Hentiesbaai vol, voller, volste

Des Erasmus - Buurdorpe van en oorde om Hentiesbaai help nou met huisvesting vir ’n geweldige toeloop van mense wat Vrydag en Saterdag vir die groot fees verwag word. Alles dui op ’n verdubbeling en selfs meer op verlede jaar, het Leon Krauze, ondervoorsitter van die Toerismevereniging, in ’n vooruitskouing gesê. Op die gebied van huisvesting hou eiendomsmakelaars by hul storie van die afgelope dae dat die dorp vol is. Selfs spaarkamers in Hentiesbaaiers se huise is aan naweekgangers verhuur. By oorde en plekke soos die Cape Cross Lodge en die Fisherman’s Inn noord van Hentiesbaai en die kampeergebiede van Myl 72 en Myl 108 word van die oorloop van die besoekerstroom verwag. Soortgelyke bystand word suid van Hentiesbaai deur die konsessiehouers van Jakkalsputz en Myl 14 gegee.Ook op Swakopmund is huisvesting bespreek deur mense wat vir die fees kus toe wil kom. Die Hentiesfees is vanjaar ’n dubbeldoor van die jaarlikse hengelfees en die groot makietie wat volg nadat die betaalkanaal van TV se kykNETprogramKwêla ná ’n stemmery per SMS Hentiesbaai as Suider-Afrika se dorp van die jaar aangewys het. Op die twee feesdae sluit die feesprogram in die hooftent relatief vroeg. Volgens Krauze gee dit aan feesgangers van buite Hentiesbaai tyd om huis toe te gaan. Die groot gekuier skuif dan in die aande oor na die dorp se restaurante en kuierplekke waar van die verhoogkunstenaars van die Hentiesfees gaan optree.Oor die roetes na die fees het Krauze gewaarsku van ’n omweg van sowat 20 km tussen Swakopmund en Hentiesbaai waar konstruksiespanne met ’n padbouery besig is. Spesiale veiligheidsmaatreëls is op dié plekke deur die feeskomitee in samewerking met die padbouers getref. Dieselfde maatreëls sal geld waar die roete van die fietsryers van Swakopmund en Wlotzkasbaken die bestaande kusweg kruis.Krauze het gesê die feestentruimte is byna verdubbel om sitplekke aan vierduisend en meer mense te bied. Hy skat dat nog sowat ’n duisend mense om die feestent sal staan en beweeg. Op dié gebied help ’n vasbytbyeenkoms in die bedding van die Omarururivier en ’n perdesportbyeenkoms aan die buitewyke van die dorp om ’n deel van die toeloop ’n bietjie weg van die feestent te stuur. Oor die kunstenaars wat in die feestent gaan optree, heers die grootste belangstelling in Bobby van Jaarsveld en Emo Adams van Suid-Afrika en Namibië se eie George Longane.Geweldige belangstelling heers vir die hengelkompetisie waar die hengelaar met die kampioenvis met N$20 000 beloon gaan word. Die gesamentlike prysgeld vir al die kategorieë van die hengelkompetisie het ook die hoogte ingeskiet. Meer as ’n duisend hengelaars word verwag met kaartjieverkope tot dusver wat reeds die druk van bykomende boekies met kaartjies veroorsaak het.Vistermanne stel hulle ook vroegtydig in op die getye van die dag van die kompetisie wat ligdag gaan begin en ’n skaal wat om 16:00 in die feestent gaan sluit. Saterdag se getye is om 03:28 laagwater, 09:54 hoogwater en om 16:01 weer laagwater wanneer die skaal sluit.Aanvanklik het organiseerders vir net tagtig kraampies beplan en die nodige staanplekke geskep. Tien dae voor die fees was daar reeds meer as ’n honderd uitstallers met ondernemers van kleinsake en tuisbedrywe wat nie nee vir ’n antwoord aanvaar nie.

Hentiesbaai vol, voller, volste

Kommentaar

Republikein 2025-06-09

Meld asseblief aan om kommentaar te lewer

Hentiesbaai vol, voller, volste

Kommentaar

Republikein 2025-06-09

Meld asseblief aan om kommentaar te lewer

MELD AAN

Advertensie