Hengel van die hoek af
Des Erasmus - Die vistermanne kan ontspan.
Dit lyk of die verouderde, maar nou weer bestaande viswet van 2002 onveranderd gaan bly. Selfs al sou wysigings aan die begin van 2018 intree, hoef drakoniese verhogings in hengellisensiegelde nie gevrees te word nie.
Dit lyk of hengelaars van die hoek gaan loskom nadat die eerste van ‘n reeks raadplegende vergaderings tussen die ministerie en Jan Alleman gister op Hentiesbaai gehou is. Dit het gevolg op ‘n ontploffing in openbare verset met ‘n aankondiging in die Staatskoerant dat hengelpermitte vanaf 1 Augustus vanjaar N$1 500 per maand gaan kos teenoor die vorige N$14 vir so ‘n tydperk. Vir hengelaars sou dit ‘n uitgawe van N$18 000 per jaar meebring om ‘n vissie te gaan vang.
Só hewig was die openbare verset dat die wetswysiging binne 12 dae ná die proklamasie daarvan herroep is. In daardie stadium was ‘n oorweging selfs om die Hentiesfees teen die einde van Augustus af te las as gevolg van die wysigings aan die viswet.
Soortgelyke opvolgvergaderings sal waarskynlik nog in September op Swakopmund, in Windhoek en op Lüderitz gehou word.
Op Hentiesbaai was daar gister algemene waardering toe die minister van visserye en mariene hulpbronne, mnr. Bernard Esau, persoonlik in die gemeenskapsaal opgedaag het. Hy was bygestaan deur senior amptenare. In die gehoor van sowat 150 belanghebbendes was verteenwoordigers van die munisipaliteit, die toerismevereniging van Hentiesbaai en die Namibiese Hengelunie.
Die standpunte van die hengelunie en die toerismevereniging teen die wetswysiging was reeds vroeër aan die ministerie deurgegee.
Op gister se vergadering het die oorsprong van die omstrede wetswysiging van N$1 500 per maand duidelik geword. Dit was blykbaar gegrond op die N$450 000 per maand wat die inspektoraat en verwante dienste die land kos. Om die N$450 000 te genereer, was die gewraakte verhoogde lisensiegelde van N$1 500 per maand geproklameer en toe weer herroep.
Van die belanghebbendes in hengel en toerisme was dit gister eens dat die N$450 000 per maand langs ander weë verhaal moet word met ‘n algemene gevoel dat boetes vir oortredings van die viswet die hoogte moet inskiet. Die instansies is selfs bereid om die inspektoraat by te staan om sodanige oortreders aan die pen te laat ry.
Dit lyk of die verouderde, maar nou weer bestaande viswet van 2002 onveranderd gaan bly. Selfs al sou wysigings aan die begin van 2018 intree, hoef drakoniese verhogings in hengellisensiegelde nie gevrees te word nie.
Dit lyk of hengelaars van die hoek gaan loskom nadat die eerste van ‘n reeks raadplegende vergaderings tussen die ministerie en Jan Alleman gister op Hentiesbaai gehou is. Dit het gevolg op ‘n ontploffing in openbare verset met ‘n aankondiging in die Staatskoerant dat hengelpermitte vanaf 1 Augustus vanjaar N$1 500 per maand gaan kos teenoor die vorige N$14 vir so ‘n tydperk. Vir hengelaars sou dit ‘n uitgawe van N$18 000 per jaar meebring om ‘n vissie te gaan vang.
Só hewig was die openbare verset dat die wetswysiging binne 12 dae ná die proklamasie daarvan herroep is. In daardie stadium was ‘n oorweging selfs om die Hentiesfees teen die einde van Augustus af te las as gevolg van die wysigings aan die viswet.
Soortgelyke opvolgvergaderings sal waarskynlik nog in September op Swakopmund, in Windhoek en op Lüderitz gehou word.
Op Hentiesbaai was daar gister algemene waardering toe die minister van visserye en mariene hulpbronne, mnr. Bernard Esau, persoonlik in die gemeenskapsaal opgedaag het. Hy was bygestaan deur senior amptenare. In die gehoor van sowat 150 belanghebbendes was verteenwoordigers van die munisipaliteit, die toerismevereniging van Hentiesbaai en die Namibiese Hengelunie.
Die standpunte van die hengelunie en die toerismevereniging teen die wetswysiging was reeds vroeër aan die ministerie deurgegee.
Op gister se vergadering het die oorsprong van die omstrede wetswysiging van N$1 500 per maand duidelik geword. Dit was blykbaar gegrond op die N$450 000 per maand wat die inspektoraat en verwante dienste die land kos. Om die N$450 000 te genereer, was die gewraakte verhoogde lisensiegelde van N$1 500 per maand geproklameer en toe weer herroep.
Van die belanghebbendes in hengel en toerisme was dit gister eens dat die N$450 000 per maand langs ander weë verhaal moet word met ‘n algemene gevoel dat boetes vir oortredings van die viswet die hoogte moet inskiet. Die instansies is selfs bereid om die inspektoraat by te staan om sodanige oortreders aan die pen te laat ry.
Kommentaar
Republikein
Geen kommentaar is op hierdie artikel gelaat nie