Handel: Resessie krimp werke, lone

Jo-Maré Duddy - Werkgeleenthede in die groot- en kleinhandel, asook gemiddelde lone en salarisse in dié sektor was in die eerste kwartaal vanjaar minder as dieselfde tyd in 2016.Luidens die jongste kwartaalbulletin van die Bank of Namibia (BoN) het groot- en kleinhandel in die eerste kwartaal vanjaar 5,2% minder poste as in die laaste kwartaal van 2016 gebied. Vergeleke met die eerste drie maande van verlede jaar was daar 4,8% minder werkgeleenthede.Die gemiddelde loon en salaris in die eerste kwartaal was 3,7% laer as 'n jaar gelede.Die BoN skryf dié toedrag van sake aan die “algemene verlangsaming” in die ekonomie in die kwartaal onder oorsig toe.Volgens die Namibië Statistiekagentskap (NSA) se jongste arbeidsmagopname (NLFS 2016) was groot- en kleinhandel verlede jaar die derde grootste werkverskaffer. In 2016 het dié sektor werk aan 65 492 mense verskaf, bykans 9,7% van die land se totale arbeidsmag. Die meerderheid hiervan - altesaam 38 688 – was vroue.Verlede jaar se syfers is drasties laer as dié van 2014 toe groot- en kleinhandel vir 97 099 werke gesorg het – 57 833 vroue en 39 266 mans. Toe het dié sektor 13,6% van Namibië se arbeidsmag in diens gehad.Lone vs inflasieVolgens die NLFS 2016 was die gemiddelde maandelikse loon vir werkers in die groot- en kleinhandelsektor verlede jaar N$4 167, bykans 6,9% laer as die N$4 474 in 2014.In 2016 het mans in dié sektor gemiddeld N$5 119 per maand verdien, nagenoeg 2,3% minder as in 2014. Vroue se gemiddelde maandelikse loon het met bykans 8,4% tot N$3 421 geval. Die gemiddelde inflasiekoers van 2014 tot 2016 was 5,7%.Volgens die NSA het groot- en kleinhandel in die eerste kwartaal vanjaar met -7,4% gegroei. Met groei die vorige kwartaal wat -3,2% was, is dié sektor nou amptelik in 'n resessie. Algehele ekonomiese groei in die eerste kwartaal was -2,7%, die vierde opeenvolgende kwartaal van negatiewe groei en resessie in die land.Gemeet teen die konstante pryse van 2010 het groot- en kleinhandel in die eerste kwartaal vanjaar sowat N$3,2 miljard tot Namibië se bruto binnelandse produk (BBP) bygedra, ongeveer N$258 miljoen minder as dieselfde drie maande van 2016. Namibië se BBP in die eerste kwartaal vanjaar was sowat N$26,9 miljard, omtrent N$751 miljoen minder as 'n jaar gelede.Volgens die BoN se jongste ekonomiese vooruitsig sal groot- en kleinhandel in 2017 met -3% groei.

Handel: Resessie krimp werke, lone

Kommentaar

Republikein 2025-06-26

Meld asseblief aan om kommentaar te lewer

Handel: Resessie krimp werke, lone

Kommentaar

Republikein 2025-06-26

Meld asseblief aan om kommentaar te lewer

MELD AAN

Advertensie