Gobabis beplan ruim uitbetalings

Ogone TlhageDie Gobabis-munisipaliteit oorweeg dit om stewige uitbetalings ter waarde van altesaam bykans N$3 miljoen aan sy waarnemende uitvoerende hoof en gesondheidsinspekteur, mnr. Steve Adonis, en ’n voormalige werknemer, mnr. Christiaan Goreseb, te maak. Op ’n vergadering van die dorpsraad is reeds voorsiening vir dié uitbetalings buite die begroting gemaak, volgens dokumente wat Republikein se susterkoerant Namibian Sun onder oë gehad het. Die dorpsraad oorweeg om N$1,8 miljoen aan Goreseb uit te betaal ná afloop van ’n dissiplinêre proses oor sy gedrag terwyl hy vir die munisipaliteit gewerk het, en ten spyte daarvan dat die munisipaliteit aangeraai is om die saak na die kantoor van die aanklaer-generaal vir regsadvies te verwys.Die dorpsraad oorweeg ook om N$800 000 aan Adonis te betaal, insluitend ’n eenmalige N$500 000 voordat die oorblywende N$300 000 in 12 maandelikse paaiemente van N$25 000 elk sal volg.Adonis is as die munisipaliteit se gesondheidsbeampte aangestel, maar in 2014 het die ministerie van streek- en plaaslike owerheid, behuising en landelike ontwikkeling ’n plan opgeskort om die munisipaliteit te herstruktureer. Die raad het toe, met die ministerie se goedkeuring, nie ’n bestuursvlakpos vir gesondheid geskep nie. Alle kommunikasie met Adonis was gedoen asof hy die dorp se gesondheidsbeampte was, maar in 2018 het hy geweier om ’n kontrak vir dié doel te onderteken. Adonis het toe ’n arbeidsaak teen die munisipaliteit van stapel gestuur, maar dit later weer teruggetrek. Die minister van stedelike en landelike ontwikkeling, mnr. Erastus Uutoni, het die voorgenome betaling aan Adonis bevraagteken en wou by Gobabis se burgemeester, me. Elvire Theron, antwoorde kry. By navraag van Namibian Sun het Theron en die voorsitter van Gobabis se bestuurskomitee, mnr. Sylvester Binga, gesê die vorige burgemeester, mnr. Liberius Kalili, en sy adjunk, mnr. Elwin Gariseb, probeer die werk van die nuwe raad saboteer. “Die voormalige burgemeester mnr. Liberius Kalili word in die ouditverslag van die kapitaalprojek geïmpliseer en is op ’n heksejag waarin hy die raad van korrupsie en ongerymdhede beskuldig. Kalili word gevoer met vertroulike dokumente vanaf die departemente menslike hulpbronne en finansies; van ’n werknemer wat die raad wil saboteer. “Kalili en sy span se heksejag word deur wraak gemotiveer. Daar is ernstige vrees in afwagting op die huidige forensiese ondersoek wat bewyse vir die aantygings sal vasstel,” lui ’n nuusvrystelling deur die twee.Volgens Theron en Binga het Gariseb voorheen ’n brief aan die minister oor Adonis se arbeidsgeskil geskryf. “Dis duidelik dat (Gariseb) ook omgekrap is omdat hy nie weer as adjunkburgemeester aangestel is nie en hy wil nou raadsbesluite saboteer,” sê hulle.Uutoni het gevra die munisipaliteit moet die betrokke kwessies ondersoek en terugvoering gee. “Gee asseblief aan my kantoor ’n geskrewe reaksie in die vorm van ’n verslag,” het Uutoni gesê. – republikein@republikein.com.na

Gobabis beplan ruim uitbetalings

Kommentaar

Republikein 2026-08-03

Meld asseblief aan om kommentaar te lewer

Gobabis beplan ruim uitbetalings

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.