Grootfontein wys wat platteland kan doen
Kan Namibië met sy klein poel van spelers werklik bekostig om enige talent mis te kyk?
Andrew Poolman - Die onblusbare rugbypassie van die platteland was Saterdag op vertoon toe die kragtige Grootfontein-span die eersteliga-finaal van die Namibië Rugby-unie (NRU) met 34-17 teen die Keetmanshoop Rams beklink het.
Die noordespan was rustyd met 23-10 voor, maar Keetmanshoop het nooit besgegee nie en het deurentyd sy stem dik gemaak.
Die twee klubs wat beide meer as 450 kilometer van die hoofstad geleë is, se spel was 'n toonbeeld van die Namibiese veggees wat ondanks vele struikelblokke en met min wesenlike ondersteuning die spel met passie aan die gang hou.
Namibië funksioneer die afgelope tyd sonder 'n keurkomitee en op die oog af was ook geen lid van die nasionale afrigterspan die laaste drie naweke daar om eerstehands 'n oog op die beskikbare talent te werp nie.
Dit is inderdaad 'n jammerte en 'n mens sou hoop dat die wedstrydvideo aan afrigter Phil Davies en sy ontledende span beskikbaar gestel word. Selfs op die vooraand van Namibië se betrokkenheid by die Wêreldbekertoernooi in Japan was daar spelers op vertoon wat gewis aan die deur kan klop om met sukses as verrassende insluitings gebruik te word – soos wat die Wallieser reeds 'n paar maal tevore oor die laaste klompie jare gedoen het.
Dit sal ook uitstekend wees indien die naweek se praatjies realiseer dat 'n paar afrigters van die NRU eersteliga gaan koppe bymekaar sit om eersdaags 'n “droomspan” saam te stel wat dalk die premierliga se kampioenklub kan uitdaag wat op 24 Augustus bekroon word.
Keetmanshoop se skraal heelagter Shaun Farmer het ná twee minute speeltyd die eerste punte van die finaal behaal toe hy met 'n skuins strafdoel van die tienmeterlyn af geslaag het.
Grootfontein se indrukwekkende pak voorspelers sou altyd sy troefkaart in dié finaal wees. Ná ses minute het die flank en kaptein Wikus Jacobs 'n optel-en-dryfbeweging onder die pale afgerond nadat sy pak vir etlike fases die bal beskerm het.
Saam met sy ewe indrukwekkende losvoorspelermaats Johan Luttig en Herman Janse van Rensburg was Jacobs gewis lid van 'n uitstaande kombinasie oor die laaste drie naweke se uitklopstryde.
Luttig is ooglopend nou 'n veel meer volwasse voorspeler as toe hy in 2016, vars uit die skoolbanke, hom in die diep kant van Vodacombeker-rugby vir die Windhoek Draught Welwitschias bevind het. Van Rensburg handhaaf eweneens 'n werktempo wat vir geen van Namibië se bestes behoort terug te staan nie.
Grootfontein se losskakel Siegfried Potgieter het met die doelskop van Jacobs se drie geslaag en het met strafdoele ná elf en 29 minute die voorsprong tot 13-3 laat rek.
Keetmanshoop, wie se vlugvoetige agterspelers en algemene fiksheid vooraf as hul grootste sterk punt uitgewys is, het egter met tye gewys dat hy ook dieselfde vaardige soort rugby as Grootfontein met aangeë uit duikvatte kan speel. Keetmanshoop se flank Wikus Swiegers het maklik onder die pale gaan druk te danke aan sy ondersteunende spel van 'n senter se breekslag in die middelveld, ná 'n aanvallende lynstaan.
Met Shaun Farmer se doelskop was Keetmanshoop met 10-13 agter en hoewel Potgieter met 'n strafskop mis gekorrel het, het hy ná 36 minute self gebreek en vir senter Silvano Beukes weggestuur. Heelagter Irongwa Atshivudhi (bynaam Zulu) was oop langs hom en het met 'n haastige paar treë agter die pale gaan druk.
Danksy Potgieter se doelskop, asook nog 'n strafdoel, kon Grootfontein rustyd op 23-10 die druk van die telbord begin toepas.
Heelagter Shaun Farmer het 'n Keetmanshoop-beweging in die linkerhoekie gaan afrond en het self met die doelskop geslaag om die verskil tot 23-17 te laat krimp.
Potgieter se vierde en vyfde strafdoele het die noordespan se greep egter met 29-17 versterk. Selfs terwyl die flank Van Rensburg en plaasvervanger-vleuel Corné Labuschagné saam-saam in die koelkas beland het, het hul makkers verhinder dat Keetmanshoop punte kon byvoeg.
Skeidsregter Oscar Lambert se fluitjie was soms onhoorbaar en die spelers het dan voortgespeel, wat selfs 'n paar maal tot onnodige stampe en stote weg van die bal bygedra het.
Senter Silvano Beukes (Grootfontein se ander gewese Welwitschias-speler) het die finale spyker met 'n drie in die regterhoek ingeslaan, voordat Luttig hom ook vir oulaas in die blaser se geel kaart vasgeloop het.
• Die eersteliga plaatfinaal is deur St. Lou gewen, hoewel bykomende tyd nodig was om die 80 minute se gelykoptelling van 20-20 teen die Southern Bulls van Mariental te onderskei.
Die noordespan was rustyd met 23-10 voor, maar Keetmanshoop het nooit besgegee nie en het deurentyd sy stem dik gemaak.
Die twee klubs wat beide meer as 450 kilometer van die hoofstad geleë is, se spel was 'n toonbeeld van die Namibiese veggees wat ondanks vele struikelblokke en met min wesenlike ondersteuning die spel met passie aan die gang hou.
Namibië funksioneer die afgelope tyd sonder 'n keurkomitee en op die oog af was ook geen lid van die nasionale afrigterspan die laaste drie naweke daar om eerstehands 'n oog op die beskikbare talent te werp nie.
Dit is inderdaad 'n jammerte en 'n mens sou hoop dat die wedstrydvideo aan afrigter Phil Davies en sy ontledende span beskikbaar gestel word. Selfs op die vooraand van Namibië se betrokkenheid by die Wêreldbekertoernooi in Japan was daar spelers op vertoon wat gewis aan die deur kan klop om met sukses as verrassende insluitings gebruik te word – soos wat die Wallieser reeds 'n paar maal tevore oor die laaste klompie jare gedoen het.
Dit sal ook uitstekend wees indien die naweek se praatjies realiseer dat 'n paar afrigters van die NRU eersteliga gaan koppe bymekaar sit om eersdaags 'n “droomspan” saam te stel wat dalk die premierliga se kampioenklub kan uitdaag wat op 24 Augustus bekroon word.
Keetmanshoop se skraal heelagter Shaun Farmer het ná twee minute speeltyd die eerste punte van die finaal behaal toe hy met 'n skuins strafdoel van die tienmeterlyn af geslaag het.
Grootfontein se indrukwekkende pak voorspelers sou altyd sy troefkaart in dié finaal wees. Ná ses minute het die flank en kaptein Wikus Jacobs 'n optel-en-dryfbeweging onder die pale afgerond nadat sy pak vir etlike fases die bal beskerm het.
Saam met sy ewe indrukwekkende losvoorspelermaats Johan Luttig en Herman Janse van Rensburg was Jacobs gewis lid van 'n uitstaande kombinasie oor die laaste drie naweke se uitklopstryde.
Luttig is ooglopend nou 'n veel meer volwasse voorspeler as toe hy in 2016, vars uit die skoolbanke, hom in die diep kant van Vodacombeker-rugby vir die Windhoek Draught Welwitschias bevind het. Van Rensburg handhaaf eweneens 'n werktempo wat vir geen van Namibië se bestes behoort terug te staan nie.
Grootfontein se losskakel Siegfried Potgieter het met die doelskop van Jacobs se drie geslaag en het met strafdoele ná elf en 29 minute die voorsprong tot 13-3 laat rek.
Keetmanshoop, wie se vlugvoetige agterspelers en algemene fiksheid vooraf as hul grootste sterk punt uitgewys is, het egter met tye gewys dat hy ook dieselfde vaardige soort rugby as Grootfontein met aangeë uit duikvatte kan speel. Keetmanshoop se flank Wikus Swiegers het maklik onder die pale gaan druk te danke aan sy ondersteunende spel van 'n senter se breekslag in die middelveld, ná 'n aanvallende lynstaan.
Met Shaun Farmer se doelskop was Keetmanshoop met 10-13 agter en hoewel Potgieter met 'n strafskop mis gekorrel het, het hy ná 36 minute self gebreek en vir senter Silvano Beukes weggestuur. Heelagter Irongwa Atshivudhi (bynaam Zulu) was oop langs hom en het met 'n haastige paar treë agter die pale gaan druk.
Danksy Potgieter se doelskop, asook nog 'n strafdoel, kon Grootfontein rustyd op 23-10 die druk van die telbord begin toepas.
Heelagter Shaun Farmer het 'n Keetmanshoop-beweging in die linkerhoekie gaan afrond en het self met die doelskop geslaag om die verskil tot 23-17 te laat krimp.
Potgieter se vierde en vyfde strafdoele het die noordespan se greep egter met 29-17 versterk. Selfs terwyl die flank Van Rensburg en plaasvervanger-vleuel Corné Labuschagné saam-saam in die koelkas beland het, het hul makkers verhinder dat Keetmanshoop punte kon byvoeg.
Skeidsregter Oscar Lambert se fluitjie was soms onhoorbaar en die spelers het dan voortgespeel, wat selfs 'n paar maal tot onnodige stampe en stote weg van die bal bygedra het.
Senter Silvano Beukes (Grootfontein se ander gewese Welwitschias-speler) het die finale spyker met 'n drie in die regterhoek ingeslaan, voordat Luttig hom ook vir oulaas in die blaser se geel kaart vasgeloop het.
• Die eersteliga plaatfinaal is deur St. Lou gewen, hoewel bykomende tyd nodig was om die 80 minute se gelykoptelling van 20-20 teen die Southern Bulls van Mariental te onderskei.
Kommentaar
Republikein
Geen kommentaar is op hierdie artikel gelaat nie