Hannes Erasmus van Newsprint oorlede

Hoofredaksie - Namibia Media Holdings (NMH) se drukkery, Newsprint, het een van sy strydrosse verloor.Mnr. Hannes Erasmus, hoof-motorwerktuigkundige, het gisteroggend ses dae ná sy 55ste verjaardag in 'n Windhoekse hospitaal gesterf. Dit was 'n maand en vier dae nadat hy met longkanker gediagnoseer is.Hannes was die oudste seun van veteraanjoernalis Des Erasmus. Sy jonger broer, Richter Erasmus, is op 29 Januarie 2005 aan 'n hartaanval dood.Hannes se verbintenis met die NMH-groep strek veel langer terug as sy voltydse betrekking van die afgelope 12 jaar by Newsprint. As matriekseun het hy reeds in die jare van Sondag-Republikein, later Tempo, Saterdagnagte die Sondagkoerante na die Noorde versprei. 'n Hegte vriendskap het daardie jare tussen hom en wyle dr. Jan Spies gevorm. In sy afnaweke het hy Spies selfs plaas toe vergesel. Mnr. Ernst Venzke, hoofbestuurder van Newsprint, sê Hannes was een van daardie mense wie se hande vir niks verkeerd gestaan het nie. “Hy kon van die fynste werkies, soos om radio's te herstel, tot baie groot konstuksietake met ewe veel gemak aanpak en suksesvol voltooi. Hy kon alles doen.“Dit is nie moontlik om te tel hoeveel voertuie, van klein bakkies tot groot busse, hy met groot liefde en toewyding altyd in die beste moontlik toestand gehou het nie. Verskeie van hierdie voertuie het meer as 1 000 000 km diens gedoen onder sy bekwame toesig,” vertel Venzke.As matriekseun was een van Hannes se prestasies dat hy binne twee weke twee Namibiese sportspanne gehaal het – die eerste week krieket en twee weke later seunshokkie. Sy passie in sy skooljare was die veiligheidsmagte en niks het hom laat afsien van 'n loopbaan in die polisiediens nie. In die Polisiekollege in Pretoria is hy met twee goue toekennings vir skiet vereer. In die tydperk voor onafhanklikwording het hy ook as polisieman spesiale radiodienste aan troepe in die opersionele gebied verleen. Sy besondere kennis van die Bybel het hom die bynaam Calvyn besorg, en in sy familiekring was hy bekend as Hans Dons. Ná die onafhanklikwording van Namibië het hy by verskillende instansies in die private sektor gewerk voordat hy weer groter vastrapplek in die diens van die ou DMH en latere NMH gekry het. Wapens en radiotegnologie en die ontwikkeling van die kuberkommunikasie het een van sy groot passies gebly. Hy was ook baie lief vir die natuur. Hannes was met Adri Kruger getroud, die vrou wat hy ontmoet het toe hy as polisieman op Lüderitz gestasioneer was. In die laaste weke voor sy dood was sy sy anker en het langs sy bed gewaak. Ook in sy laaste nag was sy daar tot die dood die finale skeiding gebring het.Hannes laat benewens sy pa en sy vrou ook sy kinders, Tertius, Kempen en Ria, en sy stiefmoeder, Anneli, agter. Hy was ook die oupa van Kempen en sy vrou, Bernice, se twee kleuters, Kaylee en Liam. Hannes word ook deur 'n jonger suster, Francine Potgieter, oorleef. Sy is 'n onderwyseres by die Sekondêre Skool Jan Mohr.

Hannes Erasmus van Newsprint oorlede

Kommentaar

Republikein 2025-07-07

Meld asseblief aan om kommentaar te lewer

Hannes Erasmus van Newsprint oorlede

Kommentaar

Republikein 2025-07-07

Meld asseblief aan om kommentaar te lewer

MELD AAN

Advertensie