Green se kolfkrag oorheers toernooi

Tielman van LillWHS Old Boys-krieketklub het die afgelope naweek 'n uiters suksesvolle toernooi by sy FNB Vegkopstadion aangebied.Die toernooi wat met net tien boulbeurte en sewe spelers per span op 'n rondomtaliegrondslag beslis is, het talle skittervertonings gelewer. Die FNB Buffalos, FNB Rhinos, FNB Honey Badgers en FNB Wild Dogs is eweredig uit senior nasionale, klub- asook jong o.16-talent saamgestel. Elke span was dus in drie groepwedstryde betrokke, voor die enkele semifinaal en eindstryd. Die Rhinos wat deur kaptein Ruben Trumpelmann aangevoer is, het as die onoorwonne groepwenner regstreeks vir die eindstryd gekwalifiseer, terwyl die Buffalos en Wild Dogs mekaar in 'n semifinaal moes pak.Zane Green, kaptein van die Wild Dogs, het in die semifinaal met die kolf gekook en agt sesse asook sewe viere na die grens vir sy 84 nie uit nie (29 balle) gepeper. Die veteraan Craig Williams, kaptein van die Buffalos, antwoord met 'n ewe skitterende 83 van net 32 aflewerings, maar sy span se 120 is nie genoeg om die 135 van Green-hulle in te haal nie. Soos beloof het die eindstryd opnuut vir vuurwerke gesorg. Die manjifieke 181/4 wat die Wild Dogs op die telbord geplaas het, het die Rhinos uit die staanspoor onder druk geplaas. Green verseël sy prys as speler én kolwer van die toernooi met sewe sesse en een vier vir sy 51 van net 16 aflewerings. Sy vennoot Niko Davin praat saam (42 van 23 balle, 2x6 4x4) en Karl Birkenstock skakel in met 33 van 16 aflewerings. Dirkie Theunissen, lid van die nasionale o.16-oefengroep, laat kantel 1/26 vir die Rhinos, terwyl Bernard Scholtz (1/35) en Jan-Izak de Villiers met 1/31 bydra.Vir die Rhinos loop sake van die begin af skeef toe Stephen Baard vir 18 lopies uitgevang word. JC Balt haal 18 met Gerhard Janse van Rensburg en Scholtz wat onderskeidelik vir 5 en 9 uitgevang word. Ruben Trumpelman as kaptein lewer 'n puik kolfbeurt, maar selfs sy aanvallende 45 van 13 aflewerings is nie genoeg om die Rhinos 'n sege te laat smaak nie. Hulle eindig op 159/5 en buig die knie met 22 lopies.Vir die Wild Dogs oes Tangeni Lungameni 2/32, Karl Birkenstock 1/18, Hansie de Villiers 1/20 en Mauritius Ngupita 1/24 paaltjies in vir 'n welverdiende oorwinning.Mnr. Francois Erasmus, voorsitter van Old Boys, sê: “Die toernooi was beslis 'n sukses en die konsep is goed vir ons krieket. Die mikpunt was om ons spelers ná 'n lang periode weer aan die gang te kry en die ouens het lekker baie krieket gespeel. “Vrydagaand het ons saam met Krieket Namibia die nasionale veteraneliga vir mans van 40 en ouer bekend gestel en dit was ewe lekker om te sien hoe die ou manne dit geniet.“Tussen die jongste en die oudste speler wat Saterdag in aksie was, is daar 50 jaar verskil en dit wys jou net wat mens met 'n sportkode soos krieket kan vermag. Vir die skoolseuns wat saam met hulle helde kon speel, was dit ook 'n wonderlike geleentheid en ons wil graag helde kweek na wie die seuns kan opsien.“Ons bedank FNB Namibia as hoofborg en Castle Lite asook Richelieu wat bygedra het om die toernooi 'n sukses te maak. Die toernooi het wel klein begin, maar ons het groot planne vir die toekoms om dit uit te brei,” het Erasmus verduidelik.Die naweek se bobaaskolwer was Zane Green met 309 lopies (24x6, 20x6), gevolg deur Craig Williams (215, 20x6, 21x4), Stephen Baard (174, 16x6, 16x4), Niko Davin (155, 9x6, 16x4) en Karl Birkenstock (86, 4x6, 4x4). Gerhard Janse van Rensburg met sy 84 (3x6, 9x4) was die beste junior kolwer van die toernooi.Tangeni Lungameni met 8/92 was die giftigste bouler, gevolg deur Trumpelman (5/53), Bernard Scholtz (5/65) en Birkenstock (5/65).– tielman@republikein.com.na

Green se kolfkrag oorheers toernooi

Kommentaar

Republikein 2026-07-17

Meld asseblief aan om kommentaar te lewer

Green se kolfkrag oorheers toernooi

Kommentaar

Republikein 2026-07-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.