Giro-oorlewende aan masjiene gekoppel

Francoise Steynberg – Die oorlewende van die girokopterongeluk wat gister omstreeks 14:12 sowat 10 km oos vanaf Windhoek plaasgevind het, is gisternamiddag aan lewensondersteunende masjiene in die Lady Pohamba Private Hospitaal gekoppel.

Die oorlewende, mnr. Pierre Blaauw, is die eienaar van die girokopter met die registrasienommer V5-ULT wat skaars tien minute ná opstyging by die Eros-lughawe neergestort het.

Volgens die hoof van die direktoraat van vliegtuigongelukondersoeke in die ministerie van werke en vervoer, mnr. Magnus Abraham, was daar twee insittendes in die girokopter wat glo besig was met ’n opleidingsvlug.

“Een persoon het gesterf en die ander een het ernstige brandwonde opgedoen en is na die hospitaal geneem,” het Abraham op die toneel aan Republikein gesê.

Abraham het teen druktyd gesê die oorledene is onherkenbaar en sy identiteit onbekend.

“Die girokopter het by Eros-lughawe om 14:02 opgestyg en sou na Heja Lodge en terug na Eros vlieg toe dit vermoedelik op pad na die lodge kragdrade bo die pad getref het,” het Abraham gesê.

Die giropkopter het volgens hom vyf myl vanaf Eros-lughawe in die pad tussen die hoofstad en die Internasionale Lughawe Hosea Kutako (HKIA) neergestort. Die wrak het in ’n hoop as in die regterkantste baan vanaf Windhoek na HKIA gelê en die liggaam van die oorledene was bedek.

FLUISTER

Volgens ’n vliegondersoekbeampte op die toneel, kapt. Oskar Plichta, is Blaauw se brandwonde so erg dat hy hom nie herken het nie.

“Ek ken vir Pierre en toe hy in die ambulans gelaai is, het ek gevra wie dit is. Ek moes my oor teen sy mond sit om Pierre sy naam te hoor fluister,” het Plichta aan Republikein gesê.

“Pierre se brandwonde is 100%. Daar is nie ’n stukkie kledingstuk of ’n vel aan sy liggaam nie.”

“Pierre se pa boer naby Dordabis en hy was gisternamiddag reeds op pad hospitaal toe,” het Plichta gesê.

Abraham het gisteraand bevestig Blaauw is aan lewensondersteunende masjiene gekoppel en die burgerlike lugvaartdokter is ook by die hospitaal.

“’Pierre het verlede week aan my gesê om ’n koper vir die girokopter te soek,” het ’n geskokte vriendin van Blaauw gesê.

SWAAR VERKEER

Die ongelukstoneel het gistermiddag van nooddienste gewemel en die pad moes vir ’n lang ruk gesluit word.

’n Groot vragmotor kon nie onderdeur die beskadigde kragdrade ry nie en NamPower was op die toneel om die kragdrade te herstel.

Volgens Abraham is die wrak omstreeks 16:00 verwyder en die toneel opgeruim waarna die lang rye opgehoopte verkeer weer normaal kon vloei.

Op ’n WhatsApp-video het ’n vrou wat ’n op pad na HKIA was, gesê sy het haar vlug weens die ongeluk verpas.

- [email protected]