Groot kunstefeeste weens pandemie gekanselleer

Yandi du PlessisDie plaaslike kunsbedryf is grootliks tot stilstand geruk deur die aankoms van die coronavirus in Namibië en gepaardgaande noodtoestand en nasionale inperking.Byeenkomste, optredes en kunstefeeste waarna entoesiaste baie uitgesien het, is en word steeds op 'n streep uit- of afgestel, aangesien groepsbyeenkomste steeds taboe is. Die Windhoek Woordfees wat van 27 tot 31 Julie sou plaasvind, is verlede week afgestel. “Met die Covid-19 pandemie wat onsekerheid land- en wêreldwyd in die hand werk, moet ons die Windhoek Woordfees 2020 met 'n swaar hart afstel,” het die voorsitter, me. Chrisna Beuke-Muir, in 'n verklaring gesê. “Dit is vir my en die Windhoek Woordfees-span werklik 'n groot teleurstelling, veral in 'n tyd wat ons uitvoerende kunstenaars gekortwiek word om dít te doen wat hulle die beste doen. Maar ons besef ook ons kan nie anders as om dié besluit te neem nie. Gelukkig kan skrywers aanhou skryf en waarskynlik het die kreatiwiteit sterk gevloei in hierdie tyd van relatiewe afsondering en vreemde gewaarwordinge!” Van die produksies wat vanjaar by die Woordfees op die planke sou wees, is die eenvrouproduksie Kamphoer met die veteraanaktrise Sandra Prinsloo in die hoofrol en Sê groete vir Ma met die Kwêla-aanbieder Hannes van Wyk. Beuke-Muir sê hulle was ook baie opgewonde om vanjaar vir Coenie de Villiers en Deon Meyer met hulle Kalahari Suite 2 te ontvang. “Coenie met sy sang en klavierspel en Deon as die storieverteller in die tweemanspan is albei meesters in hul gebiede. Ons was baie opgewonde om vir die eerste keer vir Deon hier te kry om aan ons skrywersgesprekke deel te neem.”Dié skrywersgesprekke sou ook aan plaaslike en aspirantskrywers die geleentheid tot blootstelling gegee het. “Kitskonserte” met plaaslike musikante was ook op die agenda – blootstelling wat sulke kunstenaars tans baie nodig het. Sy sê 'n datum vir volgende jaar sal teen einde Mei op die tafel wees. “Ek glo Windhoek Woordfees 2021 sal vir ons en vir u die geleentheid bied om met hernude ywer ons doelwit te bereik, naamlik om Afrikaans te vier en om aan die Namibiese publiek die broodnodige kos vir die siel op tafel te sit. “Ons het reeds die kunstenaars wat aan vanjaar se Woordfees sou deelneem, genader en ons glo hulle sal in 2021 hul kans kry.”• Die Omaruru Kunstefees wat van 26 tot 29 Augustus sou plaasvind, is ook onlangs gekanselleer. “Ons is spyt om die kansellasie aan te kondig. Neem asseblief kennis dat dié besluit nie ligtelik geneem is nie. Ons het al die regulasies wat tans in die land geld, in ag geneem. Weens die onsekerheid oor wat in die volgende maande gaan gebeur en die moeilike finansiële tyd waarin vele mense hulle tans bevind, het ons nie 'n ander keuse gehad nie. “Ons sal binnekort ons toekomsplanne en die nuwe datum vir 2021 bekendmaak,” lui die verklaring wat op hulle Facebook-blad uitgereik is. – yandi@myzone.com.na

Groot kunstefeeste weens pandemie gekanselleer

Kommentaar

Republikein 2025-06-17

Meld asseblief aan om kommentaar te lewer

Groot kunstefeeste weens pandemie gekanselleer

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie