GIPF belê in Namibië se groei

Augetto Graig - Die staatsdienspensioenfonds (GIPF), die grootste pen­sioenfonds in Namibië, is sedert Maart vanjaar meer as N$93,3 miljard sterk.
Dit het verlede jaar ’n opbrengs van 5,45% getoon en is finansieel gesond, sê die aktuariële waardeerder, mnr. Robert Oketch.
Oketch sê die GIPF is die tweede of derde grootste pensioenfonds vir omskrewe voordele in Afrika waarvan die voordele goed met ander fondse s’n vergelyk. Die GIPF se ledetal staan tans op 106 092 en uitbetalings neem teen ’n inflasieverwante koers toe. Bydraetekort teenoor aanspreeklikheid het van 10% in 2012 na 9,45% verminder.
Mnr. Mihe Goamab, die voorsitter van die GIPF se raad van trustees, het Dinsdag tydens die jaarlikse konsultasie met belanghebbendes gesê die fonds speel ’n belangrike rol in die land se ekonomie. In die gees van Harambee wil die GIPF nóg meer doen om ontwikkeling met die land se strategiese doelwitte te laat ooreenstem.
Tydens die geleentheid is die fonds se aktuariële verslag vir die jaar en ’n verslag oor genoteerde en ongenoteerde beleggings vrygestel. Goamab het gesê "merkwaardige vordering" is met ongenoteerde beleggings in prioriteitssektore soos behuising en infrastruktuurontwikkeling gemaak. Tot dusver is N$1,35 miljard vir behuising beskikbaar gestel: N$750 miljoen vir behuisingskemas en N$600 miljoen vir die diens van erwe. Die GIPF se raad van trustees oorweeg dit om sy behuisingsportefeulje verder uit te brei.
Om die res van die ekonomie te ondersteun, glo Goamab private ekwiteit het groot potensiaal om Nami­biërs van werknemers na entrepreneurs en besigheidseienaars te verander. Die GIPF gaan nog N$2 miljard aan beleggers beskikbaar stel, spesifiek vir waagkapitaal, skuldfondse, infrastruktuurfondse en algemene private ekwiteit. Dié geld sal soos volg toegedeel word: ’n Groeifonds van N$140 miljoen vir SME's, ’n skuldfonds van N$250 miljoen vir SME's, N$542 miljoen vir infrastruktuur vir krag, water, vervoer en kommunikasietegnologie inligting en N$1,068 miljard vir algemene private ekwiteit.
Die GIPF het verlede jaar ook ’n nuwe ontwikkelingsbelegging-beleid opgestel wat tot die Harambee-welvaartplan se pilare van ekonomiese en maatskaplike infrastruktuur, ’n groen ekonomie en energie moet bydra.
Mnr. Conville Britz, die GIPF se hoofbestuurder van beleggings, het gesê die GIPF het teen 31 Desember 2015 die verskaffing van dienste aan 1 582 erwe in die land gefinansier. Teen 15 April vanjaar was 484 huise, meenthuise en woonstelle voltooi en 1 310 huislenings ter waarde van N$1 miljard toegeken.
Deur middel van die GIPF se Nampro-fonds het 98 SME's geldelike hulp ontvang. Mobipay, waarin die GIPF N$60 miljoen belê het, is tans besig om in samewerking met Agony SAFI na Tanzanië uit te brei. Sowat N$82 miljoen is ook reeds vir sonkragelektrifisering vir winkelsentrums en hospitale asook vir die diens van erwe op Otavi en Kuisebmond beskikbaar gestel.