Hage lei staatsbesoek na China

Augetto Graig - Pres. Hage Geingob lei vandag 'n groot afvaardiging van ministers, staatsamptenare, sakelui en leiers van staatsondernemings op 'n staatsbesoek na China. Dít op uitnodiging van dié land se staatshoof, pres. Xi Jinping. Die uitnodiging is onlangs in Xi se gelukwensinge aan Namibië met die land se 28ste onafhanklikheidsvieringe herhaal. Die groep van 81 Namibiërs sal China van 27 Maart tot 2 April besoek.Dr. Alfredo Hengari, presidensiële woordvoerder, het in 'n mediaverklaring gesê die besoek sal op sektore soos wetenskap en tegnologie, infrastruktuur, landbou, handel en nywerheid, sakebevordering en toerisme fokus.Geingob sal deur die presidentsvrou, me. Monica Geingos, en 'n afvaardiging van 20 kabinetslede, asook senior staatsamptenare vergesel word. Van die ministers wat saamreis, is die adjunk- eerste minister en minister van internasionale betrekkinge en samewerking, me. Netumbo Nandi-Ndaitwah, die minister van nywerheidsontwikkeling, handel en SME-ontwikkeling, mnr. Tjekero Tweya, die minister van finansies, mnr. Calle Schlettwein, die minister van landbou, water en bosbou, mnr. Alpheus !Naruseb, die minister van werke en vervoer, mnr. John Mutorwa, die minister van hoër onderwys, opleiding en vernuwing, dr. Itah Kandjii-Murangi, en die prokureur-generaal, dr. Albert Kawana. SAKELUISakelui uit verskeie sektore sal in China by die president aansluit. Die 60 sakeleiers wat saamgaan, sluit in mnre. Hosea Nico Kaiyamo van Cavema Fishing, David Sheehama David van Kambwa Trading, me. Lynette Lutombi van O&L Leisure, mnre. Amos Shiyuka van MobiPay, John Walenga van Omalaeti Productions, Jerome Mutumba van Guinas Investments en Knowledge Katti van Kombat Berries. Ook mnre. Elmo Kaiyamo van Otesa, Feni Nanyeni van Nanyeni Investments, Martin Shipanga van Shipanga Medical Services, Erastus Shapumba van die Chicco Groep van Maatskappye, Robanus Amadhila van Roama Gates Manufacturing, me. Nathalia Goagoses van House of Telne en mnr. Jeremia Muadinohamba van Muadifam Enterprises sal die afvaardiging vergesel. Verder is dr. Leake Hangala, direkteur van die Namibiese Kamer van Handel en Nywerheid (NCCI) en die uitvoerende voorsitter van die Hangala-groep, mnr. Kennedy Hamutenya, die uitvoerende hoof van die nasionale diamantbemarkingsmaatskappy, Namib Desert Diamonds (Namdia), die voorsitter van die Namibië Lughawensmaatskappy (NAC), mnr. Rodger Kauta, die NAC se waarnemende uitvoerende hoof, mnr. Albertus Aochamub en die adjunk-voorsitter, me. Beverly Vugs, ook deel van die afvaardiging. Die uitvoerende hoof van die Paaieowerheid, mnr. Conrad Lutombi, is ook deel van die afvaardiging.Terwyl die staatshoof daar is, sal hy handelsbetrekkinge en samewerking op die gebied van ontwikkeling tussen die twee lande versterk, het Geingob in 'n verklaring gesê. Hy het gesê die besoek sal daarop gemik wees om betekenisvol tot Namibië se ekonomiese en nywerheidsontwikkeling by te dra. Die president het voorts gesê Namibië kan baie van China as kernsentrum van uitnemendheid en tegnologiese innovasie leer. Dié land kon in minder as vier dekades sowat 800 miljoen mense uit armoede ophef, het hy gesê. KOSTEHengari het aangedui Geingob en sy afvaardiging sal vandag op kommersiële vlugte vertrek. Indien die regering vir almal se vliegkaartjies betaal, sou vlugte op Qatar Airways vir die hele geselskap meer as N$10 miljoen uit die land se leë staatskoffers jaag.Hengari kon gister nie bevestig of die regering direk vir die betrokke sakelui se vervoer en verblyf verantwoordelik is nie. Staatsondernemings soos Epangelo, die Offshore Development Company (ODC), die Nasionale Behuisingsonderneming (NHE) en die Namibië Ontwikkelingskorporasie (NDC) sal die belasting op hul amptenare se reis- en verblyftoelae moet betaal, asook op die toelae van die vier Air Namibia-hoëlui en die drie van die NAC wat saamvlieg. Hengari regverdig dié koste as volg: “China is die tweede grootste ekonomie ter wêreld, en die president van 'n klein staat is op topvlak genooi. Daar is baie om te oorweeg in terme van die voordele wat ons in staat kon stel om die uitdagings van werkloosheid, armoedevermindering en infrastruktuurontwikkeling te hanteer. Ons moet genoeg energie vir die verbetering van betrekkinge tussen Namibië en China inspan.”Hy sê verskeie ooreenkomste sal na verwagting tydens die besoek gesluit word. Dit sluit in die konstruksie van 'n satelliet- grondontvangsstasie, die vestiging van 'n ekonomiese en handelsamewerkingsone en nywerheidspark (!Nara Namib-projek) op Walvisbaai, en die voltooiing van die protokol oor die kwarantyn- en gesondheidstoestand vir beesvleis wat van die bek-en-klou-seer-vrye sone van Namibië afkomstig is.

Hage lei staatsbesoek na China

Kommentaar

Republikein 2025-11-04

Meld asseblief aan om kommentaar te lewer

Hage lei staatsbesoek na China

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.