Gordhan: Moody’s se besoek slegte teken

Carin Smith - Dit is nie ’n goeie teken dat die graderingsagentskap Moody’s na wat verneem word Suid-Afrika onlangs besoek het nie, het Pravin Gordhan, voormalige minister van finansies, gewaarsku.

Daar is in berigte verwys daarna dat Moody’s die land besoek het, maar dit kon nog nie bevestig word nie.

Al meer ekonome verwag egter al Moody's gaan die land 24 November afgradeer wanneer sy besluit bekendgemaak word oor die hersiening van Suid-Afrika se kredietgradering.

“Suid-Afrika beweeg met sy begroting in die verkeerde rigting. Ons moet daardie skuif stop en begin om in ’n ander rigting te beweeg,” het hy by die Business Ethics Network of Africa (BEN-Africa) gesê wat in vennootskap met Deloitte aangebied word.

Die Orde van die Baobab is daar aan Gordhan toegeken omdat hy ’n “ware etiese leier is, wat daarna streef om die regte ding te doen selfs al het ander die minder etiese pad gekies”.

Gordhan het ook gesê een van die vrae wat gevra moet word oor staatskaping, is hoekom niemand nog gestraf is daarvoor nie.

“Soveel name is al onthul en ek dink Jacques Pauw se boek (The President’s Keepers) is ’n briljante en dapper poging om die miljoene punte bymekaar uit te bring om te sien wie ’n rol gespeel het.

“Die vraag is of wetstoepassers hul werk gaan doen. Daar is nie ’n tekort aan inligting nie.”

Hy het ook gemaan daar is ’n gevaar dat Suid-Afrikaners so gewoond gaan raak aan die idee van korrupsie en staatskaping dat hulle dit nie meer as ’n buitengewone gebeurtenis gaan sien nie.

Hy het ook die mense geprys wat in die ondervraging in die Parlement oor Eskom getuig, soos die geskorste regshoof Suzanne Daniels.

“Gierigheid is die belangrikste dryfkrag van die gedrag in die huidige ekonomiese stelsel. Hierdie siekte moet aangepak word omdat dit die samelewing besmet.”

Hy het gesê die inligting wat uit die uitgelekte dokumente genaamd die Panama Papers en die Paradise Papers gekom het, toon die tipe gierigheid waarna verwys word.

“Dit is verstommend hoe groot instellings wat hul waardes en standaarde verkondig, dan gesien word as diegene wat die teenoorgestelde doen in terme van die integriteit wat ons wil sien,” het hy gesê.

“ ’n Ekonomiese model wat ongelykheid versterk en gierigheid bevorder eerder as empatie, spoor die verkeerde gedrag aan. Dit moet gekombineer word met ’n sterk siening oor maatskaplike geregtigheid wat die kern van ’n maatskappy se sakepraktyke vorm, of anders gaan dit voortdurende spanning skep.”

Hy glo van volgende jaar af gaan daar moontlik verandering in Suid-Afrika gesien word, maar dit gaan tyd neem.

“Die huidige vingerwysery is eintlik ’n nuttige manier om mense se aandag van die groter prentjie af te trek.”

Hy het beklemtoon dit sal baie harde werk neem om vertroue in die Suid-Afrikaanse ekonomie weer op te bou.

“Daar kom altyd ’n tyd wanneer gewone mense keelvol raak en sê ‘tot hier en nie verder nie’.”

Hy meen aktivisme is nodig, maar dit moet reg gedoen word. – Fin24