Hagibis kelder WB-droom

Ronelle Rademeyer in Miyako, Japan - Ná 'n nag waarin tifoon Hagibis met sy stormsterk winde en hewige reën 'n vloedspoor van verwoesting oor die sentrale en noordelike dele van Japan gelaat het, moes die Namibiese rugbyspan Sondagoggend met die slegte nuus van 'n gekanselleerde wedstryd wakker word.Die wedstryd teen Kanada was Namibië se kans op 'n eerste Rugbywêreldbeker-oorwinning ooit.Wêreld Rugby het aangekondig kommer oor die veiligheid van spelers en toeskouers weens moontlike modderstortings uit die berghange reg agter die Kamaishi Recovery-stadion, het tot die besluit gelei.Die Japanse owerheid het Saterdagnag 'n kategorie 5-noodwaarskuwing uitgereik toe dit blyk vloede en modderstortings weens die ergste tifoon sedert 1958 se tifoon Ida, bedreig menselewens.Teen laat gistermiddag was daar volgens Reuters reeds 23 mense dood, 166 beseer, met meer as 16 mense wat vermis word.Altesaam 27 000 weermaglede en nooddienswerkers is ontplooi, en bote en helikopters is ingespan om mense uit oorstroomde gebiede te red.Die Namibiese span was tuis in die Park Hotel in Jodogahama by Miyako, terwyl Republikein se Jol in Japan-span 'n ent daarvandaan in die Route-Inn Hotel tuisgegaan het. Geen oorstromings het daar voorgekom nie, maar die dorp Kamaishi waar die wedstryd sou plaasvind, het wel deurgeloop.'n Tonnel onderweg daarheen het inmekaar gestort, wat toegang na die gebied vir toeskouers bemoeilik het, het die Japanse TV-diens NHK berig.Dié diens het beeldmateriaal gewys van enkele omgewaaide bome op die parkeerterrein. Verder was daar geen skade aan die onvoltooide stadion nie.Die herdenkingstadion is opgerig waar 'n skool tydens die reuse-tsunami op 11 Maart 2011 vernietig is.Gister se wedstryd was vir die mense van die gebied van groot belang aangesien die stadion hul heropbou ná daardie verwoestende ramp simboliseer.GROOT TELEURSTELLINGMnr. Kaoru Nakagawa (68) wat vir Soave Cooperation werk wat die hawens van Kamaishi en Yamada herbou het, sê die gekanselleerde wedstryd is vir die mense van die omgewing 'n groot teleurstelling."Hierdie sou die belangrikste wedstryd wees wat nog ooit daar gespeel is," het hy aan Republikein gesê."Dit het baie vir toerisme in die gebied beteken."Me. Anita Sasaki (nèe Buys), 'n oud-Windhoeker wat al 20 jaar in Miyako woon, sê sy wou huil toe sy hoor die wedstryd is gekanselleer. "Ek het só daarna uitgesien."Dit is nie net Namibië wat teleurgesteld was nie.Me. Bernadene Longland, vrou van die Kanadese spandokter, Billy Longland, het by die Route-Inn Hotel ook haar teleurstelling uigespreek.So ook mnr. Edmund Hoff met wie Republikein by die bushalte in Miyako gesels het toe hy op pad terug was na Tokio."Ek is ontsteld, maar 'n mens kan verstaan waarom dit gekanselleer moes word," het hy gesê.Die gekanselleerde wedstryd se amptelike gelykopuitslag (0-0) besorg aan beide spanne twee ligapunte. Namibië se enigste vorige ligapunt by die Wêreldbeker was in 2015 in Engeland, te danke aan die naelskraapse nederlaag teen Georgië (16-17).Namibië eindig ook vierde in groep B, bo Kanada in die vyfde posisie, op grond van ‘n beter punteverskil ná elkeen se vorige wedstryde teen Italië, Suid-Afrika en die groepwenner Nieu-Seeland.Die Namibiese span is gistermiddag deur ondersteuners by die stadsaal in dié dorp met vlae en baniere ingewag. Hulle het vir foto's poseer en handtekeninge uitgedeel, asook van die munisipale werknemers ontmoet.Die Kanadese span het in Kamaishi waar hul tuis was, moue opgerol en met opruimingswerk gehelp.

Hagibis kelder WB-droom

Kommentaar

Republikein 2025-11-05

Meld asseblief aan om kommentaar te lewer

Hagibis kelder WB-droom

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.