Grafstene op Grootfontein gesteel

Francoise Steynberg Grafskending is ou nuus. Grafsteendiefstal is die nuwe neiging. Groot was mnr. Fanie Lambert van Swakopmund se skok toe hy sy ouers se grafte in Mei in die begraafplaas op Grootfontein besoek en vind hul grafstene is skoonveld.Net die marmersykante van hul grafstene het agtergebly. “Ek was stomgeslaan! Ek wou respek aan my ouers betoon en dan voel dit of jou verlede van jou weggevat word as jy op dít afkom,” het Lambert gister aan Republikein gesê. Lambert het nuwe grafstene vir sy ouers laat maak en toe hy die begraafplaas op 10 Junie weer besoek om die nuwe grafstene aan te bring, het die oorspronklike grafstene se sykante ook voete gekry. “Om die twee grafstene en die vier sykante te vervang, het N$24 000 gekos,” sê hy.Lambert se ouers se grafte is nie die enigstes in Grootfontein se begraafplaas wat beskadig of besteel is nie. “Ek wil dit graag onder die aandag van familielede van oorledenes bring dat nóg grafstene geskend en gesteel is, soos byvoorbeeld dié van Von Flotow, Bassingthwaigte en Hayward,” sê Lambert.Hy sê dié grafsteendiefstal is pas gepleeg, want die tekens daarvan is nog baie vars.“Daar is nie meer 'n heining om die begraafplaas nie en die kapel se dak is besig om afgebreek te word. Munisipale werkers sny tog die gras by die begraafplaas, hoe sien hulle nie die skade wat berokken word nie?” vra Lambert.Hy het die skending van grafte en diefstal van grafstene by die polisie en Grootfontein-munisipaliteit gerapporteer. “Toe ek die tweede keer by die begraafplaas kom, toe wemel dit van die polisie- en weermaglede,” sê Lambert. Hy sê dit was nie die eerste keer dat sy ouers se grafte geskend is nie, maar die derde keer. “Voorheen is die teëls afgebreek, waarná ons dit met gruisklippies vervang het en die sykante langs die grafstene teen N$8 000 opgesit het,” sê hy. “Ons hoop en vertrou hierdie nuwe tendens sal tot 'n einde op Grootfontein kom. Die grafsteendiewe fokus daarop om die marmer te steel en dit aan derderangse grafsteenmakers te verkoop, wat dan net die name op die grafstene afskuur en met nuwe name vervang,” verduidelik hy.“Iemand moet dit stop!”Die woordvoerder van die Grootfonteinse munisipaliteit, mnr. Luke Salomo, het gister aan Republikein gesê die kwessie is onder die bestuur se aandag gebring.Einde Mei is twee vermeende grafsteendiewe in Windhoek in hegtenis geneem nadat 22 grafstene uit twee begraafplase in die hoofstad verdwyn het. Volgens 'n woorvoerder van die Windhoekse stadspolisie is 18 grafstene uit die Golgota-begraafplaas in Katutura gesteel en vier uit die Pionierspark-begraafplaas. Twee verdagtes (28 en 24) werk na bewering by verskillende begrafnisondernemers.

Grafstene op Grootfontein gesteel

Kommentaar

Republikein 2026-02-04

Meld asseblief aan om kommentaar te lewer

Grafstene op Grootfontein gesteel

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.