Herverkiesings
Die hof het Vrydag beslis die Verkiesingskommissie van Namibië moet die kostes van partye en onafhanklike kandidate dek.
Kristien Kruger
Die verkiesings in sekere dorpe in die Suide is ongeldig en kiesers sal dus wéér stembus toe moet gaan.
Die Windhoekse hoërhof het Vrydag dié uitspraak in die Verkiesingskommissie van Namibië (ECN) se dringende aansoek gelewer.
Regters Herman Oosthuizen, Orben Sibeya en Shafimana Ueitele het beslis dat 25 November se verkiesings op Aroab, Koës en Stampriet, asook die Mariental landelike-kiesafdeling ongeldig is.
Die hof het verder beslis dat die ECN 'n bedrag aan die betrokke partye en onafhanklike kandidate moet betaal vir die kostes wat hulle weens die herhaling van die verkiesings sal moet aangaan: N$50 000 vir die herverkiesing van streekrade, asook N$25 000 vir die herverkiesing van plaaslike owerhede.
Die Landless People's Movement (LPM) en onafhanklike kandidaat, me. Deensia Swartbooi, se teenaansoek is van die hand gewys.
Die hof se uitspraak is daarop gebaseer dat die verkiesings in November in die betrokke kiesafdelings nie regverdig en geloofwaardig was nie en elke kieser kon nie hul reg om te stem uitoefen nie weens kiesfoute deur die ECN se personeel.
KOSTES
Die regters het Vrydag die kwessie van die partye en onafhanklike kandidate se kostes om weer in 'n verkiesing deel te neem, in oënskou geneem.
Volgens die ECN se regsverteenwoordiger is dit nie die ECN se verantwoordelikheid om dié kostes te dek nie. Volgens Oosthuizen kan die ECN nie skotvry daarvan afkom nie aangesien hulle die rede is hoekom die herverkiesings plaasvind.
“Ja, die ECN het hul foute erken en probeer om dit reg te stel. Hulle is nou hier en erken dat hulle ernstige foute begaan het, maar hulle kan nie nou eenvoudig een kant toe wil staan nie.
“Hulle moet aanspreeklik gehou word,” het Oosthuizen gesê.
“Hoe is dit regverdig om van die partye en kandidate te verwag om weer daardie kostes aan te gaan?” het Ueitele gevra.
“Dit is 'n les aan die ECN om seker te maak voldoende opleiding word verskaf en dat sulke foute nie weer gebeur nie,” het Sibeya gesê.
In 'n verklaring ná die verkiesings deur die ECN se hoofkiesbeampte, mnr. Theo Mujoro, is die verkiesings op Aroab en Koës gepootjie deur die verkeerde versending, vanaf die sentrale logistieke stoor in Windhoek na die twee ||Kharas-dorpies, van stembriewe bedoel vir Keetmanshoop se plaaslike owerheidsverkiesing.
Die voorsittende beampte op Aroab het verder, op die oggend van stemdag, met die oopmaak van die staalhouer met die plaaslike owerheidstembriewe binne, opgemerk dat die kenmerkende nommers nie ooreenstem met sy stemlokaal se nommer nie.
Hy het verkeerdelik besluit om die inhoud nie te gebruik nie, eerder as om die verkiesingsbeampte te vra, wat die korrektheid van die stembriewe sou kon bevestig, volgens Mujoro.
Toe die eerste twee kiesers uit die sowat 80 wat teen openingstyd reeds daar gewag het, nie deur die kieserverifikasietoestel herken is nie, ondanks hul geldige stemkaarte, het die beampte nie die regte prosedure gevolg nie en gefokus op die registrasie van kiesernommers eerder as die korrekte rekordhouding van die voltooide stembriefnommers, volgens die hoofkiesbeampte.
KOëS EN STAMPRIET
Op Koës het die voorsittende beampte ook die verkeerde stembriewe uitgedeel en is op stemdag tussen 14:00 en 15:00 opdrag gegee om die hele stemproses by die dorp se gemeenskapsentrum onmiddellik te staak.
Stampriet se geval was nog meer problematies, omdat die voorsittende beampte vir Glencoin en Kalahari Proefplaas nie net verkeerde plaaslike owerheidstembriewe eerder as streekraadstembriewe gebruik het nie, maar ook die Glencoin-stempunt voortydig gesluit het.
STREEKRADE
Die ECN het 'n aparte dringende aansoek ingedien vir die verkeerdelike aanwysing van setels in die streekrade van Otavi, Katima Mulilo en Okakarara.
Die hof het Vrydag beslis dat regstellings in hierdie kiesafdelings gemaak moet word.
