Harde o.20-toernooi brei volgende geslag

Andrew Poolman - Die Namibiese junior span se vertoning sal vanaf volgende week in die kollig wees wanneer hy aan die Wêreldrugby Junior Trofee-toernooi in Boekarest, Roemenië deelneem.Die span vertrek vandag na die Oos-Europese land waar sy eerste wedstryd op Dinsdagaand 28 Augustus teen die gasheerspan Roemenië voorlê. Die ander twee groepwedstryde is teen Hongkong (Saterdag 1 September) en daarna die gedugte Samoa op Woensdag 5 September.Die ander groep lande is Portugal, Uruguay, Fidji en Kanada. Op die laaste speeldag (Sondag 9 September) ding die spanne in uitspeelwedstryde vir hul eindposisie in die toernooi mee.Vanjaar se span dui opnuut daarop dat Namibië se pyplyn van talent vanaf skoolvlak tans op 'n baie gesonde vlak is.Namibië het in die laaste twee jare beide kere sy beste eindposisie nóg (vierde) in dié toernooi vir ontluikende rugbylande van elke vasteland bereik – maar kon nie tot die finaal deurdring waar hy 'n plek by die volgende jaar se Wêreldrugby o.20-kampioenskap sou kon verseker nie.In die afgelope vier jare wat Roger Thompson die o.20's se afrigterskap hanteer het (in 2014 as hulpafrigter vir Jan Dames), het 'n indrukwekkende getal spelers gevorder om in volwaardige senior toetsrugby deur te breek. Dié lysie sluit Wian Conradie, Louis van der Westhuizen, Janco Venter, Damian Stevens, DG Wiese, Chris Arries, Quintin Esterhuizen, Awie Thompson, Gino Wilson, Christo van der Merwe, Lesley Klim, Johan Retief, Justin Newman, Cliven Loubser, Obert Nortjé, Nelius Theron, André Rademeyer en PW Steenkamp in. Tesame met die geloof in die jongmanne se vermoëns wat die senior nasionale afrigter Phil Davies terselfdertyd wys in die opbou na die 2019 Wêreldbeker in Japan, getuig dit van die soort geleenthede waartoe 'n goeie vertoning in die volgende twee weke kan aanleiding gee.Vanjaar se groep is ietwat ontwrig deur die onbeskikbaarheid van Roger Thompson as afrigter en kon ook vanweë onttrekkings en beserings eers in 'n redelike laat stadium ten volle gefinaliseer word.Die Blou Bulle het byvoorbeeld al hul gekontrakteerde Namibiërs vir die toer vrygestel, afgesien van die sterk flank Prince !Gaoseb wat verlede jaar die nasionale o.20-kaptein was. Die haker Darius von Solms (Pukke, studies) en senter Chrischen Olivier (beseer) was ook gekies, maar moes onttrek.Henry Kemp is verlede week nader geroep as hoofafrigter nadat Jood Opperman (die juniors se afrigter in 2013) nie werkverlof vir die toer kon kry nie.Kemp se groep bevat heelwat meer skoolgaande seuns as verlede jaar, toe Elmarco Beukes die enigste een was. Uit Windhoek Hoërskool het Delron Brandt, Warren Ludwig, Jacques Theron en die einste Beukes nog tot laas naweek gespeel, terwyl Willon du Plessis aan Pro-Ed Akademie op Swakopmund verbonde is.Die spelersgroep is:Heelagters en losskakels: Chad Plato (Walvisbaai PHS, Blou Bulle), Denzo Bruwer (Windhoek Gimnasium, Blou Bulle), Delron Brandt (Windhoek Hoërskool).Senters en vleuels: Elmarco Beukes (Windhoek Hoërskool), Gerswin Mouton (Windhoek Affies, Blou Bulle), Rudi Pretorius (Windhoek Gimnasium, FNB Wanderers), Warren Ludwig (Windhoek Hoërskool), Donaville Lebereki (Windhoek Hoërskool, Reho Falcon), Darryl Wellman (Walvisbaai PHS), Willon du Plessis (Pro-Ed Akademie).Skrumskakels: Jacques Theron (Windhoek Hoërskool), Hanreco van Zyl (Hoërskool Stellenbosch, Trustco United).Hakers: Jan Tobias (JT) Basson (Windhoek Hoërskool, Pukke), Eloff du Plessis.Losvoorspelers: Oderich Mouton (Windhoek Hoërskool, Blou Bulle), Wynand Breytenbach (Walvisbaai, Blou Bulle), Peter Diergaardt (Windhoek Gimnasium, Blou Bulle), Gilad Plaatjies (Walvisbaai PHS).Slotte: Adriaan Ludick (Paarl Gimnasium, Blou Bulle), Gerbus van Wyk (Elnatan), Adriaan Venter (WHS), Lezardo Vos (Walvisbaai).Stutte: Gerhard Opperman (Windhoek Gimnasium, Universiteit van Johannesburg), André Rademeyer (Windhoek Affies, WP Rugby-akademie), Patrick Schickerling (Walvisbaai, Blou Bulle), Chris Swanepoel (WHS, Trustco United).Die groep word vergesel deur mnre. Henry Kemp (hoofafrigter), Irvin Newman (spanbestuurder), dr. Wilfred Bezuidenhout (spandokter), Sergio de la Harpe (krag en kondisionering), Sam Pickford (prestasie-ontleder) en Innis Erasmus (fisioterapeut).

Harde o.20-toernooi brei volgende geslag

Kommentaar

Republikein 2025-12-16

Meld asseblief aan om kommentaar te lewer

Harde o.20-toernooi brei volgende geslag

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.