Groot prestasie vir Hartebeestloop

Elvira Hattingh - Twee Namibiese stoettelers het onlangs onderskeidelik die eerste en derde plekke in Pick n Pay, Landbouweekblad en Breedplan se Suider-Afrikaanse Stoetteler van die Jaar 2017 opgeraap. Die bekende Namibiese Bonsmara-teler van Hartebeestloop, mnr. Joggie Briedenhann, is tydens die Aldam Stockman-veeskool as die Suider-Afrikaanse Stoetteler van die Jaar 2017 aangewys.Die naaswenner is mnr. Christopher Sparks van die Mount Olive-stoetery naby Harrismith en die derde plek is deur nog 'n Namibiër, mnr. Ebbi Fischer van Okawatuta in die Hochfeld-omgewing, opgeraap. 'n Paneel beoordelaars bestaan vir elke beesras, wat onder hul lede 'n wenner moet kies. 'n Ander, onafhanklike paneel beoordelaars kies die algehele wenner uit die verskillende raswenners. Die beoordelaarspanele bestaan uit stoettelers, afgevaardigdes van die betrokke telersgenootskappe en ander kundiges in die vleisbedryf. Die totale pryswaarde van die eerste drie pryse is R50 000. Die algehele wenner ontvang R25 000 in kontant en word aangeraai om die prysgeld vir 'n oorsese reis aan te wend om invloedryke vleisprodusente in ander dele van die wêreld te besoek.Verder word velddae gereël om blootstelling vir die algehele wenner te bied, sowel as die raswenners om aan die publiek te bewys dat hulle gesonde, moderne besighede bedryf.Intussen het Briedenhann gister só op die prestasie reageer: “Ek voel baie trots dat 'n Namibiër die gesogte prys gewen het. Enige persoon wat nog getwyfel het oor die kwaliteit van boerderypraktyke in Namibië, behoort nou 'n kopskuif te maak. “Hartebeestloop Bonsmaras het reeds die afgelope vier jaar Platinum Elite Koeikudde-toekennings van die Suid-Afrikaanse Stamboek ontvang, was die wenner van die Landbouweekblad/Breedplan Suider-Afrikaanse Koeigroep van die jaar in 2013 en is ook die afgelope vier jaar aangewys as die wenner van die Landbounavorsingsraad se Vleisverbeteringskudde vir Namibië. Die prys as Pick n Pay/Landbouweekblad/Breedplan se Suider-Afrikaanse Stoetteler van die Jaar 2017 is egter die kersie op die koek.”Hy sê die sukses van die Hartebeestloop-kudde is gesetel in die obsessie om diere te teel wat kliënte se sukses verseker. “Dit beteken om voortdurend bestaande grense te toets en nie net te aanvaar hoe dinge in die verlede gedoen is nie. Behalwe vir noukeurige, amptelike rekordhouding, is op-die-veld waarneming en rekordhouding van groot belang. Die wetenskap en die diere se prestasies op die veld, moet mekaar ondersteun. Geen teler beskik oor alle kennis van stoetboerdery nie – ek verwys na wetenskaplike, akademiese en praktiese kennis. Ek maak gebruik van kundiges op hierdie gebiede om waarde tot die boerdery by te voeg. “'n Nuwe tydvak in prestasiebepaling het aangebreek met genomika. Dit sal meer noukeurig as ooit te vore 'n dier se toekomstige prestasies reeds by geboorte bepaal. Alle Hartebeestloop-kuddevaars, gebruiksbulle, Platinum Elite-, Goud-, Silwer- en Brons-toekenningskoeie en die 2018-veilingsbulle se genomiese profiele is reeds gedoen. Dit beteken dat kliënte tot die grootste moontlike mate presies weet wat om van die bulle te verwag,” sê Briedenhann.“Stoettelers moet net fokus op die faktore wat die sukses van hulle kliënte bepaal en die res sal vanself volg.”

Groot prestasie vir Hartebeestloop

Kommentaar

Republikein 2025-06-18

Meld asseblief aan om kommentaar te lewer

Groot prestasie vir Hartebeestloop

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie