Grondgrypers daag wet en orde uit

Tanja Bause

Talle mense het verlede week in Otjomuise, noordwes van Windhoek, begin om grond te gryp en die Namibiese polisie se hulp is ingeroep.

Die inspekteur-generaal van die polisie, lt.genl. Sebastian Ndeitunga, het gister Otjomuise besoek om sy beamptes te ondersteun.

“Ons is hier om die chaos en wetteloosheid uit die weg te ruim. Ek dink ek moet ook na die stadsraad van Windhoek toe gaan en dit bestuur terwyl hulle hul huis in orde kry. Ek sal die wetteloosheid nie langer toelaat of duld nie. Almal behoort die boodskap te kry. Ons behoort ’n wetsgehoorsame samelewing te wees en wie ook al die wet oortree, sal die gevolge dra. Hierdie chaos het in Windhoek se stadsraad begin en as hulle nie op pas nie sal ons oor hulle hardloop en die stad self bestuur,” het Ndeitunga gesê.

Tien mense is volgens hom in hegtenis geneem.

“Ons sal nie chaos en anargie duld nie. Demokrasie beteken nie chaos en anargie nie. Ons sal diegene wat wetstoepassers uitdaag hanteer en hulle sal dit nooit vergeet nie.”

NUBAUMIS HILLS

Intussen het mense Vrydag begin om plotte by die Nubaumis Hills-plotte, noord van Windhoek, skoon te maak en sinkhuise op te slaan. Op navraag oor wie vir die mense gesê het om die grond skoon te maak, het ’n man gesê: “Niemand het vir ons gesê nie, ons het gesien hoe mense begin skoonmaak en toe begin ons ook.”

Volgens een van die mans wat reeds ’n stuk grond skoongemaak het, is hulle moeg vir leë beloftes veral van Windhoek se burgemeester, dr. Job Amupanda.

“Hy, Job, was niks en nog voor hy burgemeester geword het, het hy al beloftes gemaak. Hy het belowe as ons vir hom stem en hy burgemeester word, sal hy vir ons land gee. Ons het vir hom gestem en ons het geen grond gekry nie; net leë beloftes. Ons is moeg gewag vir sy beloftes om waar te word,” het hy gesê.

Die grondgrypers het agter die Kilimanjaro- informele nedersetting en langs die ou Brakwater-teerpad begin skoonmaak en plotte uitgemerk. Talle sinkhuis is ook reeds opgerig.

Van dié onwettige plotte en sinkhuise is sowat 100 meter van die eerste Nubaumis Hills-huise geleë en strek nog een kilometer verder tot by die grondpad wat die grens tussen private eiendom en munisipale eiendom aandui. Grond is ook aan die munisipale eiendom se kant gegryp.

“Die mense is besig om bome af te kap en plotte uit te merk op ons eiendom. Dit is ons grond waarvoor ons tariewe en belasting aan die munisipaliteit betaal. Ons het die munisipaliteit om hulp genader en hulle het ons na die Namibiese polisie verwys wat ons weer na die stadspolisie verwys het,” het een van die ploteienaars gesê.

’n Tweespoor-grondpad dui die grens tussen die private en die munisipale eiendom duidelik aan. Twee polisiebeamptes het op die toneel aangekom om hulle van die situasie te vergewis. ’n Raadslid van die Tobias Hainyeko-kiesafdeling, mnr. Christopher Likuwa, het die mense toegespreek en gesê dit sal nie geduld word nie.

“Julle tree onwettig op en dit sal nie geduld word nie. Die polisie is gereed en hulle sal alle onwettige strukture verwyder en beslag op die materiaal lê. Julle moet julle sinkhuise afbreek en verwyder. Wat julle doen is verkeerd. Dit is nie hoe ons ’n land opbou nie. Julle bou huise net waar julle wil en môre eis julle water en krag. Ek is nie die burgemeester nie en hy moes hier wees om julle in te lig dat julle moet gaan; nou doen ek dit,” het Likuwa gesê.

Likuwa het die mense gewaarsku die polisie – onder leiding van Ndeitunga – is op pad na Nubaumis en alle onwettige strukture sal verwyder en beslag op die materiaal gelê word.

“Ons sien nou die grondpad en verstaan dit is die grens tussen die privaat eiendom en Amupanda-land (munisipale grond). Ons is jammer ons het dit nie geweet nie. Ons sal ons goed verwyder van die private grond, maar aan dié kant van die pad is Amupanda-land en ons gaan nêrens heen nie. Sê jy vir hom ons sal hier vir hom wag. Hy moet kom en verduidelik wat van die beloftes geword het wat hy gemaak het aan al die mense,” het een van die grondgrypers gesê. - [email protected]