Hier is die redes vir Moody’s se kommer

Elvira Wood Die kredietgraderingsagentskap Moody’s voorspel Suid-Afrika gaan sukkel om sy skuld te delg, veral as daar ’n onverwagse ekonomiese skok is.Fiskale risiko weens skuld wat vinnig toeneem word verder vererger omdat die land aanhou om staatswaarborge aan maatskappye in staatsbeheer te gee.Moody’s wys daarop meer as helfte van hierdie waarborge is aan Eskom toegeken.Netwerk24 het Maandag berig Moody’s het gesê Suid-Afrika se huidige mediumtermynbegrotingsraamwerk (MTBR) is die eerste fiskale beleidsdokument die afgelope paar jaar wat nie fiskale konsolidasie as doelwit het nie.Fiskale konsolidasie is maatstawwe om staatskuld in verhouding tot die BBP te stabiliseer en die tekort op die lopende rekening kleiner te maak, lui die definisie in die MTBR."Indien die regering nie ’n geloofwaardige fiskale konsolidasieplan in sy begroting in Februarie 2018 uiteensit nie, is daar die risiko dat die land nie sy skuld sal kan delg nie," het Moody's gesê. “Met 'n laer inkomste as wat voorheen voorsien is, sal 'n aanpassing in terme van uitgawes gemaak moet word. Dit sal in aanloop tot die verkiesing van 2019 ’n moeilike doelwit wees om te bereik.”Moody’s sê verder Malusi Gigaba, minister van finansies, se MTBR van 25 Oktober is baie krediet-negatief.Die MTBR het ’n beduidende afname in fiskale inkomste vir die 2017-boekjaar getoon. Dit is die grootste daling sedert 2009 en die verwagte tekort van 4,3% is beduidend meer as die 3,4% wat in die begroting van Februarie 2017 verwag is.Die MTBR verwag ook die begrotingstekort sal vir die volgende drie fiskale jare ongeveer 3,9% van die bruto binnelandse produk bly.“Met die skuldvlak van die land wat daarmee saam na verwagting teen gemiddeld 7% per jaar tot 2020 gaan styg, gaan dit al hoe duurder word om die skuld te delg. Die gebrek aan fiskale konsolidasie rakende fiskale tekorte en met hoeveel ingeperk moet word om op skuld te bestee, is krediet-negatief,” sê Moody’s.“Die gebrek aan fiskale konsolidasie is ook ’n terugslag vir sakevertroue en groei, wat reeds lamlendig is. Die gebrek aan fiskale omsigtigheid in die MTBR sal enige ekonomiese groei ondermyn,” waarsku hy.Moody’s gradeer Suid-Afrika tans as Baa3 met ’n negatiewe vooruitsig. Dit is steeds op beleggingsgraad, maar net een vlak bo rommelstatus.Fitch Ratings het die dag nadat die MTBR gelewer is, gesê hy is teleurgesteld in Gigaba se planne.Fitch het reeds Suid-Afrika se kredietstatus in rand sowel as buitelandse geldeenhede tot rommel verlaag.Dié gradeerder het ook sy kommer uitgespreek omdat daar verder wegbeweeg word van fiskale konsolidasie.“Dit blyk die verwagte rigtingverandering in terme van fiskale konsolidasie ná die kabinetskommeling in Maart het begin.“Dit is vinniger as wat ons verwag het.” – Netwerk24

Hier is die redes vir Moody’s se kommer

Kommentaar

Republikein 2026-02-04

Meld asseblief aan om kommentaar te lewer

Hier is die redes vir Moody’s se kommer

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.