Greg Gonzalez besing onvolmaakte liefde

Verhoudings is vandag meer kompleks as ooit tevore. Jy kan heel gemaklik 'n “metgesel” (of liefde) kies deur regs of links oor 'n skermpie van 'n dating app te veeg. Sou die verbintenis vlam vat, moet jy wel in 'n stadium met einste skermpie meeding vir die geliefde se aandag . . .Dit is daardie soortgelyke slagveld wat die baardmanfilosoof Greg Gonzalez van El Paso in Texas so vlymskerp op sy debuutalbum, Cigarettes After Sex, verken.Gonzalez (sang, elektriese én akoestiese kitaar) staan saam met Phillip Tubbs (klawerbord), Randy Miller (baskitaar) en Jacob Tomsky (tromme) ook bekend as Cigarettes After Sex – 'n groepnaam wat 'n ander cliché op sy kop probeer draai.Cigarettes After Sex spog met 'n unieke klank wat iets van Mazzy Starr (met die hoofsangeres Hope Sandoval) se eteriese 1993-album, So Tonight That I Might See, eggo. Gonzalez en kie lys egter die Cowboy Junkies, Cocteau Twins en Julee Cruise as hul musikale invloede.Die baardmanhoofsanger se androgene sang word gehul in 'n eiesoortige, dromerige pop- of ambient-klank wat regdeur die album 'n atmosferiese landskap skep. Van Cigarettes After Sex se aanhangers het al bely die musiek hulle met angs en slapeloosheid help.Liries vaar Gonzalez deur die lig en donker van verhoudings. Die openingssnit “K.” handel oor ene Kristen met wie hy vroeër die dag 'n one-night stand gehad het. Terwyl hulle vir die rekening in 'n restaurant wag, besef hy skielik dat hy graag meer van dié samekoms en verhouding wil hê. Hy sing: “Stay with me, I don't want you to leave . . .”Met 'n sterk digterlike aanslag dryf Gonzalez tussen die alledaagse en kosmiese; die klein dingetjies wat liefde en gevoelens omlyn en dan die groter of onbeskryflike wat hy heel lomp in 'n paar woorde probeer vasvang.Die slotlied, “Apocalypse”, begin met “You leapt from crumbling bridges, watching cityscapes turn to dust.” En dan volg die refrein: “Your lips, my lips, apocalypse . . .”Die liedjie “Flash” se opening herinner vir 'n wyle aan Foreigner se “I Want to Know What Love Is”, maar musikaal het Cigarettes After Sex 'n oorspronklike mineur-klank wat om kerslig en rooiwyn smeek. Dit is die soort musiek wat gepas is vir 'n skemeraand. 'n Mens kan die herhaalknoppie 'n paar keer druk en steeds sal hierdie album nie verveel nie.Die lirieke omskryf hier en daar die lyflike en seksuele, so die woorde is by tye van 'n volwasse aard. Tog is dit wat Cigarettes After Sex so 'n aanwins maak – hier word die liefde en verhoudings met al sy onvolmaaktheid, onsekerheid en wankelrigheid besing. Sommige van die beelde sal lank bybly, nes die musiek soos 'n rookwalm vir 'n paar sekondes die interessantste prentjies in die lug teken.Soos Mazzy Starr se Fade Into You bykans 'n kwarteeu later nog bekoor, so sal hierdie versameling liedjies bly spook. Diegene wat smag na iets alternatiefs, sonder die formuleverpakking, hoef nie verder te soek nie.

Greg Gonzalez besing onvolmaakte liefde

Kommentaar

Republikein 2025-05-07

Meld asseblief aan om kommentaar te lewer

Greg Gonzalez besing onvolmaakte liefde

Kommentaar

Republikein 2025-05-07

Meld asseblief aan om kommentaar te lewer

MELD AAN

Advertensie