Grenspermitte vir inwoners van Impalila-eiland

Grenspermitte gaan aan inwoners van Impalila-eiland en die Kasika-nedersettings uitgereik word om oorgrensbeweging teen ’n minimumkoste vir inwoners te verseker. Inwoners moes voorheen tot twee keer per jaar aansoek vir nuwe paspoorte doen omdat hulle so dikwels oorgrens reis.
Volgens die ministerie van binnelandse sake en immigrasie is ’n ooreenkoms in die verband verlede maand in Gaborone, Botswana met die land se regering onderteken.
Die nuwe ooreenkoms stel Namibiërs in staat om via Kasane en die Ngoma-grenspos van Impalila-eiland na die nedersettings en vice versa te reis sonder dat hul paspoorte gestempel hoef te word. Gemeenskappe sal deur die streekskantoor verwittig word wanneer die nuwe reëling amptelik in werking tree.