Groter droogtes kom

Elvira Hattingh – Droogtes, verwoestyning, ’n groeiende bevolking en die vermindering van hulpbronne in dele van Afrika waar mense sterk op landbou aangewese is, kan gemeenskappe dwing om te migreer. Dit kan, op die beurt, tot onder meer sosiale en ekonomiese onrus lei. Mnr. Ali Diniz (kor), adjunksekretaris van Turkye se ministerie van bosbou en waterwese, het verlede Donderdag tydens die aanvang van die hoëvlak vergaderings by die Afrika Droogtekonferensie gesê klimaatverandering en verwoestyning sal die gereeldheid en ernstigheid van droogtes in Afrika vererger. “As verwoestyning nie bekamp word nie, sal dit algaande tot meer ernstige droogtes lei, wat groter bedreigings vir voedselsekerheid sal bring.“Die grootste dele van die aarde bestaan uit droë, semi-droë en sub-humiede gebiede en die meerderheid van die wêreldbevolking moet hier ’n bestaan voer. Behalwe vir droogte, vloede en oorstromings, moet Afrika ’n veel erger natuurlike ramp die hoof bied, naamlik verwoestyning. “Droogtes sal al hoe meer mense raak en alle voorspellings dui daarop dat selfs groter droogtes in die toekoms op ons wag. Boonop kan migrasie ook tot die ontwrigting van families en aanpassingskwessies lei,” het Diniz gesê.Volgens hom is dit gevolglik noodsaaklik vir lande dat doeltreffende en volhoubare droogtebestuurmeganismes, -wetgewing en beleide in pas met nasionale ontwikkelingsdoelwitte moet wees.“Die erns van droogte kan deur die behoorlike bestuur daarvan en teenmaatreëls versag word. “Terwyl die wêreldbevolking daagliks groei, ontstaan die vraag oor hoe voldoende drinkwater en kos met beperkte hulpbronne verskaf kan word,” het Diniz gesê.Hy het verwys na Turkye se Ankara Inisiatief, wat oor die afgelope dertien jaar groot vordering in verband met waterbeleid en die doeltreffende gebruik van water gemaak het.“Die opvang van reënwater wat in droër tye gebruik kan word, is noodsaaklik in die stryd teen droogte. Dienooreenkomstig het ons verskeie damme en poele in Turkye gebou en oor die afgelope dertien jaar altesaam 320 nuwe damme gebou. Landwyd het Turkye nou 700 damme.“Terselfdertyd het ons in samewerking met nie-regeringsorganisasies 2 600 waterputte in 17 lande gesink – die meeste in Afrika. Dit voorsien nou drinkwater aan sowat 1,7 miljoen mense,” het hy gesê. As deel van die Ankara Inisiatief, sal ’n internasionale slypskool oor stofstorms en dynserigheid saam met verskeie VN-afdelings, lande in die Midde-Ooste en Noord-Afrika in Oktober vanjaar in Istanboel aangebied word.

Groter droogtes kom

Kommentaar

Republikein 2025-08-05

Meld asseblief aan om kommentaar te lewer

Groter droogtes kom

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie