Groot geeste by fees vereer

Vir die eerste keer in die geskiedenis van die Omaruru Kunstefees gaan hulde gebring word aan ontslape mense wat uitsonderlike bydraes tot die gemeenskap en fees se bestaan gemaak het. Volgens Tinkie Cornelissen, ‘n lid van die feeskomitee, sal hulde aan Des Erasmus, Gudrun Mueller, Gawie Cloete, Duimpie Storbeck en Lindie Prinsloo tydens Jannie Moolman se klassieke konsert Vrydagaand in die Omarururivierloop gebring word “Die konsert word aan dié vyf mense opgedra. Huldeblyke wat Spannie Spangenberg, ‘n inwoner van Omaruru, saamgestel het, sal voor die konsert gelewer word.” Spangenberg het gesê dat hulle deel van die dorp, sy mense en ook kultuur was. “Hierdie mense het elk oor iets spesifiek beskik wat hulle koppel aan die dorp en die fees. “Die idee het verlede jaar posgevat met die heengaan van oom Des. Die plan is om die huldeblyk ‘n jaarlikse instelling by die fees te maak. Ek het ‘n paar dinge oor hierdie mense saamgestel en dit gaan gepaard met foto’s van hul lewe wat op ‘n groot skerm gewys gaan word.” Hy het gesê dat die skilder Lindie Prinsloo, wat verlede jaar op 40-jarige ouderdom oorlede is, se kinderdroom van prentjies teken, en passie vir mens en dier op ? palet vol ou knobbelverf vermeng lê. Gawie Cloete, wat ook ‘n skilder was, het met ‘n verfkwas en doek nie net bakens van die land nie, maar ook sy respek en liefde daarvoor laat voortleef. Hy is laas jaar op die ouderdom van 93 oorlede. Duimpie Storbeck kon met sy opgewekte stem en trillende kitaarsnare moeë lywe tot ‘n wilde dans opswiep. Hy was die broer van Eddie Storbeck en medekomponis van die bekende liedjie “She’s a woman”. Duimpie is verlede jaar op 74-jarige ouderdom oorlede. Gudrun se glimlag het jou altyd nadergenooi vir ‘n bietjie rus en lafenis as alles te veel geword het. Sy word erken as die stigter van die oorspronklike Omaruru Kunsroete wat oor die jare uitgebrei het en nou as die Omaruru Kunstefees bekend staan. Sy was ook die eienaar van die Bronsky-woning op die dorp. Gudrun is verlede jaar op die ouderdom van 64 oorlede. Die befaamde joernalis Des Erasmus het met die skree van grafiet oor papier die lief en leed van die land en sy mense gedra. Hy is op 81-jarige ouderdom verlede jaar oorlede.

Groot geeste by fees vereer

Kommentaar

Republikein 2026-05-05

Meld asseblief aan om kommentaar te lewer

Groot geeste by fees vereer

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.