Hengel- en internet-trolle

Tielman van Lill – Dit is raar, maar waar. Sosiale mediagebruikers is elke dag demokraties en vrywillig verplig om dié medium vir een of ander duistere en sinistere rede in te span. Veral Facebook. Dit op sigself is geen maklike taak nie, want 'n nuwe tipe struikrower sit en wag deesdae in die veiligheid van haar of sy skuiling vir die regte oomblik om al sluipend uit die duister van die web met mag en mening op hul onskuldige slagoffer toe te slaan.Wel, 'n sekere rare spesie wat sedert die internet se ontstaan sy verskyning gemaak het, kan mens seker maar 'n E-trol doop, of wat seg ek nou? Dié helde en heldinne van die kuberruim is die moderne struikrowers van ons tyd wat soos magtige “lords” hul pionne behendig rondskuif terwyl die koningin al trippelend sukkel om haar piepie vir 'n belangrike vonkpos te knyp.Die witjasse met dik brille kan moontlik dié spesie as die Giant Trollosboid (monophyletic E-Vampierrella) in hul wetenskapboeke verewig, maar die gevaarlike spesie kan moontlik ook as Mastigatrolla Balamuthi (vrylewend op die internet) geklassifiseer word.Ja-ja, ek weet. Daar is diegene wat nie die kwaad of verkeerd daarin sal sien dat 'n wildvreemde siel 'n ander onbekende gebruiker op 'n sosiale-mediaplatform verbaal aanval nie. Wel, as so 'n mens nie fout met dié probleem kan sien nie, is hy of sy beslis deel van die probleem. Dan is daar die slimmes wat ander op hul spelfoute wys. Gaan kyk maar op hul plasings hoe dit lyk. 'n Laerskoolkind sal beter vaar...Die komediant Schalk Bezuidenhout bekla nou die dag sy lot op die kassie oorlat mense op sosiale media ander gebruikers vloek en die allervreeslikste dinge toevoeg sonder dat die ontvanger daarvoor gevra het. (Kan 'n mens nog van 'n kassie praat? Die ding is deesdae platter as 'n joernalis se beursie op 1 Januarie).Facebook, enige ander sosiale platform asook Netwerk24 se webberigte is plekke waar gebelgde E-trol-vegters binne sekondes 'n gewelddadige aanval op sy 'kompie' se sleutelbord kan loods. Wat ook al jy verkeerd mog gesê het, is nie ter sprake nie, wel dat die Giant Trollosboid genoeg rede het om sy weerlose slagoffer verbaal met vele spelfoute en onbeholpe sinsbou sonder kommas en ander leestekens te kasty.In my verbeelding sien ek so 'n briesende E-trol in aksie. 'n Paar bloedbelope oë staar hatig na die kompie se skerm terwyl bultende slagare in die nek plek-plek dreig om oop te bars. Die intense druk in die koronêre sisteem is hoog genoeg om 'n trekker se tyre op te pomp, terwyl die Monophyletic E-Vampierrella se hart teen 'n geweldige tempo in die rigting van 'n massiewe miokardiale infarksie versnel.Die salpeter sit reeds wit gedroog teen die voorkop en slape, terwyl vingers met wit geklemde kneukels woedend die toetsbord soos 'n saldo uit 'n outomatiese aanvalswapen tref. Behalwe dat 'n hartaanval soos 'n dief in die nag nadersluip, is die situasie vinnig besig om in 'n koronêr te verander wat sy lading cholesterol kilogram vir kilogram uit sy aorta skeur om onverhoeds 'n trombus te vorm.Ek raak glads benoud vir die aanvaller en familie se part om te dink sy hart se elektronika kan beskadig word wat sy hartritme kan versteur. “Wie wil nou met 'n fibrillerende hart sit terwyl 'n spasma in die aar ontstaan waar kilogramme vet (cholesterol) soos 'n klomp skape voor 'n kraalhek saambondel?” Ek dink onwillekeurig aan iets soos om 'n 911-nommer om te bel (net vir ingeval).Ná afloop van die E-trol se woedende aanval op sy weerlose ontvanger waar die teiken nie soos 'n wafferse Blitsbokheld Rosko Specman 'n behendige systap kon uitoefen om sy aanvaller se ongure venyn te fnuik nie, sien ek hoe 'n uitgeputte en natgeswete E-trol behaaglik in sy stoel terugsak soos 'n vrou wat pas die lewe aan 'n wonderwerk gebaar het.Boys, wees versigtig, dié eensellige diertjies (Giant Trollosboid) kry jy oral. Hulle vang tot vis ook. Vra maar die Suid-Afrikaners wat die afgelope vakansie by die kus deur Namibiërs met swak gedrag en woordeskat vertel is om te skoert. Kan jy dit vir enige mens oorvertel dat 'n Namibiër nie die grys stof in sy boonste verdieping het om te besef ons het elke sent van toeriste nodig het nie?

Hengel- en internet-trolle

Kommentaar

Republikein 2025-08-05

Meld asseblief aan om kommentaar te lewer

Hengel- en internet-trolle

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie