Groot kanonne hoor kiessaak

Denver Kisting – Alle oë is vandag op Namibië se hoogste hof, die hooggeregshof, waar die land se heel eerste onafhanklike presidensiële kandidaat dié hof vra om verlede jaar se verkiesingsuitslae ongeldig te verklaar.Mnr. Ockert Jansen, woordvoerder van die regsbank, het gister by navraag bevestig die volbank regters sal uit vier Namibiese regters en ’n Suid-Afrikaanse regter bestaan.Jansen sê die vyf is hoofregter Peter Shivute, hooggeregshofregters Sylvester Mainga, Dave Smuts, Elton Hoff en ad hoc-hooggeregshofregter Baaitse Nkabinde uit die buurland.Die tandheelkundige, dr. Panduleni Itula, het twee keer in November verlede jaar bloedneus gekry – eerstens by die verkiesingstribunaal en in die hoërhof die aand voor die verkiesings op 27 November.Vir die eerste keer in die land se geskiedenis het hy as onafhanklike presidensiële kandidaat op dié dag die regerende party se amptelike kandidaat, pres. Hage Geingob, uitgedaag in ’n poging om die land te lei.Volgens die amptelike verkiesingsuitslae van die presidensiële verkiesing, wat die Verkiesingskommissie van Namibië (ECN) op die aand van 30 November bekend gemaak het, het Geingob met die louere weggestap. Itula het tweede geëindig.Itula het sedertdien besluit om hom tot die hooggeregshof te wend.Hy het dit veral teen die gebruik van elektroniese stemtoestelle (EVM’s).Die tandarts wou hê indien dié toestelle gebruik sou word, dit saam met ’n naspeurbare papierspoor moes geskied.Dít het nie gebeur nie, ofskoon die toestelle wel gebruik is.Jansen het ook die afgelope week gesê lede van die publiek sal nie in die hooggeregshof toegelaat word as hulle geklee is in enige kleure van politieke partye of die landsvlag nie.Daarnaas, sê die woordvoerder, mag niemand behalwe die media selfone by hulle hê nie.Dít kom nadat Itula Namibiërs genooi het om uit alle uithoeke van die land by die hof op te daag – in óf partyklere van hul keuse of in die kleure van die landsvlag.Hy het terselfdertyd ’n beroep op Namibiërs gedoen om die regsproses toe te laat om sy gang te gaan en niemand te intimideer, beledig of tot geweld aan te hits nie.Sy volgelinge en ondersteuners en dié van die Regstellende Herposisioneringsbeweging (AR) van die grondaktivis mnr. Job Amupanda was verlede jaar dikwels by saamtrekke in die kleure van die landsvlag getooi.Itula het bewerings van doodsdreigemente onlangs afgelag, waarvolgens hy glo voor vandag om die lewe gebring sou wees.Hy het gesê dit sal hom nie van stryk bring nie.Hoewel dit steeds onduidelik is wie sy veldtog gefinansier het, het hy hom verlede jaar tot die sosiale media gewend om diegene wat vir hom gestem het, te nooi om ’n bydrae in sy prokureur, me. Elize Angula, se trustrekening te deponeer om vir die regsgeding te betaal.Naas Angula het Itula onder meer senior advokaat Jeremy Gauntlett QC SC, van Suid-Afrika, wat oor meer as 40 jaar se ervaring beskik, aangestel om die hooggeregshof van sy saak te oortuig.Mnr. Nico Smit, leier van die amptelike opposisie, die Popular Democratic Movement (PDM), het die afgelope week gesê: “Hy (Itula) ly aan ’n Jesus-kompleks.”Die grondwetkenner prof. Nico Horn sê ’n grondwetlike aansoek om verlede jaar se presidensiële verkiesingsuitslae te betwis, kon waarskynlik sterker gewees het as hulle gesteun het op ’n onderneming deur die ECN dat dié liggaam met ’n papierspoor vorendag sou kom indien dit nodig sou raak.Horn sê dit het intussen aan die lig gekom daardie onderneming deur die nasionale kiesliggaam kan nie eerbiedig word nie. “Die saak is baie moeilik en ek dink die Verkiesingskommissie het ons hopeloos gefaal.”’n Politieke ontleder, mnr. Graham Hopwood, het dié week gesê hy hoop die hooggeregshof lewer voor 21 Maart vanjaar uitspraak. Geingob word na verwagting op dié dag as staatshoof vir die volgende vyf jaar ingehuldig.Republikein, in samewerking met sy susterpublikasies Namibian Sun, Allgemeine Zeitung, Windhoek Express en Erongo, saai vandag se hofverrigtinge regstreeks uit.Die uitsending begin om 09:30. – denver@republikein.com.na

Groot kanonne hoor kiessaak

Kommentaar

Republikein 2025-05-08

Meld asseblief aan om kommentaar te lewer

Groot kanonne hoor kiessaak

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie