasiers het in 2017 met 0,3% gedaal, terwyl Beijing s’n met 1,5% gegroei het.Luidens die verslag bly lugverkeer robuus, selfs ondanks handelsoorloë en geopolitieke spanning in dele van die wêreld. Angela Gittens, direkteur-generaal van ACI World, sê wel proteksionisme het die potensiaal om wêreldhandel en lugverkeer skade te berokken.· Wêreldwyd het die getal passasiers in 2017 met 7,5% toegeneem, een van die vinnigste groeikoerse tot nog toe.· Vragverkeer het ook rekordgroei van 7,7% aangeteken.· Die getal vlugte het met 3% gestyg, die hoogste groeikoers sedert 2004.Passasiersverkeer styg baie vinniger in ontluikende lande. Dit het in gevorderde ekonomieë met 5,2% gestyg en in ontluikende lande met 10,3%. ACI World verwag dat ontluikende lande sal aanhou om vinnig te groei.Luidens die verslag is die middelpunt van lugverkeer besig om oos te skuif. Uit die 30 lughawens wat die vinnigste groei, is 16 in net twee lande geleë – China en Indië.Syfers van meer as 2 500 lughawens in 175 lande is in die verslag gebruik.Die 30 besigste lughawens het in 2017 byna 2 miljard passasiers behartig, 24% van die wêreldwye passasiersverkeer.VragverkeerHongkong, ’n groot uitvoer-invoer-spilpunt, was die besigste lughawe vir vragverkeer. Die lughawe het in 2017 5 miljoen ton vrag behartig, 9,4% meer as in 2016.Memphis is tweede (4,3 miljoen ton) en Sjanghai derde (3,8 miljoen ton).Die tien lughawens wat in 2017 die meeste passasiers behartig het· 1. Atlanta-Hartsfield-Jackson, VSA – 104 miljoen· 2. Beijing Capital, China – 96 miljoen· 3. Dubai, Verenigde Arabiese Emirate – 88 miljoen· 4. Tokio Haneda, Japan – 85 miljoen· 5. Los Angeles, VSA – 84,6 miljoen· 6. O’Hare, Chicago, VSA – 80 miljoen· 7. Heathrow, Londen, Brittanje – 78 miljoen· 8. Hongkong, China – 73 miljoen· 9. Pudong, Sjanghai, China – 70 miljoen· 10. Charles de Gaulle, Parys, Frankryk – 69 miljoen – Netwerk24

Hier is die wêreld se 10 besigste lughawens

Kommentaar

Republikein 2026-02-03

Meld asseblief aan om kommentaar te lewer

Hier is die wêreld se 10 besigste lughawens

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.