Géén toetse in SA vanjaar, sê Saru-baas

Stephen Nell – Die Springbokke se tradisionele jaareindtoer na die Noordelike Halfrond is van die baan, terwyl daar ook nie vanjaar toetsrugby in Suid-Afrika gespeel gaan word nie.Dít was van die wrede werklikhede wat op ’n aanlyn konferensie deur Jurie Roux, uitvoerende hoof van die Suid-Afrikaanse Rugbyunie (Saru), uitgestippel is.“In hierdie stadium kan internasionale wedstryde slegs in min of meer die tydgleuf van Oktober en November oorweeg word. Die enigste opsie wat ons kragtens reisbeperkings het, is om met die regering se toestemming na Nieu-Seeland te reis en daar in ’n bio-borrel in die Rugbykampioenskap te speel,” sê Roux.“Gegewe die kwarantyn- en isolasietydperke, sal dit nege tot tien weke neem. Dit sal die hele Oktober en November, asook ’n deel van Desember, in beslag neem. Dit maak die speel van ander internasionale wedstryde in daardie tydperk onmoontlik.”Volgens Roux hoop Saru steeds dat Suid-Afrikaanse spanne in die laaste week van Augustus of vroeg in September weer op die speelveld sal kan wees. Daar sal waarskynlik eers ’n plaaslike Superrugby- en daarna ’n Curriebeker-reeks gespeel word.“Ons gaan voort met ’n plaaslike kompetisie vir agt senior spanne en vyf o.21-spanne, wat die franchises sal wees. Alle klubrugby is van die baan en die Eersteliga-spanne het self besluit om nie vir die res van die jaar te speel nie,” sê Roux.“Daar word nou met die regering oor twee scenario’s onderhandel – om buite of binne ’n bio-borrel te speel.”Ofskoon Suid-Afrika nie as’t ware uit Superrugby geskop is nie, het die prentjie vir dié toernooi ook vir goed verander. Die nuwe werklikheid wat deur die Covid-19-pandemie geskep is, beteken dat daar nie van Februarie tot Mei volgende jaar vryelik tussen die Sanzaar-lande gereis sal kan word nie.“Ons neem besluite in baie onseker tye en probeer só goed as moontlik beplan, veral vir 2020 en 2021. Die langtermynplanne vir daarna is nog vloeibaar.”Roux sê Nieu-Seeland se wens om aanstaande jaar ’n koers in te slaan waar sy spanne teen spanne uit Australië en die Suidsee-Eilande sal speel, is gegrond in die situasie wat deur die pandemie veroorsaak is.“Nieu-Seeland het deurlopend in vergaderings gemeld dat, gegewe die beperkings op reise, die onsekerheid of landsgrense oop sal wees, reisonkoste en die waarskynlikheid dat daar minder vlugte sal wees, dit onwaarskynlik is dat Suid-Afrika of Argentinië voor die einde van Mei in Nieu-Seeland ingelaat sal word sonder ’n kwarantyn-proses,” sê Roux.“Dit sal beteken dat elke span twee weke voor die wedstryd sal moet reis en vir daardie tydperk in kwarantyn moet wees voordat hulle kan speel. Met hul terugkeer, sal hulle deur dieselfde proses moet gaan. Dis net nie ’n haalbare opsie nie.”Sanzaar oorweeg nog sy opsies vir aanstaande jaar en Suid-Afrika is nie “uitgeskop” nie.“As enigiemand uit Superrugby geskop is, is dit Nieu-Seeland wat homself uitgeskop het,” sê Roux.“Nieu-Seeland het elke reg om op sy eie toekoms te besluit, maar kragtens Sanzaar is daar ’n wetlike ooreenkoms en daar moet daar binne gehandel word. As jy dit nie doen nie, kom dit op kontrakbreuk neer en laat jy jouself oop vir regstappe deur die ander partye.“Ons het egter binne Sanzaar nog altyd alles konstruktief benader. Ons praat nog oor hoe 2020, en wat daarna gebeur, sal lyk.” – Netwerk24

Géén toetse in SA vanjaar, sê Saru-baas

Kommentaar

Republikein 2026-07-22

Meld asseblief aan om kommentaar te lewer

Géén toetse in SA vanjaar, sê Saru-baas

Kommentaar

Republikein 2026-07-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.