'Hartseer dag vir jag in Afrika'

Francoise Steynberg - Die Namibiese Professionele Jagtersvereniging (Napha) betreur die bedanking van sy eweknie in Suid-Afrika wat 'n storm in die jaggemeenskap ontketen het.Volgens die president van Napha, me. Danene van der Westhuyzen, het die president van die Professionele Jagtersvereniging van Suid-Afrika (Phasa), mnr. Stan Burger, hoofsaaklik weens sy konflik met Phasa oor geblikte leeujag bedank. "Napha wens Burger geluk oor sy sterk teenstand oor geblikte leeujag. Dit is ongelukkig dat hy verplig gevoel het om as president te bedank. Dit is voorwaar 'n hartseer dag vir jag in Afrika," lui 'n verklaring van Napha.Met Suid-Afrika wat tans die enigste land in wêreld is waar hierdie praktyk wettig is, meen Napha dit bring oneer aan die etiese jaggemeenskap wat dit beywer om bewaring deur jag uit te beeld. "Geblikte leeujag het 'n direkte negatiewe invloed op die jagbedryf in alle ander Afrikalande en wys daar is minagting teen ander lande se siening oor bewaring deur jag. Hierdie minagting raak die lewensbestaan van Afrikalande direk wat steun op die jagbedryf en die bewaring van ons natuurlike hulpbronne."Napha wens Burger sterkte toe met sy toekoms en "ons is hartseer om sy bydrae as 'n kollega met integriteit te verloor". ’n Storm het verlede Woensdag in die jaggemeenskap losgebars nadat Burger die vorige aand as die president van Phasa bedank het oor konflik in dié organisasie oor geblikte leeujag.Burger sê in sy bedankingsbrief jagverenigings oor oral die wêreld word deur ernstige uitdagings in die gesig gestaar. “Phasa is geen uitsondering nie.”Hy erken in die brief daar is verdeeldheid in Phasa en dat sy bedanking “hopelik” weer eenheid in die vereniging sal bring.Burger is bekend vir die sterk standpunt teen geblikte leeujag wat hy die afgelope twee jaar ingeneem het.Phasa het in 2015 besluit hy gaan nie die geblikte jag of teel van leeus ondersteun nie en het van die “leeumanne” geskors wat dit nie wou onderteken nie.Van die leeutelers wat uit Phasa geskors is, het ’n hofaansoek ingedien om die organisasie te dwing om hulle weer in die vereniging op te neem. Die leeutelers het die saak op ’n tegniese basis gewen.Na wat betroubaar verneem word, gaan sowat 20 leeutelers en Phasa-lede binnekort aan tugverhore onderwerp word.’n Anonieme bron het gewaarsku Phasa dreig om te skeur.Burger het geweier om kommentaar oor sy bedanking te lewer omdat hy ’n vertroulikheidsooreenkoms met die partye in Phasa onderteken het. Hy het egter gesê hy bly lid van die vereniging en sal hom steeds teen hierdie “onetiese” bedryf beywer. - Eie berig en Netwerk24

'Hartseer dag vir jag in Afrika'

Kommentaar

Republikein 2025-05-01

Meld asseblief aan om kommentaar te lewer

'Hartseer dag vir jag in Afrika'

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie