Goue oues: Wraak teen Wallis kom met prys
Krieket
Johann de Jager - Suid-Afrika het gister in Kaapstad, met 'n witwarm Alan Dawson aan die spits, behoorlik wraak geneem teen Wallis in sy eerste wedstryd in die Wêreldbeker-kriekettoernooi vir spelers ouer as 50 jaar.
Daar was egter suur by die soet vir die gasheer wat die Walliesers met 193 lopies afgeransel het. Sy aanvangskolwer Louis Koen moes met sy telling op ses uittree weens 'n kuitbesering.
Suid-Afrika het 253/5 met die pienkbal in sy toegelate 45 boulbeurte by die Kaapstad-krieketklub aangeteken. Hy het Wallis daarna vir net 60 uitgeboender om te vergoed vir die nederlaag teen dié span toe die toernooi in 2018 in Sydney aangebied is.
Dawson, wat op nommer sewe gaan kolf het, het met 'n onoorwonne 69 lopies van net 35 balle (3x4; 6x6) losgetrek.
Sy laaste elf balle het 'n yslike 48 lopies opgelewer.
Voor dít het Dave Duncan (57) en die kaptein, Dave Callaghan (52), ook vyftigtalle aangeteken.
Volgens Allan Donald, die SA span se afrigter, het Dawson nie geboul nie nadat hy 'n ligte dyspierbesering in sy kolfbeurt opgedoen het.
“Hy kon geboul het as dit nodig was, maar ons het besluit om eers te kyk hoe ons ander boulers vaar en dit was toe nie nodig om met hom te waag nie,” sê Donald.
Die Kaapse draaibalbouler Bruce Wilson, wat Jonty Rhodes in die aanvanklike groep vervang het, het met 4/9 geskitter.
Donald het hoeka voor die tyd gesê sy insluiting op die nippertjie kan dalk nog 'n bedekte seën wees, omdat die kolfblaaie dié tyd van die jaar die draaiers gaan bevoordeel.
Die aanvangskolwer Iwan Rees (10) was die enigste kolwer van Wallis wat dubbelsyfers kon aanteken.
Donald sal wel die span se 22 ekstras moet takel.
Suid-Afrika se volgende wedstryd is môre teen Engeland (104/2), wat vir Indië (101/7) met agt paaltjies geklop het.
Donald sê Koen sal weens sy besering nie oorweeg kan word nie.
“Ons het eers gedink dis sy haksening, maar dit blyk sy kuit te wees. Ons kyk daarna om hom dalk Sondag teen Indië weer te betrek. Brad Player (kuit) lyk darem gereed om in die volgende wedstryd te speel.” – Netwerk24
Daar was egter suur by die soet vir die gasheer wat die Walliesers met 193 lopies afgeransel het. Sy aanvangskolwer Louis Koen moes met sy telling op ses uittree weens 'n kuitbesering.
Suid-Afrika het 253/5 met die pienkbal in sy toegelate 45 boulbeurte by die Kaapstad-krieketklub aangeteken. Hy het Wallis daarna vir net 60 uitgeboender om te vergoed vir die nederlaag teen dié span toe die toernooi in 2018 in Sydney aangebied is.
Dawson, wat op nommer sewe gaan kolf het, het met 'n onoorwonne 69 lopies van net 35 balle (3x4; 6x6) losgetrek.
Sy laaste elf balle het 'n yslike 48 lopies opgelewer.
Voor dít het Dave Duncan (57) en die kaptein, Dave Callaghan (52), ook vyftigtalle aangeteken.
Volgens Allan Donald, die SA span se afrigter, het Dawson nie geboul nie nadat hy 'n ligte dyspierbesering in sy kolfbeurt opgedoen het.
“Hy kon geboul het as dit nodig was, maar ons het besluit om eers te kyk hoe ons ander boulers vaar en dit was toe nie nodig om met hom te waag nie,” sê Donald.
Die Kaapse draaibalbouler Bruce Wilson, wat Jonty Rhodes in die aanvanklike groep vervang het, het met 4/9 geskitter.
Donald het hoeka voor die tyd gesê sy insluiting op die nippertjie kan dalk nog 'n bedekte seën wees, omdat die kolfblaaie dié tyd van die jaar die draaiers gaan bevoordeel.
Die aanvangskolwer Iwan Rees (10) was die enigste kolwer van Wallis wat dubbelsyfers kon aanteken.
Donald sal wel die span se 22 ekstras moet takel.
Suid-Afrika se volgende wedstryd is môre teen Engeland (104/2), wat vir Indië (101/7) met agt paaltjies geklop het.
Donald sê Koen sal weens sy besering nie oorweeg kan word nie.
“Ons het eers gedink dis sy haksening, maar dit blyk sy kuit te wees. Ons kyk daarna om hom dalk Sondag teen Indië weer te betrek. Brad Player (kuit) lyk darem gereed om in die volgende wedstryd te speel.” – Netwerk24
Kommentaar
Republikein
Geen kommentaar is op hierdie artikel gelaat nie