- [email protected]
Die verkiesings in sekere dorpe in die Suide is ongeldig en kiesers sal dus wéér stembus toe moet gaan.
Die Windhoekse hoërhof het Vrydag dié uitspraak in die Verkiesingskommissie van Namibië (ECN) se dringende aansoek gelewer.
Regters Herman Oosthuizen, Orben Sibeya en Shafimana Ueitele het beslis dat 25 November se verkiesings op Aroab, Koës en Stampriet, asook die Mariental landelike-kiesafdeling ongeldig is.
Die hof het verder beslis dat die ECN 'n bedrag aan die betrokke partye en onafhanklike kandidate moet betaal vir die kostes wat hulle weens die herhaling van die verkiesings sal moet aangaan: N$50 000 vir die herverkiesing van streekrade, asook N$25 000 vir die herverkiesing van plaaslike owerhede.
Die Landless People's Movement (LPM) en onafhanklike kandidaat, me. Deensia Swartbooi, se teenaansoek is van die hand gewys.
Die hof se uitspraak is daarop gebaseer dat die verkiesings in November in die betrokke kiesafdelings nie regverdig en geloofwaardig was nie en elke kieser kon nie hul reg om te stem uitoefen nie weens kiesfoute deur die ECN se personeel.
KOSTES
Die regters het Vrydag die kwessie van die partye en onafhanklike kandidate se kostes om weer in 'n verkiesing deel te neem, in oënskou geneem.
Volgens die ECN se regsverteenwoordiger is dit nie die ECN se verantwoordelikheid om dié kostes te dek nie. Volgens Oosthuizen kan die ECN nie skotvry daarvan afkom nie aangesien hulle die rede is hoekom die herverkiesings plaasvind.
“Ja, die ECN het hul foute erken en probeer om dit reg te stel. Hulle is nou hier en erken dat hulle ernstige foute begaan het, maar hulle kan nie nou eenvoudig een kant toe wil staan nie.
“Hulle moet aanspreeklik gehou word,” het Oosthuizen gesê.
“Hoe is dit regverdig om van die partye en kandidate te verwag om weer daardie kostes aan te gaan?” het Ueitele gevra.
“Dit is 'n les aan die ECN om seker te maak voldoende opleiding word verskaf en dat sulke foute nie weer gebeur nie,” het Sibeya gesê.
In 'n verklaring ná die verkiesings deur die ECN se hoofkiesbeampte, mnr. Theo Mujoro, is die verkiesings op Aroab en Koës gepootjie deur die verkeerde versending, vanaf die sentrale logistieke stoor in Windhoek na die twee ||Kharas-dorpies, van stembriewe bedoel vir Keetmanshoop se plaaslike owerheidsverkiesing.
Die voorsittende beampte op Aroab het verder, op die oggend van stemdag, met die oopmaak van die staalhouer met die plaaslike owerheidstembriewe binne, opgemerk dat die kenmerkende nommers nie ooreenstem met sy stemlokaal se nommer nie.
Hy het verkeerdelik besluit om die inhoud nie te gebruik nie, eerder as om die verkiesingsbeampte te vra, wat die korrektheid van die stembriewe sou kon bevestig, volgens Mujoro.
Toe die eerste twee kiesers uit die sowat 80 wat teen openingstyd reeds daar gewag het, nie deur die kieserverifikasietoestel herken is nie, ondanks hul geldige stemkaarte, het die beampte nie die regte prosedure gevolg nie en gefokus op die registrasie van kiesernommers eerder as die korrekte rekordhouding van die voltooide stembriefnommers, volgens die hoofkiesbeampte.
KOëS EN STAMPRIET
Op Koës het die voorsittende beampte ook die verkeerde stembriewe uitgedeel en is op stemdag tussen 14:00 en 15:00 opdrag gegee om die hele stemproses by die dorp se gemeenskapsentrum onmiddellik te staak.
Stampriet se geval was nog meer problematies, omdat die voorsittende beampte vir Glencoin en Kalahari Proefplaas nie net verkeerde plaaslike owerheidstembriewe eerder as streekraadstembriewe gebruik het nie, maar ook die Glencoin-stempunt voortydig gesluit het.
STREEKRADE
Die ECN het 'n aparte dringende aansoek ingedien vir die verkeerdelike aanwysing van setels in die streekrade van Otavi, Katima Mulilo en Okakarara.
Die hof het Vrydag beslis dat regstellings in hierdie kiesafdelings gemaak moet word.
- [email protected]
Kommentaar
Republikein
Geen kommentaar is op hierdie artikel gelaat nie