Groot Perseids-meteorietreën kom

Elvira Hattingh - Amateur sterrekykers kan uitsien na ’n besonderse skouspelagtige Perseids-meteorietreën op Donderdag 11 Augustus wanneer die aarde deur komeet Swift-Tuttle se lang stert sal beweeg.Volgens kenners sal die meteorietreën, wat jaarliks voorkom, in 2016 tot ’n “uitbarsting” kom en sal mense in plaas van die gewone 80 meteoriete per uur, tot sowat 150 en selfs 200 meteoriete kan sien. Dit sal die eerste keer sedert 2009 wees wat dit gebeur, berig space.com. Terselfdertyd sal die maan kort ná middernag ondergaan, wat die hemelruim redelik donker sal laat en vroegoggend op 12 Augustus vir ’n goeie vertoning sal sorg. Sorg dat jy ná middernag by ’n donker plek is, weg van dorpligte. Meteoriete sal vanaf die Perseus-konstellasie verskiet, maar kan enige plek in die naghemel verskyn. Dié meteorietreën is bekend daarvoor dat dit een van die beste skouspele bied en is jaarliks vanaf 17 Julie tot 24 Augustus aan die gang. Vanjaar bereik dit egter sy piek op die nag van 11 Augustus. Die komeet wat vir dié meteorietreën verantwoordelik is, is reeds in 1862 ontdek. Terselfdertyd moet sterreliefhebbers nie die kleiner Delta Aquarids-meteorietreën op die 28 en 29 Julie misloop nie. Jy kan tot 20 meteoriete per uur sien en dit word veroorsaak deur puin wat deur die komete Marsden en Kracht agtergelaat word. Dié meteorietreën is ook jaarliks tussen 12 Julie en 23 Augustus aan die gang. Op 2 Augustus sal die nuwemaan aan dieselfde kant van die aarde as die son geleë wees, wat beteken dit sal geensins in die naghemel gesien kan word nie. Dit bied ’n ideale geleentheid vir diegene met teleskope om dowwer hemelliggame soos sterrestelsels en stertrosse te bestudeer omdat geen maanlig dit sal uitdoof nie. Op 16 Augustus bereik planeet Mercury sy verste oostelike punt vanaf die aarde. Dit sal die beste tyd wees om dit te aanskou omdat dit op sy hoogste punt bo die horison sal wees sodra die son sak.

Groot Perseids-meteorietreën kom

Kommentaar

Republikein 2025-07-04

Meld asseblief aan om kommentaar te lewer

Groot Perseids-meteorietreën kom

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie