Giyani se planne wéér in die wiele gery

Jo-Maré DuddyGiyani Gold Corp., die plaaslik genoteerde Kanadese eksplorasiemaatskappy waarin mnr. Knowlegde Katti van Namibië ’n belang het, se strategie om sy energieportefeulje uit te brei, het ’n terugslag beleef.In ’n aankondiging Maandag op die Namibiese aandelebeurs (NSX) het Giyani gesê die ooreenkoms van voorneme met Horizon Enerji en Sumo Coal ingevolge waarvan Giyani dié twee maatskappye wou oorneem, het verstryk.Horizon is ’n maatskappy in Turkye met belange in oliestoring en ’n droëdokhawe. Sumo is ’n vername speler in die steenkoolbedryf in Suid-Afrika.Giyani het verlede Augustus ’n ooreenkoms met dié maatskappye aangegaan in terme waarvan eersgenoemde tot 31 Desember gegun is om onder meer die nodige finansiering vir die transaksies te bekom. ’n Bedrag van US$25 miljoen in totaal was aan die oornames gekoppel.Mnr. Duane Parnham, uitvoerende direkteur van Giyani, het Maandag in ’n verklaring gesê die maatskappy is “teleurgesteld dat heersende marktoestande en tydsbeperkings” voorkom het dat ’n finale ooreenkoms met Horizon en Sumo voor die einde van 2014 gesluit kon word. ’n Transaksie met die aandeelhouers van die twee maatskappye bly egter ’n “moontlikheid”, sê hy.Giyani is steeds vasbeslote om die maatskappy deur middel van ’n strategiese verkryging te versterk, sê Parnham. Volgens hom posisioneer Giyani se korporatiewe struktuur en internasionale noterings die maatskappy goed om daarin te slaag.Giyani is op die ontwikkelingsbord (DevX) van die NSX, die alternatiewe bord (AltX) van die JSE en die waag-indeks van die Toronto-aandelebeurs genoteer. Bitter min van dié maatskappy se aandele word egter op die DevX verhandel. Teen die sluiting van die NSX Maandag was Giyani se prys N$3,58 per aandeel.Die maatskappye se planne verlede jaar om die Navachab-goudmyn naby Karibib by AngloGold Ashanti te koop, het ook misluk. Guinea Fowl Investments Twenty Six Ltd, ’n volfiliaal van QKR Corporation Ltd, het dié myn teen US$110 miljoen voor Giyani se neus weggeraap.Giyani het verlede week sy tussentydse resultate vir die nege maande tot einde September 2014 bekend gemaak.Volgens dié finansiële resultate het Giyani ’n netto verlies van bykans 2,11 miljoen Kanadese dollar vir die nege maande gely, amper N$21 miljoen teen gister se wisselkoers. Dit is ietwat minder as die netto verlies van bykans 2,4 miljoen Kanadese dollar vir dieselfde tydperk in 2013.In die finansiële verslag sê Giyani dit moet, bykomend tot sy bedryfskapitaalvereistes, nóg geld vir sy bestaande verpligtinge en eksplorasiekoste in die hande kry.“Dié omstandighede kan aansienlike twyfel oor die maatskappy se vermoë laat ontstaan om sy verpligtinge na te kom wanneer hy moet,” luidens die state. Dit laat voorts twyfel ontstaan oor hoe toepaslik die gebruik van rekenkundige beginsels vir ’n gevestigde saak is, sê die verslag.

Giyani se planne wéér in die wiele gery

Kommentaar

Republikein 2025-12-16

Meld asseblief aan om kommentaar te lewer

Giyani se planne wéér in die wiele gery

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.