Helalia in diepste veld nóg

Andrew Poolman Helalia Johannes het plaaslike joernaliste al laat verstaan dat sy nie daarvan hou om voor enige van haar internasionale deelnames veel publisiteit in die media te maak nie en verkies om op haar kompetisie gefokus te bly.Die uitmuntende langasem tree Sondagoggend in Spanje by die Valencia-marathon aan vir wat beloof om 'n ernstige oefenlopie vir die 2021 Olimpiese Spele in Tokio te wees. Haar afrigter Robert Kaxuxuena het vroeër aan ons susterkoerant Namibian Sun gesê Johannes se oefenpeil is goed en dat sy beplan om haar beste te lewer.Volgens statistiek gepubliseer deur Letsrun.com bevat die Valencia-marathon die inskrywingslys met die meeste diepte in elite-vlak atlete wat enige sodanige padwedloop ter wêreld in minstens die afgelope vier jaar gesien het.Johannes (40) se status as bronsmedaljewenner by verlede jaar se wêreldkampioenskap in Doha hou dus die naweek geen waarborg in nie; ook nie haar titel as 2018 Statebondspelekampioen in Australië se Gouekus nie. Die Namibiër, wat reeds vir Tokio as haar vierde Olimpiese Spele gekwalifiseer het, het egter reeds gewys dat sy in groot wedlope oor merkwaardige vasbyt beskik.Boaan die lys van vroue-inskrywings is altesame nege hardlopers wie se persoonlike beste beter as Johannes se twee ure 22 minute 25 sekondes is.Sewe hiervan is Ethiopiërs – insluitend die ganse topses, met Ruti Aga (2:18:34) en Birhane Dibaba (2:18:35) heel boaan. Die Amerikaner Jordan Hasay (2:20:57) is ook daar, asook 'n paar sterk Keniane.In Letsrun se berig word uitgewys dat Valencia se status as 'n mekka vir padwedlope en wêreldrekordpogings nie die enigste rede vir die toestroming van tophardlopers is nie.“In 'n jaar waarin vier van die ses grootste internasionale marathonne (weens Covid-19) platgeval het, het Valencia 'n verbysterende 5.3 miljoen euro (meer as N$98 miljoen) vir die gesamentlike aanbieding van 'n topklas marathon en halfmarathon op die spel geplaas. “Die afwesigheid van byeenkomste in 2020 het ook daartoe gelei dat die hardlopers in tonne opdaag en desperaat is vir 'n resies,” skryf Jonathan Gault.Die diepte in die manswedloop is ewe indrukwekkend. Daar is 35 mans wat die marathon vinner as 2:10 gehardloop het en 44 hardlopers wat 2:12 gebreek het. Boaan die lys is opnuut drie Ethiopiërs met Birhanu Legese (2:02:48) die haastigste.

Helalia in diepste veld nóg

Kommentaar

Republikein 2025-12-17

Meld asseblief aan om kommentaar te lewer

Helalia in diepste veld nóg

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.