Het Stormers ruggraat vir dié toets?

Stephen Nell – Die laaste plek waar ’n rugbyspan met sy rug teen die muur ’n karaktertoets wil gaan skryf, is in Kimberley.Maar dalk is Saterdag se Superrugby Unlocked-wedstryd teen Griekwas in Kimberley presies wat die Stormers nodig het ná hul loesing van 6-39 teen die Bulle op Loftus.Dis op ’n harde veld teen ’n onbesonge span wat bloed ruik, waar die koring van die kaf geskei word.Gaaf, Griekwas het die afgelope Vrydag ’n 60-tal teen die Leeus afgestaan, maar almal weet dat die Poubloues ’n gedaanteverwisseling op hul tuisveld ondergaan.Wat die Stormers betref, kan Saterdag se wedstryd baie onthullend wees. Die vraag is eenvoudig of die Kapenaars hulself gaan regruk ná die nederlaag in Pretoria en of die wiele heeltemal gaan afkom.John Dobson, hul afrigter, het ook baie om oor na te dink.Uiteraard sal daar weer gepraat word oor die losskakel-posisie, waar Damian Willemse nie na wens vertoon nie. Die lig word egter te veel op hom geskyn.Die Stormers-agterlyn se spel was voor die opskorting van die reeks flou en niks het sedertdien verander nie.Aan die een kant kan ’n mens die spelers daarvoor blameer, maar die feit is dat die gebrek aan ’n vonk op die aanval iets is waarvoor die afrigters ook verantwoordelikheid moet aanvaar.Dieselfde geld die treurmare op die verdediging. Selde was dit al só maklik om deur ’n Stormers-span se linie te kom. As verdediging regtig die area van die spel is waar jy sien hoeveel spelers vir mekaar omgee, kan die Stormers se spangees nie watwonders wees nie.Dit sal ook verregaande wees om die veelbesproke probleme in die Westelike Provinsie Rugbyunie (WPRU) se raadsale as ’n verskoning te gebruik vir die span se geploeter.Inteendeel, die WPRU het ver uit sy pad gegaan om die nodige sekuriteit te verskaf sodat topspelers in die Kaap kon bly.As die wedstryd teen die Bulle iets oor die Stormers gewys het, is dit tot watter mate jy hul tande trek wanneer jy ’n teenvoeter vir hul skrumkrag het.’n Wedstryd word nie deur ’n voorry alleen gewen nie.Of Dobson noemenswaardige veranderinge kan maak wat ’n onmiddellike kuur sal wees vir die gebrek aan idees op die aanval en traagheid in verdediging, is te betwyfel.Die meeste van die afgelope naweek se sondaars gaan in die span bly. Hulle gaan vandeesweek oor vergifnis praat, maar moet dit met hul dade gaan verdien.Dan is daar ook die kwessie van selfrespek. Geen Stormers-ondersteuner behoort te ontken dat die Bulle briljant was en hul oorwinning op Loftus verdien het nie.Maar die Stormers is nie só swak soos hulle Saterdag gewys het nie.Tussen die vier lyne tel reputasie egter vir niks nie en nêrens is daardie waarheid meer sigbaar as in Kimberley nie. Dis daar waar ’n speler se ruggraat getoets word.Daarom kan hierdie ’n bepalende week in die Stormers se veldtog wees. – Netwerk24FOTO’SDie Stormers se verdedigers het nie ’n antwoord gehad op blitse soos Kurt-Lee Arendse in die afgelope naweek se nederlaag teen die Bulle in Pretoria nie. Foto Gallo ImagesDie skrums is vir die Stormers ’n gemaksone, maar hulle kon nie die afgelope naweek teen die Bulle op Loftus daarop terugval nie. Foto Gallo Images

Het Stormers ruggraat vir dié toets?

Kommentaar

Republikein 2025-06-25

Meld asseblief aan om kommentaar te lewer

Het Stormers ruggraat vir dié toets?

Kommentaar

Republikein 2025-06-25

Meld asseblief aan om kommentaar te lewer

MELD AAN

Advertensie