Gru-botsing eis tien lewens

Tanja Bause - Tien mense is Sondagaand tussen Okahandja en Karibib ná 'n gru-botsing tussen twee sedanvoertuie dood. Nege mense het op die toneel gesterf terwyl nog een later in die hospitaal beswyk het. Die ongeluk het Sondag om 19:20 sowat 20 km buite Okahandja op die Karibib-pad plaasgevind. Die voertuie was in 'n kop-teen-kop-botsing betrokke en beide het ná die botsing in vlamme uitgebars. Volgens die Namibiese polisie se woordvoeder in die Otjozondjupastreek, ao. Maureen Mbeha, was daar ses mense onder wie 'n baba in die Volkswagen Golf. In die GWM-voertuig was daar vier mense wat op die toneel doodgebrand het, terwyl 'n 20-jarige man in dieselfde voertuig net lig beseer is. “Die voorlopige polisieondersoek dui daarop dat een van die voertuie 'n ander voertuig verbygesteek het toe die ongeluk gebeur het. Ons weet egter nie watter voertuig vanuit watter rigting gekom het nie,” het Mbeha gesê. Volgens haar benodig die polisie die hulp van die publiek met die uitken van die liggame. “Die liggame is onherkenbaar verbrand en ons benodig die hulp van familielede wie se geliefdes Sondag tussen Okahandja en Karibib op die pad was om na vore te kom sodat ons met forensiese identifikasie kan begin,” het sy gesê. Familielede kan die polisielykshuis in Windhoek of vir ao. Shatipamba by 081 273 5188 kontak om 'n DNS-monster te verskaf sodat die lyke geïdentifiseer kan word. In 'n ander ongeluk die naweek is die bestuurder van 'n minibussie, mnr. Andreas Lukewa (38), Saterdag dood. Die ongeluk het om 06:48 op die hoek van Sam Nujoma- en Otjomuisestraat plaasgevind. Volgens die polisie het 'n Mazda-sedan by die verkeerslig gestaan en wag dat dit groen word. “Die minibussie het oor die kruising gery en 'n Nissan Note-sedan het glo oor die rooi verkeerslig gery en die bussie teen die sy getref. “Die bussie het omgeslaan en op die Mazda te lande gekom," lui die polisieverslag. Lukewa is op die toneel dood. Tien veiligheidswagte wat in die minibussie was, die bestuurder van die Nissan en sy passasier is met beserings in die hospitaal opgeneem. Soos Republikein gister berig het, is daar in drie afsonderlike ongelukke agt mense oor die naweek dood. Dit bring die getal sterftes vir die eerste naweek in die Kersseisoen op 19 te staan. VERMEENDE DRONKBESTUURSaterdag om 03:12 het 'n man beheer oor sy voertuig verloor en teen die muur van 'n woonstelblok op Mariental gebots. Volgens die polisieverslag was die man onder die invloed van alkohol en is in hegtenis geneem. Donderdag om 22:50 is twee mans, ook op Mariental, vir dronkbestuur in hegtenis geneem. Die ongeluk het 10 kilometer buite Mariental gebeur. "Een van die bestuurders het van agter af in die ander voertuig vasgery. Beide die bestuurders (55 en 53 jaar oud) was onder die invloed van drank en is op die toneel in hegtenis geneem."

Gru-botsing eis tien lewens

Kommentaar

Republikein 2025-07-24

Meld asseblief aan om kommentaar te lewer

Gru-botsing eis tien lewens

Kommentaar

Republikein 2025-07-24

Meld asseblief aan om kommentaar te lewer

MELD AAN

Advertensie